Yehova Wakamenaña Antu Jindi

1. Muloñadi Yesu chamulombeliyi Yehova nindi ayihembeña atumbanji twindi?

HAWUFUKU wakwila henohu Yesu kanda afwi, walombeli chuma chalema kudi Tata yindi wamwiwulu. Wamulombeli Yehova kwakamena atumbanji twindi. (Yow. 17:15, 20) Hela chochu, Yehova wakamenaña nikukiña antu jindi mpinji yejima. Ilaña, Yesu welukili nindi atumbanji akayimwesha kalula kudi Satana. Yesu welukili cheñi nindi anakukeñeka wukwashu waYehova kulonda ashindi nyihetu yaDiyabolu.

2. Kwesekeja naMasamu 33:18-20, muloñadi chitwatela kubulila kutiya woma yihuñu?

² Kaayi kanakuyuulawu kudi Satana kanayimakeni akaKristu alala makonu. Tunakumona kukala kunateli kutuneñesha nikumanisha wubwambu wetu naYehova. Ilaña, neyi chitukudiza muchinu chibaaba, kwosi chuma chinateli kututiyisha womaku. Yehova watwakamenaña, wamonaña kukala kutunakuhitamu nawa wadiloñesha kutukwasha. Tushinshikenu yakutalilahu yiyedi yamuBayibolu yinakumwekesha Yehova chakamenañayi “antu ejima amutiyaña woma.”—Tañenu Isamu 33:18-20.

NEYI TUNAKUMONA NETU TUDI NKAWETU

3. Mpinjinyi yitunateli kumona netu tudi nkawetu?

³ Hela chakwila twekala muchisaka cheneni chawakakudifukula, mpinji yikwawu tunateli kumona netu tudi nkawetu. Chakutalilahu, atwansi anateli kumona nawu adi nkawawu neyi anakulumbulwila akwawu akashikola yuma yakuhwelelawu hela neyi anabuukili muchipompelu chacheñi. Etu amakwawu twaneñaña neyi tutoñojoka hakukala kutunakuhitamu nakumona netu tudi nkawetu. Tunateli kushintajala kulejaku akwetu chitunakutiya nakwakama netu kwosi jakutiyawu. Mpinji yikwawu tunateli nikutoñojoka netu kwosi watwisha maana. Kutoñojoka netu tudi nkawetu, kunateli kutuletesha kumona netu twashikilamu wanyi nikutachika kwakama. Yehova hanakukeña nindi tutoñojokeña muniyi njilaku. Tunahoshelidi mwenimu?

4. Muloñadi kaprofwetu Elija chahosheleliyi nindi: “Yami wunashalihu hohu”?

⁴ Toñojokenu hadi muntu washinshika Elija. Yezebeli wamukanini nindi wukumujaha, dichi watemukili hadi mafuku 40. (1 Anya. 19:1-9) Nkumininaku, hampinji yadiñayi mwiyeñu nkawindi wadilili kudi Yehova nindi: “Yami [kaprofwetu] wunashalihu hohu.” (1 Anya. 19:10) Mwituña mwadiña atuprofwetu amakwawu; Obadiya wapulwishili atuprofwetu amakwawu kulonda abuli kuyijaha kudi Yezebeli. (1 Anya. 18:7, 13) Hanu dinu Elija watoñojokelelidi nindi wudi nkawindi? Komana watoñojokeleña nindi atuprofwetu ejima apulwishiliwu kudi Obadiya anafwi? Tahindi watoñojokeleña nindi wudi nkawawindi muloña wakwila kwosi amukalakeleleña Yehova hanyima yachuma chamumwekenini Bayali haMpidi yaKarimeli? Watoñojokeleña nindi kwosi welukili nindi wamweneña kukala, indi kwiji watoñojokeleña nindi kwosi wamwakameneneña? Bayibolu yashimuna nsañu yejima wanyi chaletesheli Elija ahoshi muniyi njila. Ilaña tweluka chikupu netu Yehova welukili chaletesheli Elija amoni nindi wudi nkawindi nawa welukili chakumukwasha.

