Enu Atwansi, Twalekenuhu Kupaminaku Hanyima Yakupapatishewa

1. Yumanyi yayiwahi yineliwu atwansi amavulu?

CHAAKA nichaaka, atwansi amavulu anakupapatishewa. Ninenu mudi hakachi kawu? Neyi mudi hakachi kawu, amanakwenu niahela anatiyi kuwaha nawa Yehova nazañalali chikupu! (Yish. 27:11) Toñojokenu ntahi chanti hayuma yayivulu yimuneli dehi. Munadizi Bayibolu chikupu, hamwaha hadi yaaka yayivulu. Yuma yimunadizi yinayikwashi kukuhwelela nenu Bayibolu Hizu daNzambi. Chuma chabadika, munamwiluki nikumukeña Nsoneki yaniwu mukanda wajila. Munamukeñi chikupu chakwila ichi munekali dehi kambuñindi wadihana nawa wapapatishewa. Muneli chiwahi hama!

2. Yumanyi yitukuhanjekahu muchinu chibaaba?

² Chakadi nikujina chikuhwelelu chenu chadiña mukweseka hampinji yimwapaminañaku hakwila mushiki kuchipapatishu. Ilaña chimukukulaña mukumonaña kweseka kwacheñi. Satana wukufwilaña kuzeyesha wubwambu wenu naYehova kulonda muleki kumukalakela. (Efwe. 4:14) Bayi mwiteja chumichi kuyimwekenaku. Chumanyi chinateli kuyikwasha kutwalekahu kwikala washinshika kudi Yehova nikuhemba chikaninu chenu chachipapatishu? Twalekenuhu kuyilaku hambidi, ‘fwilenuña kupama’ nakwikala mukaKristu waha. (Heb. 6:1) Hanu dinu munateli kwila ñahi chumichi?

MUNATELI KWIKALA ÑAHI MUKAKRISTU WAPAMA?

3. Chumanyi chatela kwilawu akaKristu ejima hanyima yakupapatishewa?

³ Hanyima yakupapatishewa, wejima wetu twatela kulondela kufumba kwaheniyi kapostolu Pawulu kudi akwawu akakwitiya amuEfwesesa. Wayikolesheli kwikala akaKristu ‘apama’ chikupu. (Efwe. 4:13) Hinjila yikwawu yakuhoshelamu nawu, ‘Twalekenuhu kupama.’ Tunateli kutiyishisha mwatalishiliyi Pawulu chesekejeliyi chakulañayi mwana kumujimba. Mwana neyi navwaliki anvwali jindi atiyaña kuwaha nankashi. Ilaña hakatwalekahu kwikala mukeki haya nyaakaku. Mukuhita kwampinji watela kuleka “yilwilu yawansi.” (1 Kor. 13:11) Dichichatela kwikala nikudi akaKristu. Hanyima yakupapatishewa, twatela kutwalekahu kupaminaku. Tuhanjekenu hayuma yinateli kutukwasha kwila chumichi.

4. Chilwilwinyi chinateli kuyikwasha kupaminaku kuspiritu? Lumbululenu. (Afwilipi 1:9)

⁴ Swejenu kumukeña Yehova. Mwamukeña Yehova nankashi. Ilaña kukeña kwenu kumwamukeña kunateli kuswejelaku. Munjilanyi? Kapostolu Pawulu washimwini njila yimu, yasonekawu haAFwilipi 1:9. (Tañenu.) Pawulu walombeli nindi kukeña kwawaAFwilipi “kusweji nankashi.” Dichi kukeña kunateli kuswejelaku. Tunateli kwila mwenimu neyi tuzata nañovu kulonda twikali “nakwiluka kwalala nikashinshi kakeni.” Neyi tuswejelaku kumwiluka nankashi Yehova, tukuswejelaku kumukeña nawa tukwiluka yilwilu yindi nichelañayi yuma. Tukufwilaña kumutiyisha kuwaha nawa tukutondolwelaña yuma yidi yejima yinateli kumuneñesha. Tukuzataña nañovu kulonda twiluki chatoñojokañayi nichitunateli kuzatila hamu nindi.

5-6. Tunateli kuswejelaku ñahi kumukeña Yehova? Lumbululenu.

