Imbujolenu Chikuhwelelu Chawu
1. Mumulungu waOctober 19 twakadizaña mukandanyi haKudiza Bayibolu haChipompelu?
1 Kutachika mumulungu waOctober 19, 2015, twakadizaña mukanda waImbujolenu Chikuhwelelu Chawu haKudiza Bayibolu haChipompelu. Iwu mukanda washimuna nsañu yashimunawu muBayibolu yawamayala niambanda 14 achikuhwelelu. Iwu mukanda awusoneka munjila yatukwashaña kufwikija awantu ashinshika netu hiyantu amweneña kukala hampinji yamuzatilileñawu Yehova. Mudi cheñi nsañu yikutukwasha hamuntu hamuntu makonu.—Heb. 6:12.
2. Lumbululenu yuma yidi mumukanda waImbujolenu Chikuhwelelu Chawu.
2 Yuma yidumu: Muniwu mukanda mudi chati yampinji nimapu yakutukwasha kwiluka mpinji niiluña kwashakamineñawu antu ashimunawu muniwu mukanda. Kubombelahu, mutupetulu twejima mudi kamutu kanakuhosha nawu, “Malwihu Akutoñojokahu . . . ,” akatukwashaña kutoñojoka chikupu hanoyu nsañu nikuzatisha yuma yitwakadizaña yakatukwasha. Mudi cheñi nyevulu yayiwahi yasandujolawu chiwahi yakutukwasha kufwikija yuma chiyadiña.
3. Twatela kwiladi kulonda twakahetelumu hitwakadizaña iwu mukanda?
3 Chimunateli Kuhetelamu: Mukanda kufuma kwiIzanvu Dalombolaña wudi kumatachikilu watukoleshaña namazu akwila nawu: “Fwikijenu yuma, toñojokenuña hansañu yimunakutaña. Esekenu kutiya neyi chatiyileñawu antu atenawu muBayibolu, nikumona yuma yamwenuwu. Esekejenu cheliluwu hayuma yamwenuwu nichimwadi kwila.” Hela chochu, hichinayi mukwila nawu twatela kuboka hakufwikijaku, ilaña twatela kutoñojoka chahosha nsañu yonenawu nikwiluka antu ashimunawu. Hakwila twili mwenimu, twatela kwikala nampinji nikutoñojoka hayuma yimunakufwikija. (Nehe. 8:8) Neyi kudiza kunatachikili mukachi kakapetulu, mukwakulombola wukahitulukaña hadi masekondi 30 hela 60 munsañu yitwadizili. Watela kwihula lwihu lumu hela ayedi hakukunkulula kudiza neyi mwosi kamutu kakuhosha nawu, “Malwihu Akutoñojokahu . . . ”
4. Muloñadi wutwatela kudizila mukanda waImbujolenu Chikuhwelelu Chawu?
4 Tunakushakama mukaayi kafwilaña kuzeyesha chikuhwelelu chetu munjila jashiyashana ifuku niifuku. Iwu mukanda kushilahu niKaposhi Kakutalila hiwashindamena, hichawana chatwinkayi Yehova kulonda tukoleshi chikuhwelelu chetu. (Yak. 1:17) Dichi tukawuzatisheña chiwahi kuhitila mukuwanika kuKudiza Bayibolu haChipompelu mpinji yejima nikwakulahu nankashi hampinji yitukadizaña iwu mukanda.