Nleñi Yetu Watwakamenaña

1. NLEÑI YETU WATUNTWISHAÑA ITENA

Fwikijenu chihandilu chichadi kwikala neyi itena kwadiña kwosi! Kwitena kwafumaña ñovu yakwashaña nyitondu kusapuka mafu, kukenuka nkenu, kusoña nyikabu, yisakola ninyisoka yayu. Dakwashaña cheñi nyiji yanyitondu kukoka menji heseki nakuyitwala kumafu nawa kufumahu menji ayaña mwiwulu.

Mwevulu wakukopela hewulu wunakumwekesha iha datii didi kumpidi.

2. NLEÑI YETU WANOKESHAÑA NVULA

Nvula hichawaana chatwinkayi Nzambi chakwashaña iseki kwidisha yakuda yitwadaña. Nzambi watwinkaña nvula niyilaaka yasoñelañamu yakuda, watwikutishaña nikwinzesha nyichima yetu namuzañalu.

Kada kanatuntami hakamutayi, kanakukeña kubakila nkabu wunakuholoka.

3. NLEÑI YETU WATWINKAÑA YAKUDA NIYAKUVWALA

Anvwali amavulu akamenaña chinateli kuwanawu yakuda niyakuvwala yakukwasha nachu chisaka chawu. Talenu chahosha Nsona nawu: “Shinshikenu chiwahi atuda amuluzwizu; hiyakuwaña mbutu hela kumuna hela kusha munkalañaku, ilaña Tata yenu wekala mwiwulu wayidiishaña. Komana enu himwayibadika kulemaku?”—Matewu 6:25, 26.

“Dizilenu kunkenu yamwisaña chiyakulaña . . . ; Ilaña inakuyileja nami hela tuhu [Mwanta]Solomoni muchiyuulu chindi chejima, havwalilihu yakuvwala yidi neyi iyi nkenu hela yimuku. Neyi Nzambi wavwikaña yuma yamenaña mwisaña muniyi njila . . . , komana wukukañanya kuyivwika enu chakubadikahu?”—Matewu 6:28-30.

Chineli Nzambi nateli kutwinka yakuda niyakuvwala, mwalala nateli kutukwasha kuwana yuma yikwawu yakeñekaña muchihandilu. Neyi twilaña nkeñelu yaNzambi, wukutukiswilaña neyi tudima yakuda yetu nawa nateli kutukwasha kuwana mudimu wukutukwasha kwikala namali akulanda yuma yitunakukeña.—Matewu 6:32, 33.

Mwalala tukweti yuma yayivulu yikutuletesha tumukeña Nzambi, neyi tutoñojoka hayuma yidi neyi itena, nvula, atuda ninkenu. Chibaaba chinalondelihu chikushimuna chahanjekeleñayi Nzambi nawantu.