Zatishenuña Luñenu naWumi Haya Nyaaka! muMudimu Wakushimwina

Tudi namuzañalu hakwikala nabroshuwa yayiha nimukanda wakulombwelamu atudizi aBayibolu. Tunakulomba kudi Yehova netu yatukiswila kulonda tuzateña nañovu hakwilisha atumbanji amavulu. (Mat 28:18-20; 1Ko 3:6-9) Twazatishaña ñahi iyi yozelu yayiha?

Chineli mukanda waLuñenu naWumi Haya Nyaaka!, kudiza Bayibolu nakuhanjeka, wunashimuni njila yayiha yakudizishilamu, londelenu iji njila hampinji yimunakuloñesha nikulombola atudizi aBayibolu.a

• Tañenu nsañu nawa hanjekenu hamalwihu

• Tañenu nsona yinasonekiwu nawu “tañenu” nawa mukwashenu kadizi yeluki chakuyizatisha

• Vumishenu nikuhanjeka hamavidiyo nawa zatishenu malwihu anayiloñesheliwu

• Manishenuña kudiza hikudiza neyi munakudiza namuntu

Mumudimu wakushimwina hanenuña ntahi broshuwa kulonda mwiluki neyi muntu wudi nampwila. (Talenu chikasha chinakwila nawu “Chakuhana broshuwa yaLuñenu naWumi Haya Nyaaka! haLwendu Lwatachi.”) Neyi munamanishi kudiza nindi mubroshuwa nawa kadizi nakukeña kutwalekahu kudiza, mwinkenu mukanda nawa tachikenu nakudiza 04. Neyi mwatachika dehi kudiza namuntu mumukanda waKutudizisha hela mumukanda waKushakama muKukeña kwaNzambi, tuntulukilenu mumukanda waLuñenu naWumi Haya Nyaaka! nawa monenu himwatela kutachikila.

TALENU VIDIYO YA CHINAWAHI CHIMUNAWANI MPINJI YAKUDIZA BAYIBOLU, NAWA AKULENU AWA MALWIHU:

• Yumanyi yikudizawu atudizi mumukanda wawuha?

• Muloñadi chimwatela kutalishila atudizi amaha iyi vidiyo?

• Yikonkwanyinyi yimwatela kutwalekahu kumukolesha kadizi kwimika nikwilamu?—Talenu chikasha chinakwila nawu “Nsañu Yinakuhoshawu niYikonkwanyi yidi Munichi Chibalu”