Muloñadi Kuhelaña Chikunatwalekelihu?

Muloñadi kuhelañana chikunaswejeli mukaayi? Hakwila twiluki chuma chinaleteshi kuhelañana kusweji, twatela kwiluka kuhelañana, chaleteshaña antu kudihela nichikwatandaña.

Kuhelañana hiChumanyi?

Kuhelañana hikumutiya muntu hela izanvu dawantu kutama chikupu. Hikumutiya mukwenu kumuchima bwi-i bayi hakapinji kantesha hohuku.

CHALETESHAÑA ANTU KUDIHELA

Kudi yuma yayivulu yaleteshaña antu atachiki kudihela. Kakavulu antu ahelaña akwawu, bayi neyi hamuloña wayuma yelañawuku, ilaña muloña wanochu chekalawu. Antu ahelawu ayimonaña nawu atama, ambanji anateli kukatishana, hela hiyakahimpaku. Ayimonaña nawu amukunkulwayi, anateli kuleta kukala. Antu ahelaña akwawu hiyantu elawu dehi chatama hela yuma yatama yaletesheli atachiki kuhelañana.

CHIKWATANDAÑA

Muntu nateli kuhela antu acheñi hela chakwila kanda ayimoneñahu dehi. Chakutalilahu, muntu nateli kuhelañana chakadi kwiluka neyi chakwila antu alemeshayi hela adikundayi nawu ahela owu antu. Dichi neyi amu muchituñilu ahela antu amakwawu dikwila nawu ejima akutachika kuyihela.

Neyi twiluka kuhelañana chikwekala, chikutukwasha kwiluka antu amavulu chahelelawu akwawu. Hela chochu, hakwila kuhelañana kudi mukaayi kumani, twatela kwiluka kwafuma kuhelañana. Bayibolu yashimuna kwafuma kuhelañana.

BAYIBOLU YASHIMUNA KWAFUMA KUHELAÑANA

Dayagilamu yidi nayinjikijilu yinakunyeñumuka, nakumwekesha kuhelañana chikunatwalekihu. 1. Nsañu yakutwamba, ikakeja dawantu, antu adi haintaneti, nikutala nikutaña nyuzi. 2. Kubula kwiluka chisemwa, ikowa, hela kwitiya. 3. Kutiya woma kuhimpa, kujimbesha hela yuma yinabuliku. 4. Kuhelaña, munabombeli chaambu, kudiwula antu amakwawu nimadombu.

KUHELAÑANA KWATAMA ANTU DIWU AKUTACHIKILI WANYI. Kwatachikili hampinji yelili kañelu wumu mwiwulu, wekalili Satana Diyabolu, adikañi naNzambi. Diyabolu “wadiña mukakujaha antu kufuma hatachikiliyi” kudikaña. Chineli “hisakutwamba nawa diyi tata yakutwamba,” natwalekihu kuleta kuhelañana nikuzuwa. (Yowanu 8:44; 1 Yowanu 3:11, 12) Bayibolu yamulumbulula nawu sakutwamba, nazuwi nawa nahili chikupu.—Yoba 2:7; Chimwekeshu 12:9, 12, 17.

CHASWAYI KUDI ANTU ABULA KUWANINA KUHELAÑANA. Muntu wakusambila, Adama, niyena wavulumwini neyi Satana. Chafumamu antu ejima aswana nshidi nikubula kuwanina. (ARoma 5:12) Wedi waAdama, Kena, wamuheleli nikumujaha manakwindi Abeli. (1 Yowanu 3:12) Dimu, antu amavulu amwekeshaña kukeña niwushona. Ilaña muloña wanshidi yaswanawu, antu amavulu adikeña aweni, akweti lwisu nawa adivwimba, yilwilu yaleteshaña kuhelañana.—2 Timotewu 3:1-5.

MUNTU WABULA KUKEÑA ANTU AMBUKAKU NAYENA WAYIHELAÑA. Kaayi kitwashakamañamu katandishaña kuhelañana kuhitila mukumwekesha yilwilu yidi neyi kubula luwi niyilwilu yikwawu yatama. Yuma yidi neyi kwikala nayitoñojoka yambukaku, chaambu, nhoshelu yatama, kukabishana nikukisañana yuma yinatwalekihu muloña “kaayi kejima kadi mumakasa awatama,” Satana Diyabolu.—1 Yowanu 5:19.

Hela chochu, Bayibolu hiyashimuna kwatachikila kuhelañana hohuku. Ilaña yashimuna nichakumanisha kuhelañana.