Munakwanuka?

Munatañi Tuposhi Twakutalila twachinu chaaka? Talenu neyi mukutwesha kwakula awa malwihu:

Akatukiswila ñahi neyi twikalaña nampinji yakuhanjeka naYehova, kumutiyilila nikutoñojoka hadi Yena?

Tukufuukulaña chiwahi, tukwikala antañishi amawahi, tukwikala nachikuhwelelu chakola, nawa tukusweja kumukeña Yehova.—w22.01, mafu 30-31.

Akutukwashaña ñahi neyi tumukuhwelelaña Yehova niantu amwimenañaku?

Ayinu diyi mpinji yitwatela kukuhwelela chikupu munjila yelilañamu Yehova yuma kuhitila mukubula kujinoka wunlomboli ninshimbi jatwinkañawu kudi akulumpi. Neyi lukadi lwasweja lunenzi, twakanyakala kwovwahila hela chakwila tunatambwili nshimbi jinakumwekana neyi jakala kwovwahila.—w22.02, mafu 4-6.

Kañelu watalishili mudihi hamulejeleñayi Zekariya kutalisha ‘hamwonji wakwolola nachu wadiña muchikasa chaNguvulu Zerubabeli’? (Zek. 4:8-10)

Ichi chimwenu chayikwashili antu jaNzambi kukuhwelela nawu iyi tembeli yatuñileñawu yakamana nawa yakekala neyi chakeñeleñayi Yehova nindi yiikali.—w22.03, mafu 16-17.

Tunateli kwikala ñahi “[akutalilahu] . . . mukuhosha”? (1 Tim. 4:12)

Twahoshaña naluwi nawa nakalemesha mumudimu wakushimwina, kwimba namuchima wejima, kwakulahu mpinji yejima hakupompa, nawa twahoshaña chalala nikukolesha akwetu kuhitila mukutondolwela nhoshelu yakasawuntu.—w22.04, mafu 6-9.

Muloñadi anyama awana azuwa (mawanta) ashimunawu haDanyeli kapetulu 7 chayibombelawu nakwikala kanyama wumu neyi chalumbulula Chimwekeshu 13:1, 2?

Kanyama ashimunawu haChimwekeshu 13 hemenañaku wanta wumu hohuku, chidi neyi Roma. Ilaña nakwimenaku mawanta amukaayi añovu anayuuli muchidi wamuntu.—w22.05, ifu 9.

Njilanyi yimu mutunateli kumwekeshela netu twakuhwelela muwuñanji waNzambi?

Neyi muntu natutuki, natuhilishi hela natuvulumuni, hitwazuwaña hela kuhemba nduluku, ilaña twashiyaña yuma yejima mumakasa aYehova. Wakafumishahu yuma yejima yenzaña muloña wanshidi.—w22.06, mafu 10-11.

Chumanyi chatela kwanukañayi manakwetu wunakulomba hakupompa?

Bayi neyi kulomba hinjila yakufumbilamu chipompelu hela yakubidikilamu nsañuku. Sweje-e hakutachika kupompa, ‘kuvulisha mazu’ kwakeñekaña wanyi. (Mat. 6:7)—w22.07, mafu 24-25.

Munjilanyi antu “akoñeleña yuma yatama [mwakasañukilawu] kukuyisompesha”? (Yowanu 5:29)

Hiyakayisompesha kushindamena hanshidi yakoñeliwu kunyimaku. Akayihitulukamu kushindamena hayilwilu yakamwekeshawu hanyima yakuyisañula.—w22.09, ifu 18.

Mpanjinyi yakuzañalesha yahaniniyi J. F. Rutherford hakupompa kweluña kwadiña muSeptember 1922?

Hakupompa kweluña kwadiña kuCedar Point, muOhio, U.S.A., wabidikili nindi: “Mwanta hakuyuula! Yenu mwatela kumutiyakesha kudi antu ejima. Dichi, tiyakeshenu, tiyakeshenu, tiyakeshenu, Mwanta niWanta windi!”—w22.10, mafu 3-5.

Isaya kapetulu 30 kashimunaña njilanyi jisatu mwatukwashilañayi Nzambi kuumika?

Aka kapetulu kamwekeshaña nawu (1) watutiyaña nawa wakulaña kulomba kwetu, (2) watwinkaña wunlomboli, nawa(3) watukiswilaña chayinu mpinji nawa wakela chochimu nikumbidi.—w22.11, ifu 9.

Tukukunkulwiladi netu mazu ekala haIsamu 37:10, 11, 29 ashikijeweli kunyima nawa akashikijewa kumbidi?

Mazu aDavidi alumbulula yuma yayiwahi yadiluñishileñawu antu muIsarela, chidi neyi hampinji yayuulileñayi Solomoni. Yesu wahosheleña haparadisa yakumbidi nawa wahosheli hamazu ekala havasi 11. (Mat. 5:5; Luka 23:43)—w22.12, mafu 8-10, 14.