Enu Anvwali Kwashenu Anyanenu Amukeñi Yehova

1-2. Lumbululenu yishina yamuBayibolu chiyinateli kwikala yalema kudi etu neyi yuma yinahimpiki muchihandilu.

HEFUKU dinakudisumbulawu, akalemba nakankaña atiyililaña nakanañachima kumpanji yashindamena haBayibolu yahoshaña hawulu. Yishina yahoshañawu muniyi mpanji ayiluka dehi. Ilaña kufuma tuhu hanidi ifuku, iyi nsañu yikwikalaña yalema kudi wena. Muloñadi? Muloña akuyizatishaña muwulu wawu.

² Dichuma chamwekanaña neyi akaKristu adisumbula anekali dehi anvwali. Hadi yaaka yayivulu, anatiyilili kujimpanji jahoshaña hachakukulisha anyana. Ichi dinu iyi yishina yikwikala yalema mukuhanda kwawu. Akwikala namwana wakadikulishilañawu. Iwu himudimu weneni chikupu! Chalala, neyi yuma yinahimpiki muchihandilu chetu yishina yimu yamuBayibolu yekalaña yalema kudi etu. Dichuma chimu chaleteshaña akakudifukula aYehova kutaña Nsona nawa neyi chayilejeliwu anyanta awaIsarela kwila nikutoñojokahu chikupu “mafuku ejima” akuhanda kwawu.—Kuhit. 17:19.

3. Tukuhanjekadi muchinu chibaaba?

³ Enu anvwali, mukweti mudimu weneni chikupu watela kwikala namukaKristu, wakudizisha anyanenu kulonda amwiluki Yehova. Ilaña bayi mukumina dakuyidizisha nsañu yahosha hadi Nzambi yetuku. Mwatela kuyikwasha anyanenu kulonda amukeñi nankashi. Munateli kwila ñahi hakwila mukwashi anyanenu amukeñi Yehova? Muchinu chibaaba, tukuhanjeka hayishina yamuBayibolu yiwana yikuyikwasha enu anvwali. (2 Tim. 3:16) Tukumona cheñi kuzatisha kufumba kwamuBayibolu chikunakwashi anvwali akaKristu amakwawu.

YISHINA YIWANA YIKUKWASHA ANVWALI

4. Chishinanyi chinateli kukwasha anvwali kulonda akwashi anyanawu kumukeña Yehova? (Yakoba 1:5)

⁴ Chishina 1: Lombenu wukwashu kudi Yehova. Mulombenu Yehova ayinki maana kulonda mukwashi anyanenu kumukeña. (Tañenu Yakoba 1:5.) Diyi Muntu wunateli kuyileja kufumba kwakuwahi. Kudi yuma yinaleteshi tuhoshi mwenimu. Tuhoshenu hayiyedi. Chatachi, Yehova hinvwali wakuluka yitembi. (Mas. 36:9) Nawa chamuchiyedi, kufumba kwindi kwatukwashaña mpinji yejima.—Isa. 48:17.

5. (a) Yumanyi yaloñesha kuloñesha kwaYehova yinateli kukwasha anvwali? (b) Neyi chinamwekeshiwu muvidiyo, chumanyi chimwadizilaku kudi Manakwetu niMuhela Amorim chakulishiliwu anyanawu?

⁵ Kuhitila Mwizu dindi nimuKuloñesha kwindi, Yehova naloñeshi yakuda yayivulu yakuspiritu yashindamena haBayibolu yinateli kuyikwasha kulonda mukwashi nachu anyanenu kumukeña Yehova. (Mat. 24:45) Chakutalilahu, munateli kuwana nsañu yinateli kuyikwasha muyibaaba yinakuhosha nawu “Ifingafwa Indupwa,” yedikileña hadi yaaka yayivulu muMagazini yaLoleni! nawa ichi yidi nihawebusayiti yetu. Cheñi, mumavidiyo amavulu adi ha jw.org mudi kwihujola niyimwenu yinateli kukwasha anvwali kuzatisha kufumba kwaYehova hampinji yinakukulishawu anyanawu.b—Yish. 2:4-6.