5. Yehova wamukwashili ñahi Elija kwiluka nindi hadiña nkawindiku?

⁵ Yehova wamukwashili Elija munjila jajivulu. Wamukolesheli Elija kuhosha. Mapampa kayedi Wamwihwili Elija nindi: “Wunakwiladi kunu?” (1 Anya. 19:9, 13) Awa mapampa ejima, Yehova wamutiyilileña Elija chadiña nakuhoshayi. Yehova wamwakwili Ejila kuhitila mukudimwekesha kudi yena niñovu jindi jasweja. Wamulejeli cheñi Elija nindi wukweti akakudifukula amavulu. (1 Anya. 19:11, 12, 18) Chakadi nikujina, muchima waElija wawundili hanyima yakumulejamu Yehova chatiyileñayi nikutiya chamwakwiliwu. Yehova wamwinkeli Elija nyidimu yayivulu yalema. Wamulejeli kumuwayisha Hazayeli kulonda ekali mwanta wakuSiriya, Yehu kwikala mwanta muIsarela niElisha kwikala kaprofwetu. (1 Anya. 19:15, 16) Yehova chamwinkeliyi Elija iyi nyidimu wamukwashili kutoñojoka hayuma yayiwahi. Nzambi wamwinkeli cheñi ibwambu wamuwahi, Elisha. Yehova nateli kuyikwasha ñahi neyi munakumona nenu mudi nkawenu?

6. Yumanyi yimwatela kulomba neyi munakumona nenu mudi nkawenu? (Masamu 62:8)

⁶ Yehova nakutuleja nindi mulombenuña. Nakumona kukala kumunakuhitamu nawa nakuyileja nindi wukutiya kulomba kwenu mpinji yidi yejima. (1 Tes. 5:17) Watiyaña kuwaha kutiyilila kudi akakudifukula indi. (Yish. 15:8) Yumanyi yimwatela kulomba neyi munakumona nenu mudi nkawenu? Mulejenuña Yehova yuma yidi kumuchima neyi cheliliyi Elija. (Tañenu Isamu 62:8.) Mulejenu yuma yinakuyakaminisha nichimunakutiya. Mulombenu Yehova ayikwashi kuumika. Chakutalilahu, neyi munakumona nenu mudi nkawenu nawa munakutiya woma hampinji yimunakushimwina kushikola, mulombenu Yehova ayikwashi kuhamuka kulonda mushimwini. Munateli nikulomba maana akuyikwasha kulumbulula yuma yimwakuhwelela. (Luka 21:14, 15) Neyi munakutiya chineñi, mulombenu Yehova ayikwashi kuhosha namukaKristu wapama hanoyu nsañu. Munateli kumulomba Yehova kulonda amukwashi muntu imunakukeña kulejaku oyu nsañu atiyi chimunakutiya. Mulejenu Yehova yuma yidi kumuchima, ilukenu chikwakulayi kulomba kwenu nawa itejenu wukwashu wawantu amakwawu chumichi chikuyikwasha kuleka kutoñojoka nenu mudi nkawenu.

7. Yumanyi yimunadizili kudi Mauricio?

⁷ Yehova watwinka wejima wetu mudimu wawuwahi wakuzata. Mwatela kukuhwelela nenu wamonaña nikusakilila hayuma yejima yimwelaña hakuzata mudimu wayinkayi muchipompelu nimumudimu wakushimwina. (Mas. 110:3) Kuzata iwu mudimu kunateli kuyikwasha ñahi neyi mutoñojoka nenu mudi nkawenu? Talenu chakutalilahu chamanakwetu wakansi wejina daMauricio.b Hanyima yakwila Mauricio napapatishewi, ibwambu didi wumu adikundiliyi nindi watachikili kufuma muchalala. Mauricio wahosheli nindi: “Chinamweni nafumi muchalala nakameneni. Najinookeleña neyi nukutwesha kushikija munakanini nikutwalekahu kwikala muchisaka chaYehova. Natoñojokeleña nami nidi nkawami nawa kwosi wukwiluka chinnakutiya.” Chumanyi chamukwashili Mauricio? Wahosheli nindi: “Natachikili kushimwina nankashi. Chumichi chankwashili kuleka kutoñojoka hadi ami aweni nichinatiyileña. Nekalili cheñi namuzañalu nawa nalekeli kumona nami nidi nkawami hampinji yinazatileña nawakwetu mudimu wakushimwina.” Hela chakwila, tunakushimwina wanyi nawakwetu akakwitiya mesu namesu, tunakudikolesha wumu namukwawu kushimwina hamu kuhitila mukusoneka nyikanda nimafoni. Chumanyi chikwawu chamukwashili Mauricio? Wabombelelihu nindi: “Nazatileña cheñi nyidimu yikwawu muchipompelu. Nazatileña hakumina ñovu jami kuloñesha nikuhana mpanji yawatudizi. Iyi nyidimu yankwashili kwiluka nami Yehova wankeña niamanakwetu.”

