Hembaku Chinleji Cheyi Chamuchima
1. Indi mutu wefuku dakupompa kwadimena kwachaaka chamudimu chamu 2013 wunakwila nawudi, nawa iyi progiramu yikweti nkeñelwinyi?
1 Mafuku ejima twamonaña yuma yinateli kutamisha chinleji chetu chamuchima. Dichinaloñesheluwu progiramu yefuku dakupompa kwadimena kwachaaka chamudimu chamu 2013 kukatachika haSeptember 1, 2012 yikweti mutu wunakwila nawu “Hembaku Chinleji Cheyi Chamuchima.” (1 Tim. 1:19) Iyi progiramu anayiloñeshi kulonda yitukwashi kushinshika chikupu chitwazatishaña ichi chawana chabadika kuwaha chatwinkayi Nleñi yetu.
2. Malwihwinyi alema akakulewa muprogiramu?
2 Keñakeñenu Iyi Yikuma: Progiramu yikakula malwihu atanu nayedi alema kutalisha hachinleji chamuchima:
• Yumanyi yinateli kukisañana chinleji chetu chamuchima?
• Tunateli kufumba ñahi chinleji chetu chamuchima?
• Komana chaswayi kwikala akadi muloña wamashi awantu ejima?
• Indi kutoñojoka nikuzatisha nshimbi jamuBayibolu kwamwekeshañadi hadi etu?
• Tunateli kutondolwela ñahi kudimbwisha akwetu hayuma yatela kufuukulahu aweni?
• Atwansi, munateli kuumika ñahi neyi ayikakeja nawu mwili yuma yatama?
• Nkiswinyi yawanaña antu alondelaña chinleji chawu chalombolewaña naspiritu?
3. Indi progiramu yakatukwasha ñahi?
3 Yehova nateli kutukwasha kulonda tushindi ndombu yaSatana wafwilaña kuluwañesha chinleji chetu chamuchima. Tata yetu wamwiwulu wukweti kukeña watulejaña kuhitila Mwiizu dindi nikuloñesha kwindi nindi: “Njila iyi, endenu mwomwenimu.” (Isa. 30:21) Iyi progiramu hinjila yimu mwatulombwelañayi Yehova. Dichi mwatela kudiloñesha kulonda mwakapompi ifuku dejima. Mwatela kutiyilila nakanañachima nikwiluka chimwatela kuzatisha iyi nsañu halwenu. Hanjekenu nsañu yamuprogiramu nachisaka chenu. Kuzatisha nshimbi yitukatambwila kukatukwasha kutwalekahu ‘kwikala nachinleji chamuchima chachiwahi’ nawa kukatukwasha kubula kuhuñumuka nachiseki chamukaayi kaSatana.—1 Pet. 3:16.