6. Tata yawantu wumu watiyaña ñahi nawunlomboli watambwilañayi yena niñodindi mukuloñesha kwaYehova?

⁶ Anvwali amavulu asakililaña chayikwashañayi Yehova kuhitila mukuloñesha kwindi. Tata yawantu wejina daJoe wahosheli nindi: “Chapela wanyi kukulisha anyana asatu muchalala. Ami namwinikwami twalombaña mpinji yejima kudi Yehova kulonda atukwashi. Nawa kakavulu twamonaña netu chibaaba hela vidiyo yinediki hampinji yatelela kulonda yitukwashi nakukala kutunakumona. Mukuhanda kwetu kwejima twalombaña wukwashu kudi Yehova.” Manakwetu Joe hamu nimwinikwindi anawani nawu iyi yibaaba nimavidiyo anayikwashi anyanawu kuswina kwakwihi naYehova.

7. Muloñadi chichalemena anvwali kusha muchima kuyuma yelañawu? (ARoma 2:21)

⁷ Chishina 2: Ikalenu nayilwilu yayiwahi. Anyana amonaña yuma yelañawu anvwali jawu nawa kakavulu ayimbujolaña. Kwosi nvwali wawaninaku. (Rom. 3:23) Hela chochu, anvwali atela kuzata nañovu kulonda ahani chakutalilahu chachiwahi kudi anyanawu. (Tañenu ARoma 2:21.) Tata yawantu wumu wahosheli hadi anyana nindi: “Ekala neyi kadihina kakokaña menji.” Wabombelelihu nindi: “Neyi yuma yitwelaña yinakwambuka nayuma yitwayidizishaña atulejaña.” Dichi neyi tunakukeña netu anyanetu amukeñi Yehova, kukeña kutwamukeña kwatela kwikala kwakola nawa twatela kukwimwekesha.

8-9. Chumanyi chitunakudizilaku kumazu ahosheliyi Andrew niEmma?

⁸ Kudi njila jajivulu anvwali munateli kudizishilawu anyanawu kumukeña Yehova. Talenu chahosheliyi manakwetu Andrew wudi nayaaka 17, wahosheli nindi: “Mpinji yejima anvwali jami akonkomweneneña chichalemena kulomba. Ifuku dejima nawufuku, atata alombeleña nanami hela chakwila nalomba dehi. Anvwali jetu atwanukishileña mpinji yejima nawu: ‘Wunateli kuhanjeka naYehova mapampa ejima iwunakukeña.’ Nawa muloña wachumichi nalemesheli kulomba nawa ichi nalombaña kudi Yehova mpinji yejima nawa namumonaña nami hiTata yami wukweti kukeña.” Enu nvwali ilukenu nenu kukeña kumwamukeña Yehova kunateli kukwasha anyanenu niwena kumukeña.

⁹ Talenu chuma chamumwekeneni Emma. Chelili atata yindi ashiyi chisaka, ayishilili amama yindi nyikudi yayivulu. Emma wahosheli nindi: “Kakavulu chayikalilileña amama kuwana mali, ilaña mpinji yejima ahosheleña hadi Yehova chakamenañayi nikukwasha ambuñindi. Namweneña yuma yelileñawu nawa netejeleña nami dimu. Amama elileña yuma yahosheleñawu.” Chumanyi chitunakudizilaku? Anvwali anateli kudizisha anyanawu nimumpinji yakala.—Ñal. 6:9.

10. Kukoolekanyi kwadiña nawanvwali aIsarela kwakuhanjeka nawanyanawu? (Kuhituluka 6:6, 7)

¹⁰ Chishina 3: Hanjikenuña nawanyanenu mpinji yejima. Yehova wayilejeli aIsarela kudizishaña anyanawu mpinji yejima. (Tañenu Kuhituluka 6:6, 7.) Anvwali adiña nakukooleka kwakuvulu kwakuhanjeka nawanyanawu hefuku nikuyikwasha kulonda amukeñi Yehova chakufuma hamuchima. Chakutalilahu, kaIsarela wakansi weyala nateli kuzata maora amavulu kumukwasha tata yindi kutumba mbutu hela kwañula. Muhelindi nateli kumukwashaku mama yindi kuchima, kupikula nikuzataku nyidimu yikwawu yahetala. Anvwali nianyana chazatilileñawu hamu, chayikwashileña kuhanjeka hanyitu yayivulu yalema. Chakutalilahu, ahanjekeleña hachilwilu chaYehova chakuwaha nichakwashileñayi chisaka.

