Komana Kwikala Chachiwahi naWantu Kunateli Kukiña Mbidi Yenu?
Hadi yaaka yayivulu yinahitihu, antu amavulu anatoñojoki nawu kwikala chachiwahi nawantu dikunateli kuyikwasha kwikala nambidi yayiwahi. Chakutalilahu, antu akumusela waAsia alemesheli yuma yatañishileñayi Confucius (wadiñaku mu 551-479 B.C.E.) wahosheli nindi: “Yuma yiwukukeña akwenu neyi abuli kukwililayu nineyi bayi wuyililayuku.”a
CHUMA CHELAÑAWU ANTU AMAVULU
Antu amavulu achidi kutoñojoka nawu neyi wikala chachiwahi nawantu chinateli kukukwasha kwikala nambidi yayiwahi. Ekalaña nakavumbi, kwikala nayilwilu yayiwahi, eluka mudimu wukwetiwu muchituñilu nikwikala nachinleji chitooka. Linh mumbanda wakuVietnam wahosheli nindi: “Mpinji yejima nakuhweleleli nami, neyi nikala washinshika hela nikala chiwahi nawantu akankiswila.”
Amakwawu elaña yuma yayiwahi muloña wayuma yakuhwelelawu mukwitiya kwawu. Hsu-Yun iyala washakamaña kuTaiwan, wahosheli nindi: “Anlejeli nawu neyi muntu welaña yuma yayiwahi hachidiyi wamumi wakekala namuzañalu neyi nafwi ilaña neyi welaña yuma yatama wakakabakanaña.”
YUMANYI YAFUMAMU?
Dimu tuhu neyi tunakuyilila akwetu yuma yayiwahi twekalaña namuzañalu. Hela chochu, antu amavulu elilaña akwawu yuma yayiwahi, enzaña nakwiluka nawu antu ayilaña katama. Shiu Ping mumbanda washakamaña kuHong Kong, wahosheli nindi: “Nadimweneni namesu kapu nami antu elilaña akwawu yuma yayiwahi wena hiyayililaña kakawahiku. Nazatili hakumina ñovu jami kukwasha chisaka chami nikwila yuma yayiwahi. Ilaña wulu wami wamanini nawa nfumwami wanshiyili ami nimwanami.”
Antu amavulu anenzi nakwiluka nawu bayi neyi antu ejima ekala mukwitiya hiyantu amawahiku. Etsuko mumbanda wakuJapan wahosheli nindi: “Nadiña mukwitiya kumu nawa nekalili mukulumpi walombweleña izanvu dawatwansi. Nahayamini hakumona antu amuchechi adiña nayilwilu yatama, afwilileña yifulu, adiña ashinshika wanyi nawa azatishileña mali achechi chatama.”
“Nazatili hakumina ñovu jami kukwasha chisaka chami nikwila yuma yayiwahi. Ilaña wulu wami wamanini nawa nfumwami wanshili ami nimwanami.”—SHIU PING, HONG KONG
Antu amakwawu adiñija nankashi munsañu jakwitiya nawa afwilaña kwila yuma yayiwahi, atoñojokaña nawu ñovu jawu jayaña mumenji neyi amona yuma yatama yinakuyimwekena. Dichuma chamumwekeneni Van mumbanda wakuVietnam. Wahosheli nindi: “Ifuku niifuku naleteleña nyikaabu, nkenu niyakuda nakuyilambula ankakulula afwa dehi, nakukuhwelela nami kumbidi nakatambwila nkisu. Hela chakwila nazatili nyidimu yayiwahi nikuhana nyilambu muchechi hadi yaaka yayivulu, nfumwami wakatili nankashi. Nkumininaku, mwanami wamumbanda wafwili nawansi windi hampinji yatañilileñayi kwituña dacheñi.”
Neyi kwikala chachiwahi nawantu hidichuma chinateli kukiña mbidi yamuntuku, hanu dimu chumanyi chinateli kukiña mbidi yamuntu? Hakwila twakuli ilu lwihu, twatela kwikala nachuma munakufuma nsañu yalala yinateli kwakula malwihu etu nawa yikutuleja chitunateli kwikala nambidi yakiñewa. Kudihi kutunateli kuwana chumichi?
a Neyi munakukeña kwiluka yuma yikwawu yahosheliyi Confucian, talenu kapetulu 7 maparagilafu 31-35, mumukanda wunakwila nawu Mankind’s Search for God, wasonekeliwu kudi aYinsahu jaYehova wudi ha www.jw.org.