‘Twalekenuhu Kwenda Muchalala’

1. Yumanyi yayiwahi yafumañamu neyi tunakuhanjeka chitwadizili “chalala?”

“MWADIZILI ñahi chalala?” Chakadi nikujina ilu lwihu munalwakuli mapapa kakavulu. Dilwihu lwavula kwihulawu amanakwetu niahela neyi tunadiwani katachi. Kakavulu twatiyaña kuwaha kwiluka amanakwetu niahela chamwilukiliwu Yehova nikumukeña nawa twatiyaña kuwaha kuyileja chitwalemesha chalala. (Rom. 1:11) Neyi tunakuhanjeka haniyi nsañu chatukwashaña kutoñojoka chitwakeña chalala. Nawa chatukwashaña ‘kutwalekahu kwenda muchalala,’ dikwila nawu, kwila yuma yinateli kutukwasha kutwalekahu kwikala nawuselewa waYehova.—3 Yow. 4.

2. Tukudizadi muchinu chibaaba?

² Muchinu chibaaba, tukuhituluka muyuma yaletesha tukeñi chalala. Kuhiñahu tukuhanjeka chitunateli kutwalekahu kukeña ichi chawaana. Chakadi nikujina, kuhituluka muniyi nsañu kukutukwasha kwiluka chaletesha Yehova atuleti muchalala. (Yow. 6:44) Chumichi chikutusañumuna cheñi kulejaku antu amakwawu chalala.

CHITWAKEÑELA “CHALALA”

3. Chumanyi chalema chaletesha tukeñi chalala?

³ Kudi yuma yayivulu yaletesha tukeñi chalala. Chuma chasweja kulema, twamukeña Yehova Nzambi, Mwini chalala. Kuhitila Mwizu dindi, Bayibolu, twamwiluka netu diyi Nleñi wewulu niiseki wukweti ñovu chikupu nawa hiTata yetu wamwiwulu wukweti kukeña nawa watwakamenaña chiwahi. (1 Pet. 5:7) Tweluka netu Nzambi “wukweti luwi niwushona, hazuwaña swayiku nawa wavulisha kukeña kwakashinshi nichalala.” (Kwid. 34:6) Yehova wakeña wuñanji. (Isa. 61:8) Chamukataña hakumona etu tunakukabakana nawa wadiloñesha, eña wafwilaña chikupu, kumanisha yihuñu yejima hampinji yatoñolayi. (Yere. 29:11) Chumichi chikawaha nankashi! Dichitwamukeñela Yehova nankashi!

4-5. Muloñadi kapostolu Pawulu chesekejeleliyi kuchiñeja kwetu nachikuñu chakwimika nachu?

⁴ Chumanyi chikwawu chaletesha tukeñi chalala? Mukwiluka chalala mwafumaña yuma yayiwahi. Talenu chakutalilahu. Chalala chamuBayibolu mwabombela yuma yitwachiñejaña kumbidi. Hakwila twiluki kulema kwaniku kuchiñeja kapostolu Pawulu wasonekeli nindi: “Tukweti iku kuchiñeja kudi neyi chikuñu chakwimika nachu wumi wetu, kwalala nawa kwakola mbe-e.” (Heb. 6: 19) Neyi chikuñu chakwimika nachu watu chichemikaña watu, kuchiñeja kamuBayibolu nikwena kwatukwashaña kuumika kukala kutwamonaña.

⁵ Muniyi vasi, Pawulu wateneneña kuchiñeja kwamwiwulu kwawakaKristu awahishewa. Ilaña mazu indi anakundami cheñi niakaKristu achiñejaña kushakama muparadisa hamaseki. (Yow. 3:16) Mwamweni, kudiza hakuchiñeja kwakushakama haya nyaaka kunatukwashi kushakama chihandilu chachiwahi.

6-7. Kudiza chalala hayuma yakumbidi kwamukwashili ñahi Yvonne?

⁶ Talenu chuma chamumwekeneni muhela Yvonne. Hakulilili muchalalaku nawa hadiñayi kansi wachinineña kufwa. Wanukaña watañili mukuku wamazu wabula kuvulamenayi, wahosheleña nawu: “Ifuku dimu hidakekalaku cheñi kumadikiku.” Dichi wahosheli nindi: “Awa mazu anleñeleli kubula kukama wufuku wejima nikutachika kutoñojoka hachihandilu chakumbidi. Natoñojokeli nami, ‘Kudi yuma yalema yinatela kwila muchihandilu.’ Nadihwili nami ‘Muloñadi chinekalilaku?’ Hinakeñeleña kufwaku.”

