Maana Atukwashaña Mafuku Ejima

1. Muloñadi wonsu wetu chitwatela kwikalila namaana afumaña kudi Nzambi? (Yishimu 4:7)

NEYI mwafuukwileñahu chuma chalema, chakadi nikujina mwalombeli maana, mwelili hohu chiwahi. (Yak. 1:5) Mwanta Solomoni wasonekeli nindi: “Maana hichuma chasweja kulema.” (Tañenu Yishimu 4:7.) Hela chochu, Solomoni hahosheleña hamaana adi ejimaku. Wateneneña maana afumaña kudi Yehova Nzambi. (Yish. 2:6) Komana maana afumaña kudi Nzambi anateli kutukwasha kumanisha kukala kudi kwejima kutwamonaña makonu? Eña anateli, neyi chitukumona muchinu chibaaba.

2. Njilanyi yimu yitunateli kwikalilamu namaana chikupu?

² Njila yimu mutunateli kwikalila namaana nankashi hikudiza nikuzatisha yuma yatañishileña amayala ayedi elukiliwu chikupu nawu adiña namaana. Chatachi tukuhanjeka hadi Solomoni. Bayibolu yahoshaña nawu “Nzambi wamwinkeli Solomoni maana abadika nankashi nikashinshi kabadika chikupu.” (1 Anya. 4:29) Chamuchiyedi, tukuhanjeka hadi Yesu wadiña namaana abadika chikupu. (Mat. 12:42) Wuprofwetu wahosheli kutalisha hadi Yesu nawu: “Spiritu yaYehova yakashakama hadi yena, spiritu yamaana nispiritu yakutiyishisha.”—Isa. 11:2.

3. Yumanyi yitukuhanjeka muchinu chibaaba?

³ Solomoni niYesu azatishili maana ayinkeliwu kudi Nzambi kuhana kufumba hansañu yinatukundami wonsu wetu makonu. Muchinu chibaaba, tukuhanjeka hayuma yisatu: Chitwatela kumonaña mali, nyidimu ninetu aweni munjila yayiwahi.

CHAKUMONA MALI MUNJILA YAYIWAHI

4. Chihandilu chaSolomoni chinambuki ñahi nachaYesu?

⁴ Solomoni wadiña waheta chikupu, nawa wahandileña chihandilu chawuhandu. (1 Anya. 10:7, 14, 15) Kwambukaku, Yesu wadiña nayuma yanti nawa hadiña namukalaku. (Mat. 8:20) Hela chochu, wejima wawu amweneña maheta munjila yayiwahi muloña maana awu afumini kudi Muntu yowumu, Yehova Nzambi.

5. Solomoni wamweneña ñahi mali?

⁵ Solomoni welukili nindi mali “akiñaña.” (Mukwa. 7:12) Mali twayizatishaña kulandamu yuma yakudikwasha nachu kumujimba nituyuma twanti tutunakukeña. Ilaña hela chakwila Solomoni wadiña waheta welukili nindi kudi yuma yalema kubadika mali. Chakutalilahu wasonekeli nindi: “Ijina dadiwahi hela [“mpuhu yayiwahi,” tth] akuditonda kubadika maheta amavulu.” (Yish. 22:1) Solomoni wahosheli cheñi nindi antu akeña mali hiyazañalalaña nayuma yikwetiwuku. (Mukwa. 5:10, 12) Nawa watusoñamishili kubula kukuhwelela mali, chineli mali itukweti akisikaña mukapinji kanti.—Yish. 23:4, 5.

6. Yesu wamweneña ñahi yuma yakumujimba? (Matewu 6:31-33)

⁶ Yesu wamweneña yuma yakumujimba munjila yayiwahi. Wadileña yakuda nikunwa. (Luka 19:2, 6, 7) Mpinji yimu wabalumwini menji kwikala vinyu yayiwahi, chihayamisha chindi chatachi. (Yow. 2:10, 11) Nawa hefuku dafwiliyi wavwalili chakuvwala chasweja wuseya. (Yow. 19:23, 24) Ilaña Yesu hashili muchima hayuma yakumujimba muchihandilu chindiku. Wayilejeli akakumulonda nindi: “Kwosi muntu wunateli kwikala nduñu wawanyanta ayediku . . . Himunateli kukalakela Nzambi niMahetaku.” (Mat. 6:24) Yesu watañishili nindi neyi tutwamijaku Wanta, Yehova wukutwinka yuma yitunakukeña.—Tañenu Matewu 6:31-33.

