Chakumukeña Nzambi niAntuñi Netu

Hela chakwila akwaKristu hiyalondelaña nshimbi jaMosiku, haniji nshimbi hekala jiyedi jabadika jahosha hakumukeña Nzambi niakwetu nawa jalumbulula chakeñañayi Yehova nindi twileña. (Mat 22:37-39) Bayi neyi kukeña hichuma chinateli kutwinkawuku. Ilaña hakwila nawu twikali naku, twatela kuzata nañovu. Chumanyi chikutukwasha? Chuma chalema hikutaña Bayibolu mpinji yejima. Neyi tushinshika yilwilu yaNzambi yashiyashana yashimunawu muNsona, tukumona “Yehova chawahayi.” (Ms 27:4) Chikufumamu, tukumukeña chikupu nawa tukutoñojokaña neyi chatoñojokañayi. Nkumininaku, tukwovwahilaña nshimbi jaNzambi nikukeña akwetu chakufuma hamuchima. (Ywn 13:34, 35; 1 Yo 5:3) Talenu njila jisatu jikuyikwasha hakudiza Bayibolu.

• Fwikijenuña nikutoñojokahu. Difwikijenu diku mudi. Yumanyi yimukumona, kutiya nawa kunakutiyakana ñahi? Antu anashimuniwu atiyileña ñahi?

  

• Zatishenu njila jashiyashana. Chimwatela kwila: Tañenu nezu datiyakana hela londelenuñamu hampinji yimunakutiyilila kumazu akukwata. Tañenu nsañu yamuntu wumu ashimunawu muBayibolu hela hamutu wansañu chatela mutañi tupetulu twejima mundonda. Chakutalilahu, tañenu chibalu 4 hela 16 chaMukanda Wakutukwasha Kudiza Izu daNzambi kulonda mutañi nsañu yahosha hadi Yesu. Tañenu kapetulu kejima munafumi nsona yefuku. Tañenu nyikanda yamuBayibolu mundonda kwesekeja nachayisonekeliwu.

  

• Tañenu nakwiluka munatalishi nsañu. Chikuwaha kutaña kapetulu kamu hefuku nakwiluka mutalishi nsañu nikutoñojokahu chikupu kubadika kutaña tupetulu twatuvulu. Toñojokenu chadiña yuma. Shinshikenu yikuma yidimu. Zatishenu mapu ninsona jinakuhosha hanoyu nsañu. Sandujolenu chikuma chimunabuli kutiyisha. Neyi chinatwesheki, ikalenu nampinji yeneni yakutoñojokahu chikupu neyi chimunateli kushimbula hakutaña.