NEYI TUNAKUNEÑA MULOÑA WAKUMONA KUKALA KWASWEJA

8. Indi kukala kwasweja kunateli kutuletesha kutoñojoka ñahi?

⁸ Twatela kukuhwelela kumona kukala munanu mafuku akukuminina. (2 Tim. 3:1) Hela chochu, kukala kunateli kutushikena hampinji yitunabuli kukuhwelela. Tunateli kumona kukala kwamali, kutukwata nachikatu cheneni hela kujimbesha ntaña yetu. Mumpinji yamuchidiwu tunateli kuneña chikupu neyi iku kula kunadilondashani hela kumwekena hampinji yimu. Hela chochu, anukenuña nenu Yehova watwakamenaña nawa nawukwashu windi tunateli kuumika kukala kwejima.

9. Lumbululenu kukala kwamweniyi Yoba.

⁹ Talenu Yehova chamukwashiliyi muntu washinshika Yoba. Wamweni kukala kwasweja mumpinji yantesha. Ifuku dimu Yoba watambwilili nsañu yatama nawa yakuhayamisha hakutiya nawu yimuna yindi anayijahi, ambuña indi anafwi nawa chasweja kutama anyanindi afwili. (Yoba 1:13-19) Hashimbwili wanyi iku wuchidi nachineñi, Yoba wakatili chikatu chatama nawa chayeña nankashi. (Yoba 2:7) Yoba wakabakeni nankashi chakwila wahosheli nindi: “Wumi wami nawuheli chikupu; hinnakukeña kutwalekahu kuhandaku.”—Yoba 7:16.

10. Yehova wamukwashili ñahi Yoba kuumika kukala kwamweniyi? (Talenu mwevulu wudi hakava.)

¹⁰ Yehova wadiña nakumwakamena Yoba. Chineli Yehova wadiña wamukeña Yoba, wamukwashili kulonda omiki kukala kwindi. Yehova wahosheli naYoba, nakumuleja nindi wukweti maana abadika nawa wakamenaña yileñaleña yindi. Wamulejeli anyama akuhayamisha. (Yoba 38:1, 2; 39:9, 13, 19, 27; 40:15; 41:1, 2) Cheñi, Yehova wamuzatishili Elihu mukwenzi washinshika kulonda amukoleshi nikumukundeja Yoba. Elihu wamulejeli nindi Yehova wasomwenaña mpinji yejima akakudifukula indi hakuumika kwawu. Ilaña, Yehova wamuzatishili Elihu kulonda amufumbi Yoba. Elihu wamukwashili Yoba kubula kusweja kutoñojoka hadi yomweni nanochu chamwanukishiliyi chakehelamu kudi Yehova. (Yoba 37:14) Yehova wamwinkeli cheñi Yoba mudimu wakuyilombelaku amabwambu jindi asatu avulumwini. (Yoba 42:8-10) Yehova watukwashaña ñahi makonu neyi tunakumona kukala?

11. Bayibolu yatukundejaña ñahi neyi tunakumona kukala?

¹¹ Yehova hahoshaña nanetu kanwa nakanwa neyi cheliliyi naYobaku, ilaña wahoshaña nanetu kuzatisha Izu dindi Bayibolu. (Rom. 15:4) Watukundejaña kuhitila mukuchiñeja kwakumbidi. Talenu yakutalilahu yantesha yamuBayibolu yinateli kutukundeja neyi tunakuhita mukukala. MuNsona, Yehova watuleja nindi kwosi chuma, kushilahu nikukala kwasweja, chinateli “kutwambula kukukeña [kwindiku].” (Rom. 8:38, 39) Watulejaña cheñi nindi “wudi kwakwihi nanowu ejima anakumutambika” mukulomba. (Mas. 145:18) Yehova watulejaña nindi neyi tumushindamena, tukuumika makabi ejima nawa tunateli kwikala namuzañalu hela chakwila tunakukabakana. (1 Kor. 10:13; Yak. 1:2, 12) Izu daNzambi datwanukishaña nawu kukala kutunakumona kwakapinji kantesha neyi tukwesekeja nankisu jahaya nyaaka jitukatambwila. (2 Kor. 4:16-18) Yehova watuleja nindi wakafumishahu chuma chaletaña kukala kwejima, dikwila nawu Satana Diyabolu niejima embujolaña yilwilu yindi yatama. (Mas. 37:10) Munahembihu mavasi amuBayibolu akayikwasha kuumika makabi kumbidi?

12. Yumanyi yakeñañayi Yehova nindi twileña neyi tunakukeña netu Izu dindi ditukwashi?

¹² Yehova wakeñaña nindi twikaleña nampinji yakudiza Bayibolu mpinji yejima nikutoñojokahu chikupu hayuma yitunakutaña. Neyi tuzatishaña yuma yitunakudiza, chikuhwelelu chetu chikukolelaku nawa tukuswina kwakwihi naTata yetu wamwiwulu. Nawa chumichi chikutukwasha kuumina kukala. Yehoha cheñi wahanaña spiritu yindi yajila kudi antu ashindamena Hezu dindi. Nawa iyi spiritu yinateli kutwinka “ñovu yabadika hañovu jawantu” kulonda tutweshi kuumika kukala.—2 Kor. 4:7-10.

