Keñenu Mudimu Wakushimwina Nsañu Yayiwahi

Komana chayikalilahu dehi kushimwina? Etu amavulu tunateli kwiteja. Muloñadi? Hadaha antu mwiluña detu atusekeshaña hela kutukabisha hela twachinaña kuhosha nawantu itwabula kwiluka. Mwamweni, yumiyi yinateli kutuzeyesha. Ilaña, twadifukulaña kudi Nzambi wamuzañalu wakeñaña nindi tumukalakeleña namuzañalu. (Ms 100:2; 1 Ti 1:11) Yumanyi yisatu yikutuleñela kukeña mudimu wakushimwina?

Chatachi, twashimwinaña nsañu yakuchiñeja. Hela chakwila chilwilu chakuchiñeja chinakehi makonu, tunateli kuyileja antu “nsañu yayiwahi yayuma yayiwahi” kulonda achiñejeña. (Isa 52:7) Nawa nsañu yayiwahi yaWanta waNzambi yinateli kutukwasha kwikala namuzañalu. Henohu kanda muyi nakushimwina, toñojokenu hankisu yikaleta Wanta waNzambi hamaseki.

Chamuchiyedi, nsañu yayiwahi yitwashimwinaña yakwashaña antu kumujimba nikuspiritu. Alekaña yilwilu yatama nawa atalilaña kwikala nawumi wahaya nyaaka. (Isa 48:17, 18; Rom 1:16) Toñojokenu chitwazataña iwu mudimu wakukeñakeña nikupulwisha antu. Hela chakwila antu amakwawu akeñaña wanyi kuyipulwisha, twatwalekañahu kukeña antu anakukeña kupuluka.—Mat 10:11-14.

Chamuchisatu, nawa chalema nankashi, mudimu wetu wakushimwina wamulemeshaña Yehova. Walemesha chikupu mudimu wetu wakushimwina. (Isa 43:10; Heb 6:10) Cheñi, watwinkaña spiritu yindi yajila kulonda tuzati iwu mudimu. Dichi, mulombenu Yehova yayinki muzañalu chilwilu chaspiritu yajila. (Ñal 5:22) Nawukwashi windi, tukuleka kwakama nawa tukushimwinaña nakuhamuka. (Yil 4:31) Dichi, hela antu anakwiteja wanyi, twatela kukeña mudimu wetu wakushimwina.—Eze 3:3.

TALENU VIDIYO YAIKALENU CHEÑI NAMUZAÑALU KUHITILA MUKUDIZA NIKUTOÑOJOKAHU, KUHIÑAHU AKULENU AWA MALWILU:

• Muloñadi chitwatela kusha muchima kukudiza, hela chakwila tunakushimwina maora amavulu kakweji nikakweji?

• Munjilanyi mutwatela kumwimbujola Mary?

• Mpinjinyi yimwatoñojokaña chikupu Hezu daNzambi?

• Yumanyi yayitiyishaña kuwaha neyi munakushimwina nsañu yayiwahi?