Zatishenu Buloshuwa ‘yaKudiza Nsañu Yidi Mwizu daNzambi’—Hakutachika Kuhanjeka naWantu
1. Chozelwinyi chachiha chitwatambwilili chakuzatisha mwiha?
1 Bayibolu yaNew World Translation yinasonekiwu chachiha yidi nachibalu kumatachikilu chinakwila nawu “Kudiza Nsañu Yidi Mwizu daNzambi.” Mumadimi amakwawu, ichi chibalu hibuloshuwa. Tunateli kuzatisha ñahi ichi chozelu chachiha neyi tunakuloñesha chakushimwina? Chineli ichi chibalu chikweti jinsona jidi heshina dansañu yamuBayibolu neyi chochekala mukanda waUkupelulula, chinateli kutukwasha chikupu kutachika kuhanjeka nawantu.
2. Tunateli kuzatisha ñahi buloshuwa ‘yaKudiza Nsañu Yidi Mwizu daNzambi’ mwiha?
2 Munateli kuzatisha lwihu 8 nawa hoshenu nenu: “Tunakwendela antuñinetu hakapinji kantesha muloña antu amavulu ehulaña nawu, ‘Komana twatela kumwinka Nzambi muloña hamakabi itwamonaña?’ [Kumaluña amakwawu, eniimatala akeñaña kuyitalisha lwihu.] Indenu mwatoñojokaña nenudi? [Mulekenu yakuuli.] MuBayibolu mwekala ñakwilu yatiyakana.” Tañenu nsona yimu muBayibolu hajinsona jinatenuwu nawa hanjekenuhu. Neyi mwiniitala namwekeshi mpwila, mulejenu malwihu 20 anasonekuwu kumatachikilu nawa mwilenu yatonduhu lumu lumukahanjeka hakufuntila. Hela mwinkenu mukanda wudi wejima wakudizamu mudi nsañu yayivulu hamutu imunahanjekeñahu.
3. Tunateli kuzatisha ñahi buloshuwa ‘yaKudiza Nsañu Yidi Mwizu daNzambi’ hakutachika kuhanjeka nawantu abula kwikala akwaKristu?
3 Neyi munakushimwina mumaluña mwekala antu abula kwikala mukwitiya kwawakwaKristu, munateli kuzatisha lwihu 4 ni 13 nakushika ku 17. Chakutalilahu, munateli kuzatisha nsañu yidi mulwihu 17 nawa hoshenu nenu: “Tunakwendela yisaka nakuyishimwina hakapinji kantesha. Komana mukwiteja nenu yisaka yinakumona kañalaña makonu? [Mulekenu yakuli.] Antu amavulu adisumbula eluka nawu mazu akwila nawu: “Mumbanda aakamaña nfumwindi,” ayikwasha nankashi. [Bayi muhosha nenu awa mazu anafumi Aefwesesa 5:33. Ilaña neyi munakuhosha nawamumbanda, munateli kuhosha mazu adi Aefwesesa. 5:28.] Munakutoñojoka nenu kuzatisha iku kufumba kukuyikwasha mumawulu?”
4. Chumanyi chimunateli kwila neyi munamanishi kuhanjeka namuntu wabula kwikala mukwaKristu?
4 Neyi munamanishi kuhanjeka, tiyañanenu kulonda mukatwaleki kuhanjeka neyi munafuntiku. Hadaha munateli kuhanjeka nsona yikwawu yidi halwihu lumunahanjekeñahu. Mulejenu mwiniitala hampinji yatelela nenu mazu imwahanjekaña nindi afumaña muBayibolu. Mwinkenu mukanda wumuneluki nenu wukumukokola, kwesekeja nansañu yimwahanjekeleña nawa nichamonañayi Bayibolu.—Talenu chamukachi chamuMudimu Wetu waWanta waDecember 2013.