11. Mpinjinyi yayiwahi yatela kuhanjekawu anvwali akaKristu nawanyanawu?

¹¹ Makonu yuma yinahimpiki. Mumatuña amavulu, anvwali kwila ekala hamu nawanyanawu ifuku damukuma nehi. Anvwali ayaña kunyidimu nawa anyana ayaña kushikola. Dichi anvwali atela kuwana mpinji yakuhanjeka nawanyanawu. (Efwe. 5:15, 16; Fwili. 1:10) Kudifukula kwachisaka himpinji yayiwahi yakuhanjeka nawu. Manakwetu wakansi wejina daAlexander wahosheli nindi: “Mpinji yejima atata ashaku kudifukula kwachisaka nawa kwosi chuma, chaluwañeshaña iyi progiramuku. Hanyima yakudiza, twahanjekaña.”

12. Chumanyi chatela kutoñojokañayi mutu wachisaka hampinji yakudifukula kwachisaka?

¹² Neyi mudi mutu wachisaka, chumanyi chimwatela kwila hakwila nawu kudifukula kwachisaka kuyiwahileña anyanenu? Dizenuña nawanyanenu mukanda wawuwahi nawa wawuha waMunateli Kwikala naMuzañalu Haya Nyaaka! Kudiza kwamuchidiwu kukuyikwasha kuhanjeka nawanyanenu. Chineli munakukeña nenu anyanenu ayileji chinakutiyawu nichinakutoñojokawu, bayi muzatisha iyi mpinji yakudifukula kwachisaka kuyihoshola hela kuyizuwilaku. Nawa bayi muhila neyi anyanenu aleta yitoñojoka yinabuli kwesekana nayishina yamuBayiboluku. Ilaña, yisakililenuña hachinahamukiwu kulonda ayileji chinakutiyawu nawa yikoleshenu ekaleña akasunuka kuyileja yitoñojoka yawu nichinakutiyawu. Munateli kukwasha anyanenu hohu neyi mwiluka chinakutiyawu.

13. Mpinjinyi yikwawu yatela kuzatishawu anvwali kulonda akwashi anyanawu kuswina kwakwihi naYehova?

¹³ Enu anvwali, ikalenuñaku nampinji hefuku-hefuku yakukwasha anyanenu kuswina kwakwihi naYehova. Bayi muhembelela mpinji yakudiza Bayibolu mwaka dinu muyidizishi hadi Nzambi yetu wukweti kukeñaku. Talenu chahosheliyi mama yawantu wejina daLisa wahosheli nindi: “Twazatishili yuma yejima yitwamweneña kulonda tuyidizishi anyanetu hadi Yehova. Chakutalilahu, neyi yuma yinakwila kawa yisehesha anyanetu, twazatishaña ichi chakutalilahu nakuyileja netu Nleñi yetu wakeñaña nindi twikaleña namuzañalu nawa wakeña yileñaleña neyi chochitwayikeña.”

14. Muloñadi chichalemena anvwali kukwasha anyanawu kutonda chiwahi amabwambu? (Yishimu 13:20)

¹⁴ Chishina 4: Kwashenu anyanenu kulonda atondeña amabwambu amawahi. Izu daNzambi dashimuna hatooka nawu amabwambu jetu anateli kutuletesha kwikala nayilwilu yayiwahi hela yatama. (Tañenu Yishimu 13:20.) Enu anvwali komana mweluka amabwambu jawanyanenu? Mwadimonahu dehi nawu nawa mwahanjekahu dehi nawu? Munateli kuyikwasha ñahi anyanenu kwikala nawamabwambu amukeña Yehova? (1 Kor. 15:33) Munateli kuyikwasha kuhitila mukutambika amanakwetu niahela amakwawu adi nawubwambu wakola naYehova kwinza nakudifukula hamu nenu kudifukula kwachisaka.—Mas. 119:63.

