Imbujolenu Atuprofwetu—Yona
1. Yona wadiña nayililwinyi yayiwahi?
1 Chumanyi chimwanukaña neyi mutoñojoka hadi kaprofwetu Yona? Amakwawu anateli kumumona neyi mukwawoma hela muntu wakola muchima. Hela chochu, wadiña wadizoza, wahamuka nawa wadihana. Tunateli ‘kwimbujola’ ñahi yililu yayiwahi yaYona?—Yak. 5:10.
2. Tunateli kwimbujola ñahi kudizoza kwaYona?
2 Kudizoza: Hakusambila, Yona watemukilili kwacheñi nakushiya mudimu windi. Chumichi hichatela kutuhayamishaku muloña aAshuri adiña aya mpuhu munsañu yamadombu, nawa Niniva amuteneneña nawu “mukala wamashi.” (Nahu. 3:1-3) Hela chochu, Yehova wamubabesheli Yona, nawa wadizozeli hakwiteja kuzata iwu mudimu chamutemesheluwu kamuchiyedi. (Yish. 24:32; Yona 3:1-3) Hela chakwila Yona wasambilili kushintajala, wazatili mudimu waYehova. (Mat. 21:28-31) Komana ninetu twafwilaña kushimwina nsañu yayiwahi chili anatubabeshi hela neyi mwiluña detu dakushimwina mwekala antu akala?
3. Yumanyi yikuyiletesha mwikali nawulobu nikudihana mumudimu wenu wakushimwina?
3 Kuhamuka niKudihana: Chelili Yona yeluki nindi nashi wumi wawakwakwendesha watu hakatoña muloña wakufuukulahu chatama, wadikeñeleli kuhana wumi windi. (Yona 1:3, 4, 12) Chimwahitili mafuku, hampinji yazatileñayi mudimu windi muNiniva, weñilili mukachi kamusumba hadaha wakeñeleña iluña dadiwahi dakubidikilahu wunsompeshi waYehova. Kaprofwetu kaNzambi wahamuka diyi watela kwila yumiyi bayi mukwawomaku. (Yona 3:3, 4) Indi etu makonu? Twatela kwikala nawulobu watwinkañayi Nzambi hakwila tushimwini wunsahu chakadi woma neyi tudi mukweseka. (Yil. 4:29, 31) Kudihana kwakeñekaña hakwila tuzatishi mpinji nimali etu mumudimu wakushimwina.—Yil. 20:24.
4. Muloñadi wutwatelela kwikala nampinji yakutoñojoka hayakutalilahu yayiwahi yemikiluwu atuprofwetu twaYehova?
4 Mpinji yejima yimunakutaña nsañu yinakuhosha hadi atuprofwetu twaYehova, munateli kuhetelamu neyi mutoñojokaña nenu yuma oyu yinakumwekena. Dihulenu nenu: ‘Nadi kwila ñahi? Nateli kwimbujola ñahi yililu yindi yayiwahi muchihandilu chami?’ (Heb. 6:11, 12) Yibaaba yikalondelahu yamuMudimu Wetu waWanta yikahosha hayuma yalema yitwadizilaña kudi atuprofwetu twaYehova amakwawu ashinshika.