Chililu Chabadika Kulema Chekalaña naNtañishi Wamuwahi
1. Chililwinyi chabadika kulema chatela kwikala nantañishi wamuwahi?
1 Chumanyi chakwashaña muntu kulonda yekali ntañishi waBayibolu wamuwahi? Kutaña shikola yakumujimba? Kwiluka yuma yayivulu? Tahindi kwikala nañovu? Inehi, ilaña hichililu chochimu chaleteshaña Nshimbi kushikijewa, chililu chakwilukilaku atumbanji twaYesu, chililu chaYehova chasweja kubadika nawa chaletaña ikoku. (Yow. 13:35; Ŋal. 5:14; 1 Yow. 4:8) Hichililu chakukeña. Antañishi amawahi amwekeshaña kukeña.
2. Muloñadi chitwatela kukeñela antu?
2 Keñenu Antu: Ntañishi Muneni, Yesu, wayikeñeli antu nawa chumichi chayikwashili kutiya nsañu yayilejeleñayi. (Luka 5:12, 13; Yow. 13:1; 15:13) Neyi twayikeña antu, tunateli kuyishimwina mpinji yejima. Hitwakafwa mutentu neyi tumona kukala kudi neyi makabisha nikadiwuku. Ilaña, tukumwekesha muchima wakukeña antu itunakushimwina nawa tukuwana njila yakuyikwashilamu nakukala kunakumonawu. Tukwikala nampinji yakuhanjeka nakadizi waBayibolu wejima nikwikala cheñi nampinji kwakankawetu hakuloñesha nsañu yitukudiza nindi.
3. Indi kukeña nsañu yalala yamuBayibolu yinateli kutukwasha ñahi mwiha?
3 Keñenu Nsañu Yalala yamuBayibolu: Yesu wakeñeli cheñi nsañu yalala yamuBayibolu nawa wachimweneña nindi himaheta. (Mat. 13:52) Anetu neyi tukeña chalala, tukuhoshaña namuzañalu nawa tukusañumuna antiyi kwikala nampwila yakutiya. Neyi tukeña antu muniyi njila chikutukwasha kusha muchima hansañu yalema yitunakushimwina bayi hakuzeyazeya kwetuku, nawa hitukufwaña mutentu neyi tudi mwihaku.
4. Tunateli kwikala ñahi namuchima wakukeña antu?
4 Ikalenu Nachililu Chakukeña: Tunateli kwikala ñahi namuchima wakukeña antu? Kuhitila mukutoñojoka hakukeña kwatumwekeshelayi Yehova niMwanindi nihamwidima wakuspiritu munakupuputawu antu adi mwiluña detu. (Maku 6:34; 1 Yow. 4:10, 11) Tukusweja kukeña chalala chamuBayibolu neyi twikala nampinji yakudiza nkawetu nikutoñojoka hayuma yitunadizi. Kukeña hichililu chamukabu waspiritu. (Ŋal 5:22) Komana twatela kumulembelela Yehova kulonda yatwinki spiritu nimuchima wakukeña antu. (Luka 11:13; 1 Yow. 5:14) Hela chakwila twataña shikola yakumujimba, tweluka yayivulu kuspiritu hela tukweti ñovu, tunateli kwikala ntañishi waBayibolu wakuluka yitembi neyi tukeña antu.