⁵ Tunateli kumukeña nankashi Yehova kuhitila mukumwiluka Mwanindi nikudikunda nindi, wamwekesheli yilwilu yaTata yindi. (Heb. 1:3) Njila yayiwahi yakumwilukilamu Yesu, hikudiza nyikanda yiwaana yaNsañu Yayiwahi. Neyi kanda mwikali nachaaku chakutaña Bayibolu ifuku nifuku, kwila mutachika chochichi nehi? Chimukutañaña iyi nsañu yaYesu, talenu yilwilu yayiwahi yikwetiyi. Wadiña waswayi kusolomoka, wadiña ninakwakata anyana anyanya mumakasa indi. (Maku 10:13-16) Wayiwundishileña atumbanji twindi; nawa adiña akasunuka kuhosha nindi neyi wudi hohu. (Mat. 16:22) Muniyi njila, Yesu wembujoleleña Tata yindi wamwiwulu. Yehova niyena waswayi kusolomoka. Tunateli kuhosha nindi mukulomba. Neyi tunakulomba, tunateli kumuleja yuma yejima yidi kumuchima wetu. Tunakuhweleli netu hakutuzuwilaku. Watukeña; watwakamenaña.—1 Pet. 5:7.

⁶ Yesu watiyilileña antu wushona. Kapostolu Matewu washimwini nindi: “Chamweniyi mazaza awantu, wayitiyilili wushona, muloña ayikabishileña nikuyuumba chisayikila neyi anyikoku akadi kabiña.” (Mat. 9:36) Nawa Yehova watiyaña ñahi? Yesu wahosheli nindi: “Tata yami wekala mwiwulu niyena hakeñaña nindi wumu hadi awa akehelamu akisikiku.” (Mat. 18:14) Chumichi chatutiyishaña kuwaha! Neyi tumwiluka chiwahi Yesu, kukeña kutwamukeña Yehova nikwena kukuswejelaku.

7. Kudikunda nawakaKristu apama kunateli kuyikwasha ñahi?

⁷ Munateli kuswejelaku kwikala nakukeña nikupaminaku kuspiritu kuhitila mukuyiluka chiwahi amanakwenu niahela apama amuchipompelu chenu. Shinshikenu yuma yayiletelaña muzañalu. Aditoñeshaña wanyi muloña wakumukalakela Yehova. Yihulenu kulonda ayileji yuma yayiwahi yinadiluñishiwu mumudimu waYehova. Neyi munakukeña kufuukulahu chuma chalema yihulenu ayikwashi. Kafwampi, “hadi akakulejana maana amavulu yuma yalumbulukaña.”—Yish. 11:14.

8. Chumanyi chimwatela kwila neyi mutachika kujinoka hayuma yatañishaña Bayibolu?

⁸ Lekenu kujinoka. Neyi chitwashimuna muparagilafu 2, Satana wukufwilaña chikupu kuyikañesha kupama kuspiritu. Njila yimu munateli kwilayi mwenimu hikuyikojeja mujinokeña hansañu yimu yatañishaña Bayibolu. Chakutalilahu, katataka hela kumbidi, mukuwana nsañu yabulaña kumulemesha Nzambi yahoshaña nawu yuma yasefukili hohu yayeni. Hadaha himwachidiña kansi mwatoñojokelihu nankashi wanyi haniyi nsañu, ilaña chimunakuli, hekwawu dichayidizishañawu kushikola. Yuma yinateli kuhoshawu antañishi enu yinateli kutiyakana neyi yayiwahi nawa yalala. Hela chochu, wena kanda atoñojokeñahu dehi hawunsahu wamwekeshaña nawu kwekala Nleñi. Anukenuña chishina chekala haYishimu 18:17: “Muntu wasambilaña kulumbulula muloña windi wamwekanaña neyi waloña, sampu mukwawu nenzi nakumwihula malwihu.” Chatela mwitejeña hohu yuma yimunakudiza kushikola nenu yalala, sandujolenu chalala chekala Mwizu daNzambi, Bayibolu. Sandujolenu munyikanda yetu. Hanjekenu nawamanakwetu niahela akuhweleleli hakusambila nawu yuma yadisefukilili hohu yayeni. Yihulenu ayileji chayikwashili kukuhwelela nawu kwekala Nleñi wukweti kukeña. Kuhanjeka kwamuchidiwu kunateli kuyikwasha kukuhwelela nenu kwekala Nleñi.

9. Yumanyi yimunadizili kunsañu yaMelissa?

⁹ Muhela wejina daMelissa wasandujoleli hansañu yakuleña nawa chumichi chamukwashili.b Wahosheli nindi: “Kumashikola, nsañu yakwila nawu yuma yadisefukilili ayilumbululaña munjila yamwekanaña neyi yalala. Hakusambila, natiyili woma kusandujola. Nachinineña nami nukuwana wunsahu wunakumwekesha nawu mwahoshañawu mwalala. Ilaña natoñojokeli nami Yehova wakeñaña twikali nawunsahu waletesha tukuhweleli munochu chuma. Dichi natachikili kusandujola. Natañili mukanda wunakwila nawu Is There a Creator Who Cares About You? nibroshuwa yinakwila nawu Was Life Created? niThe Origin of Life—Five Questions Worth Asking. Dichuma chinateleleli kwila. Chiña dichinelili hakusambila.”

