Imbujolenu Atuprofwetu—Yoweli
1. Tunateli kwimbujola ñahi kudizoza kwaYoweli neyi tunakushimwina?
1 Indi kaprofwetu Yoweli hinyi? Wadilumbulula hohu nindi wadiña “mwana kaPetuweli.” (Yoweli 1:1) Iwu kaprofwetu wadizoza wakonkomweni nankashi hamazu aYehova, bayi hamudimu windi neyi ntemeshaku. Munjila yoyimu, mumudimu wetu wakushimwina, chatela tukeñeña netu antu atuhamekeña hela atulemeshaña, twakeñaña amuhamekeña Yehova nikulemesha Bayibolu. (1 Kor. 9:16; 2 Kor. 3:5) Kubombelahu, nsañu yitwashimwinaña yatukoleshaña. Nsañwinyi yawanikaña muwuprofwetu waYoweli yinateli kutusañumuna kulonda twikali neyena nikwikala nakuchiñeja makonu?
2. Kwiluka netu ifuku daYehova didi kwakwihi kunateli kutusañamuna kulonda twilidi?
2 “Ifuku daYehova Didi Kwakwihi.” (Yoweli 1:15): Hela chakwila awa mazu ayisonekeli dehi yaaka yakunyima, tudi mumpinji yakukuminina yakushikijewa kwanawa mazu. Kutaminaku kwayililu yamukaayi nikadiwu kushilahu nikutusawula kutwamonaña mumaluña mutwashimwinaña hiwunsahu wunakumwekesha nawu tunashiki mumafuku akukuminina akanu kaayi katama. (2 Tim. 3:1-5; 2 Pet. 3:3, 4) Kutoñojoka chikupu netu kukuma kudi kwakwihi, kunateli kutuleñela tutwamijeñaku mudimu wakushimwina muchihandilu chetu.—2 Pet. 3:11, 12.
3. Muloñadi mudimu wakushimwina chiwunekalili walema chineli hitukushika kwakwihi nalukadi lwasweja?
3 “Yehova Wakekala Wubataminu Wawantu Indi.” (Yoweli 3:16): Kukankisha kwashimunawu muniyi vasi kunateli kutalisha hohu kumpinji yikaletayi Yehova wunsompeshi hampinji yalukadi lwasweja. Chatukundejaña hakwiluka netu Yehova wakapulwisha ambuñindi ashinshika haniyi mpinji. (Chim. 7:9, 14) Hampinji yitukuzataña iwu mudimu wakushimwina nikumona Yehova chatwakamenañayi nikutukolesha, tukwikala nachikuhwelelu chakola nikuumika kukatukwasha hampinji yalukadi lwasweja lunakwinza.
4. Muloñadi chitunateli kuzañalela nikuchiñeja yuma yayiwahi yidi kumbidi chakadi woma?
4 Hela chakwila antu amakwawu amonaña mazu aYoweli nawu akuneñesha, awa mazu aleñelaña antu jaNzambi kwikala nakuchiñeja kwakuwahi kwakupuluka. (Yoweli 2:32) Dichi, twatela kuchiñeja yuma yayiwahi yidi kumbidi chakadi woma nikushimwina nsañu yayiwahi yaWanta waNzambi neyena hakulondela chikupu mazu ekala haYoweli 2:23 akwila nawu: “Tiyenu kuwaha, zañalalenu mudi Yehova Nzambi yenu.”