13. Indi yakuda yakuspiritu yatwinkaña “nduñu wamaana nikashinshi” yatukwashaña ñahi kuumika kweseka?

¹³ Yehova nakukwasha “nduñu wamaana nikashinshi” kwidisha yibaaba yayivulu, mavidiyo, nitumina tunakutukwasha kwikala nachikuhwelelu chakola nikwikala nawubwambu wakola naYehova. (Mat. 24:45) Tuzatisheña chiwahi iyi yuma yinakutuloñeshelawu. Muhela wakuUnited States katataka wasonekeli nakusakilila hayakuda yakuspiritu yejima. Wahosheli nindi: “Hadi yaaka 40 yinamukalakeli Yehova nahiti mukukala kwakuvulu nankashi.” Wamweni kukala kwakuvulu, ankaaka yindi ayijahili kudi ñendeshi wendesheleña iku nasheti, anvwali jindi afwili nachikatu chafwana nawa yomweni wakatili kansa kayedi. Chumanyi chamukwashili kuumika? Walumbulwili nindi: “Yehova wañakamenaña mpinji yejima. Yakuda yakuspiritu yatuloñeshelañayi kuhitila mudi nduñu wamaana nikashinshi yinankawashi kuumika. Hamuloña wachumichi, inakutiya neyi chatiyiliyi Yoba, wahosheli nindi: ‘Nukuhembaña kashinshi kami, nichinakafwa!’”—Yoba 27:5.

14. Yehova wazatishaña ñahi akwetu akakudifukula kutukwasha mumpinji yakala? (1 ATesalonika 4:9)

¹⁴ Yehova nadizishi antu jindi kudikeña wumu namukwawu nikudikundeja mumpinji yakala. (2 Kor. 1:3, 4; tañenu 1 ATesalonika 4:9.) Kufwana Elihu, amanakwetu niahela anakutukwasha kutwalekahu kukwikala ashinshika neyi tunakuhita mukukala. (Yilw. 14:22) Chakutalilahu, talenu chipompelu mwekala Diane chichamukolesheli nikumukwasha kutwalekahu kwikala wakola kuspiritu hanyima yakwila nfumwindi akati chikatu chafwana. Wahosheli nindi: “Chadiña chakala. Ilaña twamweni Yehova chatukwashiliyi nichatwakameneniyi muniyi mpinji yakala. Chipompelu chetu chatukwashili hama. Atuhempwileña, kututemeshela jifoni nawa chatwakameneniwu amanakwetu niahela chatukwashili kuumika. Chineli nidana motoka, amanakwetu niahela ansendeleña kukupompa nimumudimu wakushimwina neyi nukutwesha.” Twatiyaña kuwaha muloña tukweti amanakwetu niahela muchipompelu!

TUSAKILILEÑA CHATWAKAMENAÑAYI YEHOVA

15. Muloñadi chitukuhoshela netu tunateli kuumika kukala kudi kwejima?

¹⁵ Wejima wetu tukamona kukala. Ilaña, neyi chitunadizi, hitwakekala nkawetu neyi tunakumona kukalaku. Neyi chekala nvwali wamuwahi, Yehova watwakamenaña mpinji yejima. Wudi kwakwihi nanetu, nakukeña kutiyilila kulemba kwetu nawa nakufwila kutukwasha. (Isa. 43:2) Tuneluki chikupu netu tunateli kuumika kukala muloña watwinka yuma yejima yatela kutukwasha kuumika. Watwinka yawaana yayivulu, watwiteja kumulomba, watwinka Bayibolu, yakuda yakuspiritu yayivulu niamanakwetu atukwashaña mumpinji yakala.

16. Chumanyi chitwatela kwila hakwila Yehova atwalekihu kutwakamena?

¹⁶ Twasakilliaña nankashi hakwikala naTata yetu wamwiwulu watwakamenaña. “Nyichima yetu yazañalelaña mudi yena.” (Mas. 33:21) Tunateli kumwekesha netu twamusakililaña Yehova hachatwakamenañayi neyi tuzatishaña yuma yejima yatwinkayi. Twatela cheñi kuzata nañovu kulonda Nzambi atwalekihu kutwakamena. Munjila yikwawu, neyi tumwovwahilaña Yehova nakwila yuma yaloña kumesu indi, wukutwakamenaña haya nyaaka!—1 Pet. 3:12.