10-11. Chumanyi chinateli kuyikwasha kubula kwikala nayilwilu yatama? (1 ATesalonika 4:3, 4)

¹⁰ Kanenuña yilwilu yatama. Muyaaka yawukampululu, mpwila yawuvumbi yaswejaña nankashi nawa anateli kuyikanjikija kudi akwenu nawu mwili wuvumbi. Dichuma chakeñañayi Satana nindi mwileña. Chumanyi chinateli kuyikwasha kutondolwela kweseka? (Tañenu 1 ATesalonika 4:3, 4.) Mukulomba kwenu, mulejenuñamu Yehova chimunakutiya. Mulejenu chimunakutiya nawa mulombenu ayinki ñovu yakuumika. (Mat. 6:13) Anukenuña nenu Yehova nakukeña kuyikwasha bayi kuyinka nyiloñaku. (Mas. 103:13, 14) Mwatela cheñi kutaña Izu daNzambi kulonda diyikwashi. Melissa itwashimunahu dehi, chamukalileña kuleka yitoñojoka yatama. Wahosheli nindi: “Kutaña Bayibolu ifuku dejima kwankwashili chikupu. Chañanukishili nami nekala wambala waYehova nawa inakukeña kumukalakela muchihandilu chami.”—Mas. 119:9.

¹¹ Bayi mweseka kumanisha kukala nkawenuku. Yilejenumu anvwali jenu kukala kumunakumona. Chapela wanyi kuhanjeka nsañu yamuchidiwu, ilaña chalema kuyilejamu. Melissa wahosheli nindi: “Nalombeli kulonda nikali wahamuka nawa nayilejelimu atata kukala kunadiña naku. Hanyima yachumichi, kumuchima kwatookeli. Nelukili nami Yehova watiyili kuwaha.”

12. Munateli kufuukula ñahi chachiwahi?

¹² Itejenuña yishina yamuBayibolu yiyilomboleña. Chimunakukula, mukutachika kwikala asubuka kudifuukwila enu aweni. Ilaña muneluki wanyi yuma yayivulu. Munateli kutondolwela ñahi yiluwa yinateli kumanisha wubwambu wenu naYehova? (Yish. 22:3) Muhela Kari nalumbululi chuma chamukwashili kufuukula chachiwahi. Welukili nindi neyi wudi mukaKristu wapama hiwatelela nshimbi muyuma yejimaku. Wahosheli nindi: “Nateleli kwiluka yishina yamuBayibolu bayi nshimbi hohuku.” Neyi munakutaña Bayibolu dihulenu nenu: ‘Indi iyi nsañu yinakundizisha nawu Yehova watoñojokañahu nindidi? Komana mudi yishina yinateli kunkwasha kuhimpa yilwilu yami? Neyi yidi mwomu, yinateli kunkwasha ñahi neyi niyizatisha?’ (Mas. 19:7; Isa. 48:17, 18) Neyi mutañaña Bayibolu nikutoñojoka hayishina yekalamu, chikuyikwasha kufuukula munjila yikumutiyisha Yehova kuwaha. Chimukutwalekahu kupaminaku, mukwiluka nenu himukukeñekaña nshimbi hejimaku, muloña mukwiluka Yehova chatoñojokañayi hanoyu nsañu.

13. Amabwambu amawahi anateli kuyikwasha ñahi?

¹³ Tondenu amabwambu amukeña Yehova. Neyi chitwashimunahu dehi, amabwambu imukutonda anateli kuyikwasha kwikala mukaKristu wapama hela nehi. (Tañenu Yishimu 13:20.) Muzañalu wadiñayi nawu muhela Sara watachikili kumana. Ilaña kudi chuma chamwekeni chamukwashili kuhimpa. Sara wahosheli nindi: “Nekalili nawamabwambu amawahi hohampinji yinakeñeleña amabwambu. Twahumañeneña namuhela wumu wakansi kulonda tudizeña Kaposhi Kakutalila. Ibwambu mukwawu wankwashili kutachika kwakulahu hakupompa. Muloña wakudikunda nankashi nanawa amabwambu, natachikili kusha muchima kukudiza nkawami nikulomba. Wubwambu wami naYehova watachikili kukola nawa natachikili cheñi kwikala namuzañalu.”

14. Julien wekalili ñahi nawamabwambu amawahi?

¹⁴ Munateli kukwata ñahi wubwambu nawantu anateli kuyikwasha? Julien, ichi himukulumpi muchipompelu, wahosheli nindi: “Hinadiña kansi, nekalili nawamabwambu hitwadiña mumudimu wakushimwina. Awa amabwambu adiña neyena chikupu, nawa ankwashili kudikita chikupu mumudimu wakushimwina. Nafuukwilihu kuzata mudimu wakushimwina wampinji yejima. Nenjili nakwiluka nami nashalileñahu yuma yayivulu muloña wakudikunda hohu nawamabwambu akweti yaaka yimu nanami. Chimwahitili mpinji, nekalili nawamabwambu haBeteli. Yilwilu yawu yayiwahi yankwashili kwiluka chakutonda yisela yayiwahi nawa chankwashili kuswina kwakwihi naYehova.”

