Imbujolenu Atuprofwetu—Nahumi
1. Yumanyi yitwadizañaku mumukanda waNahumi?
1 Mahembi aNineva amwekeshaña nawu neyi chochaprofweteliyi Nahumi, Yehova watendaña ayilumbu Jindi nawa hela kudi chilumbu wasweja ñovu hakutwesha kwimika mushindu naYehovaku. (Nahu. 1:2, 6) Tushinshikenu hawuprofwetu waNahumi kulonda tudiziluku yuma yinateli kutukwasha mumudimu wakushimwina.
2. Tunateli kuzañalesha ñahi antu nansañu yitwashimwinaña?
2 Yikundejenuña Kulonda Achiñejeña: Kumatachikilu, mukanda waNahumi wamwekanaña neyi wambila yakujilumuka kwaNineve, musumba weneni waAsiriya wakushankulu mwadiña antu akwakudivwimba. (Nahu. 1:1; 3:7) Hela chochu, iyi mbila yayizañalesheli nankashi antu jaYehova. Nahumi, wukweti ijina dindi dalumbuluka nawu “Nkundeji,” wayikolesheli akwawu aYudeya nindi chilumbu chawu keña yajilumuki. Nahumi wetejeli chikupu nindi Yehova “himpwembu yakudikañila muntu mwifuku dayihuñu.” (Nahu. 1:7) Neyi tunakushimwina, anetu twashimunaña nsañu yayiwahi nawa twalejaña antu kubatama mudi Yehova.—Nahu. 1:15.
3. Tunateli kumwimbujola ñahi Nahumi mukuzatisha yakutalilahu?
3 Zatishenu Yakutalilahu: Yehova wamoneneni Nahumi yesekeji kukuma kwaNineve nakwamusumba waTebesi (Nowamoni) wamuEjipitu, wakisañenuwu kunyima kudi wowu Asiriya. (Nahu. 3:8-10) Neyi tunakuhosha nawantu hansañu yakukuma kwadinu ituña datama, twatela kuhosha hawuprofwetu wamwekeshaña nawu Yehova wakoñaña mwahoshañayi mwejima. Chakutalilahu, chelili akwaBabiloni niaMediya alukuki musumba waNineve mu 632 B.C.E., nvula yeneni yenzesheli Kaloña Hidekeli, yahumwini chibalu champwembu yakola nankashi yamusumba. Hohenohu aNineve ayikwatili neyi chochahosheliyi Yehova.—Nahu. 1:8; 2:6.
4. Tunateli kuhosha ñahi chiwahi kulonda antu atiyi neyi tudi mwiha?
4 Hoshenuña Chiwahi Kulonda Antu Atiyi: Nsonekelu yaNahumi yadiña yakulumbulula nawa yachimwenu. Nsañu yahosheleñayi yahanukileña. (Nahu. 1:14; 3:1) Anetu nawa, twatela kuzatisha mazu aswayi kutiya. (1 Kor. 14:9) Halwendu lwatachi, lumbululenu chiwahi chuma chimunendeli. Chimukudizaña nawantu Bayibolu, yikwashenu amukuhweleli Yehova niIzu dindi nawa eluki nawu iyi nsañu yinakundami kudi wena hamuntu hamuntu.—Rom. 10:14.
5. Mazwinyi achikaninu itwawanaña muwuprofwetu waNahumi?
5 Chikuhwelelu cheneni chadiña naNahumi chakushikijewa kwamazu aYehova chamwekanaña chiwahi mumukanda wamuBayibolu wukweti ijina dindi. Chineli kukuma kwetuña daSatana kudi kwakwihi, mazu aNzambi achikaninu akwila nawu: “Kukaba hikwakanyamuka cheñi kamuchiyeduku” atukundejaña.—Nahu. 1:9.