Zañalalenu naMudimu Wenu Wumunakabakeni
1. Chumanyi chinateli kumanisha iyena detu dakuzata mumudimu wakushimwina?
1 Muntu amuleñeli kulonda ‘yazañalaleña nanyidimu yindi yakabakenañayi.’ (Mukwa. 2:24) Hela chochu, neyi tukañanya kumona yuma yayiwahi yafumaña mumudimu wetu wakushimwina, wusweleli wunateli kumanisha muzañalu nawa tukwikala neyena wanyi. Chumanyi chikutukwasha kutwalekahu kumona yuma munjila yayiwahi?
2. Muloñadi wutwatela kukuhwelela netu mumudimu wetu wakushimwina mwakafuma yuma yayiwahi?
2 Kuhwelelenu Nenu Mwakafuma Yuma Yayiwahi: Anukenu nenu hela chakwila antu antesha hohu diwu etejeli yuma yatañishileñayi Yesu, wazatili chikupu mumudimu windi wakushimwina. (Yow. 17:4) Muchishimu chindi chamukwakukuwa mbutu, Yesu washimwineñahu dehi nindi nyichima yayivulu yikatambwila wanyi mbutu yansañu yaWanta. (Mat. 13:3-8, 18-22) Hela chochu, neyi tudikita nañovu tunateli kuzata yuma yayivulu.
3. Munjilanyi mutunateleli ‘kusoña nyikabu’ chili antu antesha hohu diwu atiyililaña nsañu yitwashimwinaña?
3 Chitwasoñaña Nyikabu Yayivulu: Kwesekeja nachishimu chaYesu antu aketeja nsañu ‘akasoña nyikabu yayivulu.’ (Mat. 13:23) Neyi nsachi yatidiku yinameni nakukula, nyikabu yafumañaku bayi neyi hinsachi yatidiku yanteshaku, kwafumaña mbutu yayiha. Dichi nyikabu yasoñaña akwaKristu, bayi neyi hiyatumbanji amahaku ilaña himbutu yayivulu yitwakuwaña nakufuntila-funtilahu kuhitila mumudimu wetu wakushimwina Wanta. Mwafumaña yuma ‘yayiwahi’ yayivulu yatuletelaña muzañalu chili antu anatiyilili hela nehi. Tunakuzatila hamu nawakwetu hakujilika ijina daYehova. (Isa. 43:10-12; Mat. 6:9) Tunakudiluñisha kukooleka kwakwikala akwakukalakala hamu naNzambi. (1 Kor. 3:9) “Nyikabu yakunyivumbu” yamuchidiwu yamuzañaleshaña Yehova.—Heb. 13:15, 16.
4. Yumanyi yafumaña mumudimu wetu wakushimwina yitwabulaña kwiluka?
4 Cheñi nawa, mumudimu wetu wutwazataña nañovu munateli kufuma yuma yitukubula kumona. Hadaha antu amutiyili Yesu chashimwinineñayi hiyekalili atumbanji twinduku sampu nichamanishiliyi mudimu windi wahamaseki. Chochimu, mbutu yaWanta yitwakuwaña hiyinateli kukula mumuchima wamuntu hohenohuku, nateli kwinza muchalala chakubula etu kwiluka. Eñañi, twazataña nyidimu yamaneni chikupu mumudimu wetu wakushimwina. Dichi, ‘tutwalekenuhu kusoña nyikabu yayivulu’ nikwikala atumbanji twaYesu.—Yow. 15:8.