Muloñadi Nzambi Chabulilañayi Kwakula Kulomba Kwejima?
Tata yetu wamwiwulu, Yehova Nzambi, watiyaña kuwaha kutiya kulomba kwetu. Ilaña kudi yuma yaleteshaña yabuleña kwakula kulomba kukwawu. Hiyumanyi yeniyi nawa yumanyi yitwatela kwanukaña neyi tunakulomba? Talenu iyi yuma yashimunawu muBayibolu.
“Neyi hiwukulomba, bayi wufuntisha-funtishahu mazu wowamu.”—Matewu 6:7.
Yehova hakeñaña nindi tuhosheña mazu wowamu itwahembela kumutu hakulomba hela kutaña kulomba kwasonekawu mumukandaku. Ilaña wakeñaña nindi tulombeña mumazu etu. Fwikijenu chimunateli kutiya kumuchima neyi ibwambu denu yayilejaña mazu wowamu ifuku dejima. Ebwambu namuntu akasunuka kuhanjeka nsañu yidi yejima. Ninetu neyi tulombaña mumazu etu kudi Tata yetu wamwiwulu chamwekeshaña nawu hibwambu detu.
“Neyi mulomba, himwatambwilañaku, muloña mwalombaña yumiyi nankeñelu yakuyizatisha munjila yatama.”—Yakoba 4:3.
Tuneluki netu neyi tulomba yuma yabula kukeñayi Nzambi nindi tuyileña hela kwikala nayu wukwakula kulomba kwetu wanyi. Chakutalilahu, neyi muntu wahemaña yisela yakudibecha nawa hakumulomba Nzambi nindi yamukwashi kuda mali henohu Yehova wahela lwisu, komana wukwakula iku kulomba? (Isaya 65:11; Luka 12:15) Yehova kwila yaakula kulomba kwamuchidiwu nehi. Hakwila Nzambi yaakuli kulomba kwetu, yuma yitunakulomba yatela kwesekana nayuma yatulejañayi muBayibolu.
“Muntu wukubañujola matu indi kulonda abuli kutiya nshimbi muntu wudi ochu hela kulomba kwindi kukwikala chishimashima.”—Yishimu 28:9.
Kunyima, Nzambi wakwileña wanyi kulomba kwawantu abulileña kwovwahila nshimbi jindi. (Isaya 1:15, 16) Nichayinu mpinji wahimpa wanyi. (Malaki 3:6) Neyi tunakukeña Nzambi yaakuleña kulomba kwetu, twatela kuzata nañovu kulonda twovwahileña nshimbi jindi. Indi neyi kunyima twakoñelihu yuma yatama? Komana Yehova wukutiya kulomba kwetu wanyi? Inehi mwani! Nzambi wukutwanakena neyi tuhimpa yilwilu yetu nawa tuzata nañovu kulonda tumuzañalesheña.—Yilwilu 3:19.