⁷ Kuhiñahu, Yvonne hadiñayi kampululu wadibulakeni nawaYinsahu jaYehova. Washimwini nindi: “Natachikili kukuhwelela nami nateli kwikala nakuchiñeja kwakushakama haya nyaaka muParadisa hamaseki.” Indi kudiza chalala kwamukwashili ñahi muhela? Wabombelelihu nindi: “Chayinu mpinji hinachishaña nakwakama chihandilu chakumbidi hela kufwaku.” Neyi chitunamoni, Yvonne walemesha chikupu chalala nawa watiyaña kuwaha kulejaku akwawu yuma yakumbidi yachiñejañayi.—1 Tim. 4:16.

8-9. (a) Muchishimu chaYesu, iyala wumu walemesheli ñahi iheta dawaniniyi? (b) Chalala mwachilemesha ñahi?

⁸ Chalala chamuBayibolu munabombeli cheñi nsañu yayiwahi yaWanta waNzambi. Yesu wesekejeli chalala chahosha haWanta neheta daswekawu. Neyi chasonekawu haMatewu 13:44, Yesu wahosheli nindi: “Wanta wamumawulu wudi neyi iheta daswekawu mwisaña dawaniniyi muntu hakudisweka; nawa muloña wamuzañalu watiyiliyi, hakuya nakulandisha yuma yindi yejima nakulanda odu isaña.” Mwatela kwiluka nenu iwu iyala wakeñakeñeleña iheta wanyi. Ilaña chadiwaniniyi, walekeli yuma yayivulu kulonda ekali nadu. Kafwampi walandishili yuma yindi yejima. Muloñadi? Muloña welukili nindi dadiña dalema chikupu. Dadiña dalema kubadika yuma yejima yashiliyi.

⁹ Komana ichi dichimwamonaña chalala? Chakadi nikujina dichimwachimonaña! Tweluka netu kwosi chuma chidi chejima munu mukaayi chinateli kwesekana namuzañalu wutukweti muloña wakumukalakela Yehova makonu nihakuchiñeja kwakushakama haya nyaaka muWanta waNzambiku. Kwosi chuma chinateli kwesekana nakudiluñisha wubwambu wawuwahi naYehovaku. Twekalaña namuzañalu muloña ‘twamutiyishaña kuwaha chikupu.’—Kol. 1:10.

10-11. Chumanyi chaletesheli Michael ahimpi chihandilu chindi?

¹⁰ Etu amavulu twashiya yuma yayivulu kulonda tumukalakeli Yehova. Amakwawu alekeli nyidimu yamali chikupu. Amakwawu alekeli kufwila maheta. Amakwawu niwena ahimpili yihandilu yawu hanyima yakumwiluka Yehova. Dichuma cheliliyi Michael. Hakulilili muchalalaku. Hadiñayi kansi wadizili karati. Wahosheli nindi: “Nazatileña nañovu kulonda nitwalekihu kwikala wakola kumujimba. Mpinji yikwawu, nadimweneña nami kwosi wunateli kuñeta.” Ilaña Michael chatachikiliyi kudiza Bayibolu, welukili chamonañayi Yehova madombu. (Mas. 11:5) Michael wahosheli hadi adisumbula amudizishileña Bayibolu nindi: “Ankaanishili wanyi kuleka kudiza karati ilaña atwalekelihu hohu kundizisha chalala chamuBayibolu.”

¹¹ Michael chatwalekeliyi kudiza hadi Yehova, waswejeleliku kumukeña. Chuma chamutiyishili kuwaha nankashi hikumona Yehova chatiyilañayi wushona akakudifukula indi. Mukuhita kwampinji, Michael welukili nindi watela kuhimpa. Wahosheli nindi: “Namweneña nami hinukutwesha kuleka karatiku. Ilaña nelukili cheñi nami neyi nileka nikumuzañalesha Yehova, nelukili chikupu nami kwosi chuma chikubadika kumukalakelaku.” Michael wamwekesheli kusakilila hachalala chawaniniyi nawa chumichi chamukwashili kuhimpa muchihandilu chindi.—Yak. 1:25.

12-13. Chalala chamuBayibolu chamukwashili ñahi Mayli?

¹² Hakwila Bayibolu yimwekeshi kulema kwachalala, yesekeja chalala nenoñu dinakumunyika mumwidima. (Mas. 119:105; Efwe. 5:8) Mayli, wakuAzerbaijan, wasakililaña hakudiza chalala chaMwizu daNzambi. Wakulilili muchisaka mwadiña kwitiya kwashiyashana. Tata yindi wadiña Muslim, mama yindi wadiña kaYudeya. Wahosheli nindi: “Hela chakwila najinookeleña wanyi nami Nzambi wekala koku, nadiña namalwihu amavulu. Nadihwileña nami, ‘Muloñadi Nzambi chaleñeleliyi antu, nawa muloñadi muntu chikukabakenayi muchihandilu chindi chejima kuhiñahu akamukabishi haya nyaaka muhelu?’ Chineli antu ahosheleña nawu yuma yejima yamwekanaña hikukeña kwaNzambi, nadihwili nami, ‘Komana Nzambi himuntu watiyaña kuwaha kumona antu anakukabakana?’”

