Kulomba Kunateli Kuyikwasha
Pamela chakatiliyi kansa, wayili kudi andotolu nakumuuka. Hela chochu, walombeli cheñi kudi Nzambi kulonda yamwinki ñovu yakuumika. Komana kulomba kwamukwashili?
Pamela wahosheli nindi: “Natiyili woma chikupu hampinji yañukileñawu, ilaña chinalombeli kudi Nzambi muchima wawundili, nawa nalekeli kutiya woma. Hela chochu, chikatu chami chamana wanyi, ilaña kulomba kwankwashaña kwikala namuzañalu. Neyi antu añihula chinnakutiya nayilejaña nami, ‘nichidi nakata ilaña nidi namuzañalu!’”
Kafwampi, hitwatela hohu kulombaña hampinji yitunamoni kukalaku. Wejima wetu twamonaña kukala kwamaneni nikwanyanya, nawa kakavulu twakeñaña muntu wakutukwasha. Komana kulomba kunateli kutukwasha?
Bayibolu yahosha nawu: “Umbilaku chiteli cheyi hadi Yehova, yena wukukukwashaku; hamba kamwiteja mukwakuloña kukosomokaku.” (Masamu 55:22) Awa mazu amawahi hama! Kulomba kunateli kuyikwasha ñahi? Neyi mulomba kudi Nzambi munjila yayiwahi, wukuyikwasha kumanisha hela kuumika kukala kumukweti.—Talenu chikasha chinakuhosha nawu “Chinateli Kuyikwasha Kulomba.”