7. Kumona mali munjila yayiwahi kwamukwashili ñahi manakwetu wumu?

⁷ Kuzatisha kufumba kwahosha hansañu yamali kunayikwashi amanakwetu niahela amavulu. Talenu chuma chamumwekeneni manakwetu wabula kusumbula wejina daDaniel. Wahosheli nindi: “Hinadiña kansi nafuukwilihu nami chuma chalema chinatela kwila muchihandilu chami hikumukalakela Nzambi.” Chineli wapeleshaku chihandilu chindi, Daniel natwalekihu kuzatisha mpinji yindi niyuma yelukayi mumudimu waYehova wakutuña. Wabombelelihu nindi: “Inakuhosha chakufuma hamuchima nami hinaditoñeshaña hachuma chinafuukwiliku. Neyi nalemesheli nankashi yuma yakumujimba muchihandilu chami, chiña nidi namali amavulu. Mutenowu hinadi kwikala nawamabwambu amawahi neyi inikwetiku. Neyi nashili muchima hamali hinadi kwikala namuzañalu neyi wunikweti hamuloña wakutwamijaku Wantaku. Hela mali akuvula chamuchidinyi hiyakwesekana nankisu jinanyinkiyi Yehovaku.” Mwamweni, twekalaña namuzañalu neyi tusha muchima hakumukalakela Yehova bayi hamaliku.

MONENUÑA NYIDIMU YAKUMUJIMBA MUNJILA YAYIWAHI

8. Tuneluki ñahi netu Solomoni wamweneña mudimu wakumujimba munjila yayiwahi? (Mukwakutañisha 5:18, 19)

⁸ Solomoni wateneni kudiluñisha kwenzaña hamuloña wakuzata nañovu nindi hichawaana kufuma kudi Nzambi. (Tañenu Mukwakutañisha 5:18, 19.) Wasonekeli nindi: “Mumudimu wejima wakola mwafumaña yuma yayiwahi.” (Yish. 14:23) Solomoni welukili chuma chahosheleñayi. Wadiña mukakukalakala! Watuñili matala, wadimini matempa anyivinyu, matempa nimajiya. Watuñili cheñi nyisumba. (1 Anya. 9:19; Mukwa. 2:4-6) Iku kwadiña kudikita nankashi nawa chakadi nikujina iyi nyidimu yamuleteleli muzañalu. Ilaña Solomoni hashindameneni haniyi nyidimu kulonda yimuleteleña muzañaluku. Wamukalakeleli cheñi Yehova nyidimu yayivulu. Chakutalilahu, watalileña mudimu wakutuña tembeli yalubanji yakudifukwilamu kudi Yehova, mudimu wazatiliwu hadi yaaka 7. (1 Anya. 6:38; 9:1) Hanyima yakuzata nyidimu yejimiyi, nyidimu yakumujimba ninyidimu yaNzambi, Solomoni welukili nindi nyidimu yaNzambi yabadika chikupu nyidimu yakumujimba. Wasonekeli nindi: “Yuma yejima yinatiyakani dehi, dichi kukunkulula kwansañu dikweniku: Mutiyeña Nzambi walala woma nawa hembaña nshimbi jindi.”—Mukwa. 12:13.

