Munateli Kulomba Ñahi Hakwila Kulomba Kwenu Akwitiyi?
Yehova Nzambi “watiyaña mwalombañawu antu.” (Masamu 65:2) Tunateli kuhosha nindi kwejima kutudi, mpinji yidi yejima, nezu datiyakana hela mumuchima. Yehova nakukeña nindi tumuteneña netu “Tata,” nawa hiTata yetu watukeña chikupu. (Matewu 6:9) Yehova watukeña nawa watulejaña chitwatela kulomba kulonda yatutiyi.
LOMBENUÑA KUDI YEHOVA NZAMBI KUHITILA MWIJINA DAYESU
“Neyi mumulomba Tata chuma, wakayinkachu kuhitila mwijina dami.”—Yowanu 16:23.
Mazu aYesu amwekeshaña chikupu nawu Yehova wakeñaña tulombeña kudi yena kuhitila mwijina daYesu Kristu, bayi kuzatisha ankishi, akwakujila afwa dehi, añelu hela ankakululaku. Neyi tulomba kudi Nzambi kuhitila mwijina daYesu, tukumwekesha netu twalemesha yuma yatwililayi Yesu. Yesu wahosheli nindi: “Kwosi muntu wunateli kwinza kudi Tata chakadi kuhitila mudi amiku.”—Yowanu 14:6.
LOMBENUÑA CHAKUFUMA HAMUCHIMA
“Ichilenu nyichima yenu kumesu indi.”—Masamu 62:8.
Neyi tunakulomba kudi Yehova twatela kuhosha neyi chitwahoshaña nawanvwali. Chatela tutañeña mazu akusoneka dehi mumukanda, hela mazu itwahembela kumutu, twatela kuhosha nindi nakalemesha nawa chakufuma hamuchima.
LOMBENUÑA KWESEKEJA NAYUMA YAKEÑAÑAYI
“Chuma chejima chitunateli kumulomba kwesekeja namwaya nkeñelu yindi, yena watutiyaña.”—1 Yowanu 5:14.
Yehova Nzambi, watuleja muBayibolu yuma yikatwililayi niyuma yinakukeñayi nindi twileña. Hakwila kulomba kwetu akwitiyi kudi Nzambi twatela kulomba “kwesekeja namwaya nkeñelu yindi.” Dichi twatela kudizaña Bayibolu kulonda tumwiluki chikupu. Neyi twilaña mwenimu wukwakula kulomba kwetu.
YUMANYI YITWATELA KULOMBA?
Lombenu Yuma Yimunakukeña. Tunateli kulomba kudi Nzambi yuma yitunakukeña yidi neyi y2akuda, yakuvwala nimwakukaama. Twatela cheñi kulomba maana akutukwasha kufuukula chachiwahi niñovu yikutukwasha kuumika kukala. Tunateli cheñi kumulomba Nzambi yatwinki chikuhwelelu, yatwanakeni nikutukwasha.—Luka 11:3, 4, 13; Yakoba 1:5, 17.
Lombelenuñaku Akwenu. Anvwali atiyaña kuwaha neyi anyanawu adikeña wumu namukwawu. NiYehova niyena wakeñaña nindi anyanindi heseki adikeñi wumu namukwawu. Chalema nankashi kulombelaku enikwetu, anyanetu chisaka chetu, niamabwambu jetu. Kambanji Yakoba wasonekeli nindi: ‘Dilombelenuñaku wumu namukwawu.’—Yakoba 5:16.
Musakililenuña Nzambi. Bayibolu yahosha nawu Nleñi yetu, “Wakoñeli yuma yayiwahi nawa wayinkeli nvula niyilaaka yasoñelañamu yakuda nakuyikutisha enu nikwinzesha nyichima yenu namuzañalu.” (Yilwilu 14:17) Neyi tutoñojoka hayuma yejima yatwililañayi Nzambi, chikuletesha kumusakililaña mukulomba. Twamwekeshaña cheñi netu twamusakililaña Nzambi neyi tumwovwahilaña.—Akolosi 3:15.
IKALENU ADIWUNJIKA NAWA LOMBENUÑA
Mpinji yikwawu tunateli kuneña muloña wakwila kulomba kwetu anakwakuli swayi wanyi. Komana twatela kuhosha netu Nzambi watwakamenaña wanyi? Inehi! Talenu nsañu yinakumwekesha nawu twatela hohu kutwalekahu kulomba.
Steve, washimunawu muchibaaba chakusambila wahosheli nindi: “Neyi nalombeleña wanyi chiña nidi namuzañalu wanyi.” Chumanyi chamukwashili? Watachikili kudiza Bayibolu nawa welukili nindi kulomba mpinji yejima kwalema. Wahosheli nindi: “Namusakililaña Nzambi muloña wazatishaña amabwambu jami kulonda yankwashi. Ichi nidi namuzañalu chikupu.”
Indi Jenny, wamweneña nindi Nzambi kwila yaakula kulomba kwindi nehi muloña washikilamu wanyi? Wahosheli nindi: “Chinatachika kutoñojoka mwenimu namulombaña Nzambi kulonda yankwashi kwiluka chaleteshaña.” Chumanyi chinafumimu? Nindi: “Kuhosha naNzambi kunankwashi kuhimpa yitoñojoka yami nikwiluka nami hela nadimweneña nami nashikilamu wanyi, yena dichammonañayi wanyi. Chinankwashi muchihandilu chami.” Wahosheli cheñi nindi: “Kulomba kunankwashi kumumona Yehova neyi himuntu, wankeña, wañakamenaña, Tata yami nawa ibwambu dami, wukunkwashaña mpinji yejima chakala hohu nitwalekahu kwila yuma yakeñañayi.”
Isabel wahosheli nindi: “Neyi nimona mwanami Gerard nakudiluñisha hela chakwila hichifwayi, namonaña nami waakwili kulomba kwami.”
Talenu cheñi chuma chamumwekeneni Isabel. Chabaabiliyi ivumu, andotolu amulejeli nawu mwanindi wakekala chifwayi. Waneñeli chikupu. Antu amakwawu atachiki kumuleja nawu yafumishi ivumu. Wahosheli nindi: “Namweni nami nukufwa nachineñi.” Welilidi? Nindi: “Namulombeli Nzambi nami yankwashi.” Chimwahitili mpinji wavweli mwana weyala wejima daGerard, nawa wadiña chifwayi. Komana Isabel wamonaña nindi Yehova wakwili kulomba kwindi? Eña, dichamonañayi! Munjilanyi? Wahosheli nindi: “Neyi nimona mwanami, ichi wudi nayaaka 14, nakudiluñisha hela chakwila hichifwayi, namonaña nami Nzambi waakwili kulomba kwami, hinkisu yanyinkayi Yehova Nzambi.”
Mazu amuchidiwu atuleteshaña kutoñojoka hamazu ahosheliyi ñimbi yamasamu nindi: “Eyi Yehova, wunatiyi mwakeñawu antu adizoza; eyi wukuloñesha nyichima yawu, wukushaku itu deyi ditiyi.” (Masamu 10:17) Mwamweni, twatela kulombaña mpinji yejima!
MuBayibolu mwekala kulomba kwaYesu kwakuvulu. Kulomba kwalejeliyi atumbanji twindi diku kwelukawu antu amavulu. Tukudizilaku kwodi kuniku kulomba?