Chumanyi Chatusañumunaña Kushimwina?
1. Kukeña kutwakeña anyi kwatusañumunaña kukalakala mudimu wetu wakushimwina?
1 Kushimwina nsañu yayiwahi yaWanta waNzambi dimudimu walema chikupu wutwatela kuzata makonu. Mwamweni, kuzata iwu mudimu kwamwekeshaña nawu twovwahilaña nshimbi jiyedi jasweja kulema jakwila nawu, kumukeña Yehova nikukeña akwetu. (Maku 12:29-31) Kukeña kwatusañumunaña kwikala ankalakali adikita chikupu.—1 Yow. 5:3.
2. Indi mudimu wetu wakushimwina wamwekeshaña ñahi nawu twamukeña Yehova?
2 Kukeña Kutwamukeña Yehova: Kukeña kutwamukeña Ibwambu detu itwakeña chikupu, Yehova, kwatusañumunaña kumuhakwilaku. Kwakwihi nayaaka 6,000 yinahituhu, Satana wamutwambilaña Yehova. (2 Kor. 4:3, 4) Dichi antu akuhwelela nawu Nzambi wayandishaña akwanshidi mukesi kahelu, wekala mudi Anzambi Asatu akala kutiyishisha, nawa nawu hasha muchima hadi antuku. Antu amavulu akuhwelela nawu hikwekala Nzambuku. Twakeñaña netu antu eluki nsañu yalala yahosha hadi Tata yetu wamwiwulu. Nzambi watiyaña kuwaha chitwadikitaña mumudimu wakushimwina nawa chumichi chamuhilishaña Satana.—Yish. 27:11; Heb. 13:15, 16.
3. Indi mudimu wetu wakushimwina wamwekeshaña ñahi nawu twakeña akwetu?
3 Kukeña Kutwakeña Akwetu: Chitwamushimwina muntu twamwekeshaña netu twamukeña. Antu anakukeña chikupu kutiya nsañu yayiwahi muyinu yaaka yakala. Antu amavulu adi neyi akwaNiniva amumafuku aYona adiña “kanda eluki nichikasa chachidiilu nichachimunswa.” (Yona 4:11) Mudimu wetu wakushimwina wadizishaña antu chakushakama chiwahi nikwikala namuzañalu. (Isa. 48:17-19) Wayileñelaña kwikala nakuchiñeja. (Rom. 15:4) Neyi atiyilila nikuzatila hayuma yadizañawu, ‘akahanda.’—Rom. 10:13, 14.
4. Chumanyi chakabula kuvulamenayi Yehova?
4 Anyana amawahi hiyamwekeshaña nawu akeña anvwali jawu hampinji yimu hohuku. Ilaña afwilaña kukeña anvwali jawu mpinji yejima. Chochimu, kukeña kutwamukeña Nzambi niakwetu kwatusañumunaña kwikala asoñama kulonda tushimwineña mpinji yejima, bayi hampinji yitwatanjika kushimwina hohuku. Tukushimwinaña chakadi kuleka. (Yil. 5:42) Yehova hamba kavulamena kukeña kwamuchidiwuku.—Heb. 6:10.