15. Pawulu wamusoñamishili nindidi Timotewu hansañu yawamabwambu? (2 Timotewu 2:20-22)

¹⁵ Indi neyi mumona nenu muntu wumu muchipompelu wukweti yilwilu yatama? Pawulu welukili nindi antu amakwawu muchipompelu chawakaKristu akusambila adiña nayilwilu yayiwahi wanyi, wamusoñamishili Timotewu kubula kudikunda nawu. (Tañenu 2 Timotewu 2:20-22.) Wubwambu wetu naYehova walema. Kanda twiteja muntu wudi wejima kuluwañesha wubwambu wetu wutunakwati naTata yetu wamwiwuluku.—Mas. 26:4.

KWIMIKA YIKONKWANYI KUNATELI KUYIKWASHA ÑAHI KUPAMINAKU KUSPIRITU?

16. Yikonkwanyi yamuchidinyi yimwatela kutonda?

¹⁶ Imikenu yikonkwanyi yalala. Tondenu yikonkwanyi yinateli kuyikolesha nawa yikuyikwasha kupama. (Efwe. 3:16) Chakutalilahu, munateli kuwahishaku kulonda mudizeña nikutaña Bayibolu mpinji yejima. (Mas. 1:2, 3) Indi kwiji mwatela kuzata nañovu kulonda mulombeña mapampa amavulu nikuwahishaku kulomba kwenu. Hadaha mwatela kudiyuula kulonda mutondeña yisela chachiwahi nikuzatisha chiwahi mpinji yenu. (Efwe. 5:15, 16) Yehova neyi amona chimunakuzata nañovu, wukutiya kuwaha.

17. Yumanyi yayiwahi yafumaña mukukwasha antu amakwawu?

¹⁷ Munateli kupaminaku kuspiritu neyi mukwashaña antu amakwawu. Yesu wahosheli nindi: “Mukuhana mwekala muzañalu chikupu kubadika wekala mukutambwila.” (Yilw. 20:35) Mukwikala namuzañalu chikupu neyi mukuzatisha mpinji yenu niñovu kulonda mukwasheña antu amakwawu. Chakutalilahu, munateli kuzata nañovu kulonda mukwasheña atushinakaji niayifwayi adi muchipompelu chenu. Hadaha munateli kuyikwashaku kulanda yuma hela kuyidizisha chakuzatisha yozelu yakesi kawuneñu. Neyi mudi manakwetu, ikalenu nachikonkwanyi chakwikala nkoñi wakuzatila, nankeñelu yakukalakela amanakwenu niahela. (Fwili. 2:4) Mwatela kuyikeña cheñi antu abula kwikala muchipompelu, kuhitila mukuyishimwina nsañu yayiwahi yaWanta. (Mat. 9:36, 37) Neyi chinatwesheki, ikalenu nachikonkwanyi chakuzataku mumudimu wakushimwina wampinji yejima.

18. Kuzataku mudimu wakushimwina wampinji yejima kunateli kuyikwasha ñahi kupama?

¹⁸ Kuzataku mudimu wakushimwina wampinji yejima kunateli kuyikwasha kuzataku nyidimu yayivulu mukuloñesha. Kuzataku wupayiniya wampinji yejima kunateli kuyenzunwina njila yakuya kuShikola yawakaKushimwina aWanta. Munateli kuzatilaku haBeteli hela mumudimu wakutuña wawanta. Muhela payiniya wakansi wejina daKaitlyn wahosheli nindi: “Kuzata mpinji yeneni mumudimu wakushimwina nawamanakwetu niahela apama kwankwashili chikupu kupama kuspiritu hanyima yakupapatishewa. Chakutalilahu chawu chankwashili kwiluka chikupu Bayibolu nichakudizisha chiwahi.”

19. Yumanyi yayiwahi yimukudiluñisha hampinji yimunakupaminaku kuspiritu?

¹⁹ Chimukutwalekahu kupaminaku, mukudiluñisha yuma yayivulu yayiwahi. Himukunata mpinji yenu nakufwila yuma yamukunkulwayiku. (1 Yow. 2:17) Himwakamonahu kukala kwenzaña hamuloña wakufuukula chatamaku. Ilaña mukwikalaña namuzañalu mpinji yejima. (Yish. 16:3) Yilwilu yenu yayiwahi yikukolesha akwenu akakwitiya atwansi niakulumpi. (1 Tim. 4:12) Nawa chasweja kulema, mukudiluñisha kuwunda kwenzaña hamuloña wakwikala amabwambu jindi amawahi.—Yish. 23:15, 16.