Yuma Yitunateli Kudizila Kudi Samweli

Samweli wadiña washinshika kudi Yehova muchihandilu chindi chejima. Hadiñayi kansi, wakaanini kumuluwañesha neyi cheliliwu anyana kaEli, aHofwini naFwinehasi. (1 Sa 2:22-26) Samweli watwalekelihu kukula nawa Yehova wadiña nayena. (1 Sa 3:19) Watwalekelihu kumukalakela Yehova nimuwukulumpi hela chakwila anyanindi hiyamukalakeleleña Yehova nakashinshiku.—1 Sa 8:1-5.

Chuma cheliliyi Samweli chinakutudizishadi? Neyi wudi kansi, ilukaku chikupu neyi Yehova weluka kukala kuwamonaña nichiwatiyaña. Nateli kukukwasha kwikala wahamuka. (Isa 41:10, 13) Neyi mudi anvwali akweti mwana wunaleki kumukalakela Yehova, munateli kukundejewa neyi mwiluka nenu Samweli hakanjikijili anyanindi awamayala akula dehi kwovwahila nshimbi yaYehovaku. Samweli washili kukala kwejima mumakasa aYehova nawa watwalekelihu kwikala washinshika nikumutiyisha kuwaha Tata yindi wamwiwulu. Hadaha yilwilu yenu yayiwahi yinateli kumukwasha mwanenu kufunta kudi Yehova.

TALENU VIDIYO YA DIZILENU KUDI WENA​—SAMWELI, NAWA AKULENU AWA MALWIHU:

• 

  Samweli wamwekesheli ñahi kuhamuka hadiñayi kansi?

• 

  Danny wamwekesha ñahi kuhamuka?

• 

  Yumanyi yayiwahi yeliliyi Samweli muwukulumpi windi?

• 

  Anvwali jaDanny amwekesha ñahi chakutalilahu chachiwahi?