Matilakiti Amaha Anasonekuwu Munjila Yayiha
1. Chitwanyi chakuzatisha mumudimu wakushimwina chanasonekuwu munjila yayiha?
1 Matilakiti atanu amaha ayidishili hakupompa kwaNkambi kwamu 2013, kwadiña namutu wakwila nawu, ‘Izu daNzambi hiChalala!’ Kubombelahu, tilakiti yaNsañu yaWanta Na. 38, yidi namutu wunakwila nawu, “Komana Afu Amba Kahanda Cheñi?” anayibombeli hamatilakiti amakwawu. Awa matilakiti ejima atanu nayimu anayisoneki munjila yayiha. Muloñadi chanayisonekeluwu munjila yayiha? Hampinji yitunakuyihana kwitala nikwitala tunateli kuzatisha ñahi chiwahi yuma yayiha yidumu?
2. Muloñadi awa matilakiti chanayisonekeluwu munjila yayiha?
2 Muloñadi Chanayisonekeluwu Munjila Yayiha?: Hakwila tuzati chachiwahi mumudimu wakushimwina kwitala nikwitala twatela kulondela iji njila jiwana jinashimunuwu: (1) Ihulenu lwihu mwiluki chinakutoñojokayi muntu kulonda mutachiki kuhanjeka. (2) Mulejenu nsañu yamuNsona. (3) Mwinkenu mwiniitala nyikanda yakutaña. (4) Mwihulenu lwihu lumwakakula hampinji yikwawu, nawa tiyañanenu kulonda mwakafuntiluku. Tilakiti yinasonekuwu munjila yayiha yikutukwashaña kulondela chiwahi iji njila jiwana.
3. Tunateli kuhana ñahi tilakiti yimu hanawa matilakiti amaha mumudimu wakushimwina?
3 Chakuyihana: (1) Hanyima yakwimusha mwiniitala, mulejenu lwihu niñakwilu yatelayi kutondahu hachipapilu chahewulu, nawa mwihulenu yashimuni chinakutoñojokayi. (2) Bakulenu tilakiti, nawa hanjekenu hamutu wunakwila nawu “Bayibolu Yahoshaña Nawu.” Neyi chinatwesheki tañenu nsona muBayibolu. Neyi mwiniitala wudi nampinji, hanjekenu hamutu wunakwila nawu “Wuloku Wumunateli Kutambwila Neyi Mukuhwelela Munichi Chikaninu.” (3) Mwinkenu tilakiti, nawa mulejenu yayitañi yejima mumpinji yindi. (4) Henohu kanda muyi, mulejenu “Lwihu Lutwatela Kutoñojokahu” ludi kunyima yatilakiti nawa tiyañanenu kulonda mukafunti nakuhanjeka hañakwilu yamuBayibolu.
4. Tunateli kuzatisha ñahi matilakiti amaha hakufuntila kudi mutu?
4 Kufuntilaku chaswayi. Tañenu nsona yinatenuwu yidi kunyima yatilakiti kulonda mwakuli lwihu lumwehwili hakukumisha kuhanjeka hampinji yimwenjili. Henohu kanda muyi, mutalishenu mwevulu wunakumwekesha buloshuwa yaNsañu Yayiwahi, mulejenu mwiniitala buloshuwa nihakudiza hadi nsañu yimunakuhanjekahu, nawa mushilenu. Neyi yatambula, tiyañanenu kulonda mwakafunti nakuhanjeka habuloshuwa. Dikwila nawu munatachiki kumudizisha muntu Bayibolu. Hela chatela mumushili buloshuwa, munateli kumushila tilakiti yikwawu nikutiyañana kulonda mwakahanjeki nindi.
5. Matilakiti atukwashaña ñahi mumudimu wetu wakushimwina?
5 Matilakiti anayizatishi mumudimu wakushimwina kubadika hadi yaaka 130. Hela chakwila ekala ashiyashana mukutoha nichayisonekawu, hichitwa chachiwahi chikupu chazatikaña mumudimu wakushimwina. Tuzatisheña chiwahi awa matilakiti anasonekuwu munjila yayiha kulonda tutwalekuhu kutiyakesha nsañu yamuBayibolu mwahita kaayi kejima.—Yish. 15:7a.