9. Yesu wamweneña ñahi nyidimu yakumujimba?

⁹ Yesu wazatileña nañovu. Hadiñayi kansi, wazatileña mudimu wakusoña. (Maku 6:3) Chakadi nikujina, anvwali jindi atiyileña kuwaha chayikwashileñayi hampinji yazatileñawu nañovu kulonda akameni chisaka chawu cheneni. Yesu wadiña wawanina nawa ninyidimu yazatileñayi yadiña yawanina chikupu chakwila antu akeñeli yuma yasoñeleñayi. Yesu watiyileña kuwaha namudimu wazatileñayi. Hela chakwila Yesu wazatileña mudimu windi wakumujimba, wadiña cheñi nampinji yakumukalakela Yehova. (Yow. 7:15) Chekaliliyi mukakutañisha mpinji yejima, wayilejeli antiyilili jindi nindi: “Bayi muzatila yakuda yakisikañaku, ilaña zatilenu yakuda yashakamaña haya nyaaka.” (Yow. 6:27) Nawa muMpanji yahaMpidi, Yesu wahosheli nindi: “Dilumbikilenu maheta mwiwulu.”—Mat. 6:20.

10. Kukalanyi kwamonañawu antu amakwawu neyi anakuzata nyidimu yakumujimba?

¹⁰ Neyi tuzatishaña maana afumaña kudi Nzambi tukumonaña nyidimu yetu yakumujimba munjila yayiwahi. Etu akaKristu atuleja “[kuzata] nañovu . . . mudimu wawuwahi.” (Efwe. 4:28) Kakavulu antu atwiñija nyidimu amonaña chitwashinshika nichitwazataña nañovu nawa hadaha anateli kutuleja nawu asakililaña hamudimu wutwazataña. Hamuloña wakukeña kumutiyisha kuwaha muntu watwiñija mudimu, tukutachika kuzata maora amavulu nakutoñojoka netu mukulumpi wetu wamudimu wukutachika kuyimona aYinsahu jaYehova nindi hiyantu amawahi. Hela chochu, hakushimbula wanyi, tukutachika kudiwula nyidimu yetu yakwakamena chisaka ninyidimu yaWanta. Twatela kuhimpa kulonda twikaleña nampinji yakuzata nyidimu yalema.

11. Manakwetu wumu welukili ñahi chakuzata mudimu nakwesekeja?

¹¹ Manakwetu wakansi William namoni chichalemena kwikala nampinji yakuzatilamu mudimu wakumujimba. Kutalisha hadi mukulumpi wamwiñijili mudimu, William wahosheli nindi: “[Iwu manakwetu] wankwashili kwiluka chakuzata nyidimu nakwesekeja. Wazataña nañovu nawa watuña ijina dadiwahi nawantu alandaña yuma kudi yena muloña yuma yatuñañayi yayiwahi. Neyi mpinji yakukomboka yinashiki dehi, walekaña mudimu nakushiya yuma yejima kulonda ashi muchima hachisaka chindi nihakudifukula. Muneluki? Wekala namuzañalu chikupu!”b

CHITWATELA KUDIMONAÑA ETU AWENI

12. Solomoni wamwekesheli ñahi nindi welukili mwakukumina, ilaña watachikili ñahi kudivwimba?

¹² Hampinji yadifukwileñayi Solomoni kudi Yehova, wadimweneña munjila yayiwahi. Hadiñayi kansi, welukili mwakukumina, nawa walombeleña wukwashu kudi Yehova. (1 Anya. 3:7-9) Solomoni chatachikiliyi kuyuula, welukili cheñi nindi kudivwimba kwatama. Wasonekeli nindi: “Kudinka wanta kwaletaña kujilumuka, nawa spiritu yadivwimba yaleteshaña kuhukana.” (Yish. 16:18) Chawushona, Solomoni wakañenyi kuzatisha kufumba kwindi yomweni. Chihahitili mpinji muchiyuulu chindi, Solomoni watachikili kudivwimba nawa wadiwili nshimbi jaNzambi. Chakutalilahu, nshimbi yimu yahosheli nawu mwanta wawaHeberu “bayi akasumbula ambanda amavuluku, kulonda muchima windi wakabuli kuluwankana.” (Kuhit. 17:17) Solomoni wadiwili lushimbi nawa wasumbwili ambanda 700 niantombu 300, amavulu hiyadifukwileña kudi Nzambiku. (1 Anya. 11:1-3) Hadaha Solomoni watoñojokeleña nindi “yuma yejima yidi hohu chiwahi.” Hela chochu, mukuhita kwampinji, Solomoni wamweni kukala muloña wakubula kumwovwahila Yehova.—1 Anya. 11:9-13.

