Imbujolenu Atuprofwetu—Mika
1. Mika watela watoñojokeleña halwihwinyi, nawa muloñadi yuma yashimwinineñayi chiyabulili kwikala yamukunkulu?
1 ‘Indi kukuma kwakanu kaayi katama kwakenza mpinjinyi?’ Kaprofwetu Mika niyena watela watoñojokeli chikupu halwihu lwolumu hampinji yashimwinineñayi mazu awunsompeshi waYehova wenjileña hawanta wawaIsarela niwaYuda. Nawa, yuma yadiña nakushimwinayi yamwekeni. Mu 740 B.C.E., mazu ahosheliyi Yehova mumafuku aMika, kutalisha hadi Samariya ashikijeweli. (Mika 1:6, 7) Chimwahitili mpinji, Yerusalema amujilumwini muchaaka cha 607 B.C.E. (Mika 3:12) Tunateli kumwimbujola ñahi Mika hampinji yitunakuchiñilila ifuku dawunsompeshi waYehova wakujilumuna?
2. Munjilanyi nawa muloñadi wutwadiwunjikilaña hampinji yitunakutalila ifuku daYehova?
2 Ikalenu Adiwunjika: Mika wasonekeli nindi: “Ami nukutala kudi Yehova; nukuchiñilila Nzambi yawamwinu wami.” (Mika 7:7) Hela chochu, Mika hashakamini hohu nakutalila kukuma kwenjileñaku. Watwalekeluhu nakudikita mudimu windi neyi kaprofwetu kaYehova. Hampinji yitunakutalila ifuku daYehova, twatela ‘kushakama ajila nikwila nyidimu yakumwakama Nzambi.’ (2 Pet. 3:11, 12) Chineli Yehova wadiwunjika wayinkaña antu mpinji yakubalumuka munyichima. (2 Pet. 3:9) Dichi, twovwahilaña mwatulejaña Bayibolu nawu twimbujoleña atuprofwetu adiwunjikili.—Yak. 5:10.
3. Muloñadi wutwatela kumulembelela Yehova kulonda yayinki spiritu yindi yajila?
3 Shindamenenu Hañovu yaYehova: Hela chakwila, Mika wadiña namudimu wakala, washindameneni hañovu jaYehova kulonda yakalakali mudimu windi chiwahi. (Mika 3:8) Dimuloña waweni Yehova chatukoleshelañayi muBayibolu nindi tumulombeña kulonda yatwinki ñovu. Wayinkaña antu azeya ñovu kulonda atweshi kukalakala nyidimu yawu yateokalatiki. (Mas. 84:5, 7; Isa. 40:28-31) Komana nenu mwamonahu dehi chumichi mumudimu wenu wajila? Komana mwamulembelelaña Yehova mpinji yejima kulonda yayinki spiritu yindi yajila?—Luka 11:13.
4. Yumanyi yayiwahi yeliliyi Mika muchihandilu chindi yitwatela kudizilaku makonu?
4 Mika walemesheli chikupu kwila mwaya muchima waNzambi muchihandilu chindi chejima. Wafuukwiluhu kwikala washinshika hela chakwila washakamineña nawantu adiña nakwila yuma yatama. Chochimu, ifuku niifuku twamonaña yuma yaleñelaña kashinshi ketu kwikala mukweseka. Dichi twatela kufuukulahu chikupu kulonda, ‘twendaña mwijina daYehova Nzambi yetu haya nyaka nanyaka.’—Mika 4:5.