Imbujolenu Atuprofwetu—Habakuki
1. Muloñadi nshakaminu yetu chiyinesekeni nayakaprofwetu Habakuki?
1 Chitunakumona yuma yatama yinakuvulilaku mukanu kaayi, tunateli kutiya neyi chatiyiliyi Habakuki, wamwihwili Yehova nindi: ‘Wanmwekeshelañadi kuluwa? Wantalishilañadi yuma yakala?’ (Hab. 1:3; 2 Tim. 3:1, 13) Neyi tukutoñojokaña hamazu akaprofwetu Habakuki niyuma yayiwahi yakoñeliyi chikukutukwasha kwikala akola hampinji yitunakuhembelela ifuku daYehova dakusompesha.—2 Pet. 3:7.
2. Tunateli kumwekesha ñahi netu tukweti chikuhwelelu makonu?
2 Ikalenu Ashinshika: Chatela yazeyi nayuma yatama yamweneñayi, Habakuki wadiña wasoñama nawa wakola kuspiritu. (Hab. 2:1) Yehova wamukanini kaprofwetu nindi Mazwindi akashikijewa hampinji yatelela nawa “mukwakuloña wakahandila kukwitiya kwindi.” (Hab. 2:2-4) AkwaKristu anakushakama munanu mafuku akukuminina anateli kudizilaku chumanyi kuniyi nsañu? Chuma chalema bayi neyi hikwiluka hohu nawu kukuma kudi mukamwihuku, chiña kukuhwelela chikupu netu kukuma kwakenza. Chikuhwelelu chatukwashaña kwikala atona nakutwamijaku mudimu wakushimwina.—Heb. 10:38, 39.
3. Muloñadi chitukutwalekelahu kwikala namuzañalu hakumukalakela Yehova?
3 Luñilenu mudi Yehova: Gogi waMagogi chakalukukayi antu jaYehova, chikuhwelelu chetu chakekala mukweseka. (Ezek. 38:2, 10-12) Wufwinda waletaña yihuñu nikudi antu anashindi. Yakudya yakalaña, yuma yakisikaña nawa chihandilu chatamaña. Tunateli kwila ñahi neyi kukala kwamuchidiwu kunamwekani? Habakuki welukili nindi wakamona yihuñu, dichi watwalekeluhu kumuzatila Yehova namuzañalu. (Hab. 3:16-19) “Muzañalu waYehova” wukatukwasha kuumika lukadi lunakwinza kumbidi.—Nehe. 8:10; Heb. 12:2.
4. Muzañalwinyi wutunateli kwikala nawu makonu nikumbidi?
4 Antu akapulwishayi Yehova hefuku dindi dakusompesha akatwalekahu kuyidizisha chakushakama kwesekeja nachakeñañayi Nzambi. (Hab. 2:14) Antu akasañulawu niwena akamwiluka Yehova. Chayinu mpinji, tutwalekenuhu kuzatisha mpinji yitukweti kulonda tuleji antu nyidimu yaYehova yayiwahi.—Mas. 34:1; 71:17.