13. Chumanyi chitunateli kudizilaku neyi tutoñojokaña hakudizoza kwaYesu?

¹³ Yesu welukili mwakukumina nawa wadiña wadizoza. Henohu Yesu kanda enzi hamaseki, wazatili nyidimu yayivulu hampinji yamukalakeleleñayi Yehova. Kuhitila mudi Yesu, “dimwaleñeleliwu yuma yejima yamumawulu niyahamaseki.” (Kol. 1:16) Hampinji yamupapatishileñawu, Yesu wanukili nyidimu yazatiliyi hadiñayi naTata yindi. (Mat. 3:16; Yow. 17:5) Ilaña yumiyi hiyamuletesheli Yesu kudinka wantaku. Kwambukaku, hatoñojokeli nindi wabadika muntu wudi wejimaku. Wayilejeli atumbanji twindi nindi wenjili heseki “nindi amukalakeliku, ilaña wenjili nakukalakela antu nikuhana wumi windi kwikala ifutu danyiloña dakukuula nachu antu amavulu.” (Mat. 20:28) Washimwini cheñi hatooka nindi hanateli kudiilila chuma chidi chejima nkawindiku. (Yow. 5:19) Yesu wadiña wadizoza chikupu. Welili chuma chitwatela kwimbujola.

14. Chumanyi chitunateli kudizila kudi Yesu hachitwatela kudimonaña etu aweni?

¹⁴ Yesu wayidizishili akakumulonda chatela kudimonañawu munjila yayiwahi. Mpinji yimu, Yesu wayilejeli nindi: “Nsuki jakumutu wenu jejima ajichinda.” (Mat. 10:30) Awa mazu anakutukolesha sweje-e neyi twadimonaña netu twalema wanyi. Anatalishi mukwila nawu Tata yetu wamwiwulu watukeña hama, nawa watulemesha chikupu. Chineli Yehova watwiteja nindi tudifukuleña kudi yena nawa watoñojokaña nindi twashikilamu kushakama haya nyaaka mwituña dadiha, bayi tutoñojokaña netu hakashikijamuku.

15. (a) Kaposhi Kakutalila kahosheli nawu twatela kudimonaña munjila yamuchidinyi? (b) Neyi chinamwekeshiwu hanyevulu hefu 24, neyi tusweja kusha maana hadi etu awenetu, yumanyi yayiwahi yitukushalañahu?

¹⁵ Yaaka 15 yinahitihu, Kaposhi Kakutalila kahosheli nawu twatela kudimonaña etu aweni muniyi njila: “Chakadi nikujina twatela kusweja kutoñojokaña hadi etu aweni chakwila tudivwimbaku hela kutoñojoka hadi etu aweni chakwila tutachika kudimona netu tudi amukunkulwayiku. Ilaña twatela kudimonaña munjila yayiwahi. Twatela kwiluka yuma yitukutwesha kwila niyitukukañanya. Muhela wumu wahosheli nindi: ‘Hinasweja kutamaku, hela yami wasweja kuwahaku. Kudi munawahila nimunatamina neyi chekala antu ejima.’”c Komana munamoni chichawahila kudimona etu aweni munjila yayiwahi?

16. Muloñadi Yehova chatwinkelayi Nshimbi jajiwahi?

¹⁶ Yehova watwinkaña nshimbi jajiwahi kuhitila Mwizu dindi. Watukeña nawa nakukeña nindi twiikali namuzañalu. (Isa. 48:17, 18) Chuma chachiwahi chitwatela kufuukulahu, nawa chinateli kutuletela muzañalu nankashi hikumukalakela Yehova. Neyi twila mwenimu, tukutondolwela kukala kwakuvulu kunakumonawu antu ashaña muchima hamali nihadi awenawu. Wonsu wetu tuzatenu nañovu kulonda twikali namaana nikutiyisha muchima waYehova kuwaha!—Yish. 23:15.