15. Anvwali anateli kwila ñahi kulonda akwashi anyanawu kwikala nawamabwambu amawahi?

¹⁵ Talenu chuma chamumwekeneni tata yawantu wejina daTony. Nalumbululi chuma chelayi yena hamu nimwinikwindi kulonda ayikwashi anyanawu kwikala nawamabwambu amawahi, nindi: “Hadi yaaka yinahitihu, ami nimwinikwami tunatambiki amanakwetu niahela akweti yaaka yashiyashana nawa afuma kuyitachi yacheñi. Twadilaña nawu hamu nawa twadifukulaña nawu hamu kudifukula kwachisaka. Iyi diyi njila yayiwahi yakwilukilamu antu amukeña Yehova nawa amukalakelaña namuzañalu. Twashakamineña nawankoñi añinza, amishonali, ninawamanakwetu niahela amakwawu. Yuma yelukawu, iyena dikwetiwu nikudihana kwawu, kunayikwashi nankashi anyanetu nawa chinayikwashi kuswina kwakwihi naYehova.” Enu anvwali, fwilenuña kukwasha anyanenu ekali nawamabwambu amawahi.

BAYI MUZEYAKU!

16. Mukwila ñahi neyi mwana yahosha nindi nakukeña wanyi kumukalakela Yehova?

¹⁶ Indi neyi munazati nañovu ilaña mwanenu wumu hakuyileja nindi yena kwindi wukumukalakelaña Yehova wanyi? Bayi mumona nenu munakañanyiku. Yehova watwinka wonsu wetu wuswa wakudifuukwilahu kushilahu nimwanenu, wakutondahu kumukalakela Nzambi hela nehi. Neyi mwanenu namushiyi Yehova bayi mutoñojoka nenu hakafuntaku. Anukenu nsañu yamwana wajimbeli. (Luka 15:11-19, 22-24) Iwu mukwenzi wafumini munjila yakuloña ilaña nkumininaku wafuntili. Amakwawu anateli kuhosha nawu, “Ichi hichakutalilahu hohu, kwila chimwekana nehi.” Chinateli kumwekana! Dichuma chamumwekeneni kansi weyala Elie.

17. Nsañu yaElie yinayikoleshi ñahi?

¹⁷ Elie wahosheli kutalisha hadi anvwali jindi nindi: “Azatili nañovu kulonda andizishi kumukeña Yehova niIzu dindi, Bayibolu. Hela chochu, hinadiña kansi natachikili kudikaña.” Elie watachikili kubajama nawa anvwali jindi esekeli kumukwasha kulonda yekala cheñi nawubwambu wakola naYehova ilaña wakaanini kuyitiyilila. Chafuminiyi hetala watachikili kwila yuma yatama. Hela chochu, mpinji yikwawu wahanjekeleña nsañu yamuBayibolu nawamabwambu jindi. Elie wahosheli nindi: “Chinahanjekeleña nebwambu dami hadi Yehova natoñojokeleña hadi Yehova. Chovu-chovu, mbutu yachalala chamuBayibolu yatachikili kukula mumuchima wami, mbutu yesekeliwu anvwali jami kutumba yatachikili kukula.” Chimwahitili mpinji, Elie wafuntili muchalala.c Fwikijenu muzañalu watiyiliwu anvwali jindi hakwanuka nawu amudizishili kumukeña Yehova hachidiñayi kansi!—2 Tim. 3:14, 15.

18. Mwatiyaña ñahi nawanvwali azataña nañovu kulonda adizishi anyanawu kumukeña Yehova?

¹⁸ Enu anvwali, ayinka mudimu wakukulisha ikiñu dadiha, dawakakudifukula aYehova. (Mas. 78:4-6) Himudimu wapela wanyi nawa twayisakililaña nankashi chimwazataña nañovu kukwasha anyanenu! Neyi mutwalekahu kuzata nañovu kulonda mukwashi anyanenu amukeñi Yehova nikuyidizisha kulonda amwovwahileña, ilukenu nenu Tata yenu wamwiwulu wukutiya kuwaha.—Efwe. 6:4.