¹³ Mayli watwalekelihu kukeñakeña ñakwilu yanawa malwihu. Mukuhita kwampinji watachikili kudiza Bayibolu nawa wenjili muchalala. Wahosheli nindi: “Bayibolu chiyahosha choloka yankwashili kuhimpa chinamweneña yuma muchihandilu. Nsañu yekala Mwizu daNzambi chayilumbululawu chiwahi chaletelaña kuwunda kwakweni.” Kufwana Mayli, wejima wetu twamushimekaña Yehova, “[watutambikili] kufuma mumwidima nindi [twinzi] kuchejeji chindi chakuhayamisha.”—1 Pet. 2:9.

14. Tunateli kusweja ñahi kukeña chalala? (Talenu chikasha chinakwila nawu “Yuma Yikwawu Yitunateli Kwesekeja Nachu.”)

¹⁴ Iyi hiyakutalilahu yatensha hohu yinakumwekesha kulema kwachalala. Munateli kutoñojoka nihayakutalilahu yikwawu. Hakudiza kwahalwenu, kwila musandujola yuma yikwawu yikuletesha tukeñi chalala nehi? Neyi tusweja kukeña chalala, tukuwana njila yikwawu yakusweja kukeñelamu chalala.

CHITUNATELI KUMWEKESHA NETU TWALEMESHA CHALALA

15. Njilanyi yimu mutunateli kumwekesha netu twakeña chalala?

¹⁵ Tunateli kumwekesha netu twalemesha chalala neyi tutañaña Bayibolu ninyikanda yashindamena haBayibolu. Hela chakwila tunashimbuli muchalala, kudi yuma yayiha yitwatela kudiza. Kaposhi Kakutalila katachi kahosheli nawu: “Chalala chidi neyi nkenu yanyanya yidi muchinkalampata, yinanyeñumukiwu kwakwihi nakuyibuta kudi matahu amalehi. Neyi muyiwana mwatela kuyitalatala. . . . Neyi munakukeña kuyisenda mwatela kubandama nakuyibwita. Bayi mumona hohu muchidi wumu wankenu yachalala nenu wunawanini. . . . Keñelenuhu jikwawu jajivulu.” Kudiza kwapela wanyi ilaña mwafumaña yuma yayiwahi nankashi.

16. Njilanyi yimwazatishaña hakudiza? (Yishimu 2:4-6)

¹⁶ Bayi neyi wejima wetu twakeña kutaña nikudizaku. Ilaña Yehova watulejaña nindi tutwalekihu “kukeñakeña” yuma yakunama yachalala. (Tañenu Yishimu 2:4-6.) Mukukeñakeña, mwafumaña yuma yayiwahi. Corey wahosheli nindi neyi nakutaña Bayibolu nkawindi, washaña maana havasi yimu yinakutañayi. Walumbulwili nindi: “Nukutaña mafutunoti ejima, nsona jikwawu jinateniwu nikusandujola chikupu. . . . Nadizaña yuma yayivulu nankashi kuzatisha iyi njila!” Hela chakwila twazatishaña iyi njila hela yikwawu, twamwekeshaña netu twasakililaña chalala neyi twikalaña nampinji yakudiza.—Mas. 1:1-3.

17. Kuhemba chalala kwatalisha mudihi? (Yakoba 1:25)

¹⁷ Hela chochu, hitwatela kukumina dakudiza chalalaku. Twatela kuhemba chalala dikwila nawu, kuzatisha yuma yitunakudiza muchihandilu chetu. Chikufumamu tukwikala namuzañalu waweni. (Tañenu Yakoba 1:25.) Tunateli kumwekesha ñahi netu tunakuzatisha yuma yitunakudiza? Manakwetu wumu wahosheli nindi twatela kudishinshika muchihandilu chetu kulonda tumoni mutunakwila chiwahi nihitwatela kuzatila. Kapostolu Pawulu wahosheli nindi: “Kwesekeja nakupama kwejima kutunapaminiku, tutwalekenuhu kwenda chiwahi muniyi njila yoyimu.”—Fwili. 3:16.

18. Muloñadi chitwazatilaña nañovu kulonda ‘twendeña muchalala’?

¹⁸ Toñojokenu hayuma yayiwahi yezaña hamuloña wakutwalekahu kuzata nañovu kulonda ‘twendeña muchalala’! Twawahishañaku chihandilu, twamuzañaleshaña Yehova niakwetu akakwitiya. (Yish. 27:11; 3 Yow. 4) Kudihu yuma yabadika iyi yikutuletesha tukeñi chalala nikuchihemba?