1 | Kulomba ‘Umbilenu Kwakama Kwenu Kwejima Hadi Yena’

BAYIBOLU YAHOSHAÑA NAWU: ‘Umbilenu kwakama kwenu kwejima hadi [Nzambi], muloña yena wayakamenaña.’—1 PETULU 5:7.

Mwatalisha Awa Mazu

Yehova Nzambi watulejaña nindi tumulejeña chitelu chetu chejima chidi muyitoñojoka nimumuchima. (Isamu 55:22) Tunateli kulomba hakukala kwejima kutukweti, chili kweneni hela kwanyanya. Neyi iku kukala kunakutukabisha, Yehova niyena watiyaña kutama. Kulomba kudi yena dichuma chasweja kulema chinateli kutukwasha kwikala nakuwunda kwamuyitoñojoka.—AFwilipi 4:6, 7.

Kulomba Chikunateli Kutukwasha

Neyi tunakukabakana nayitoñojoka, tunateli kutachika kutiya netu tudi nkawetu. Mpinji jikwawu antu amakwawu hiyanateli kwiluka kukala kutunakuhitamuku. (Yishimu 14:10) Ilaña neyi tumuleja Nzambi mukulomba kukala kwejima kutukweti, wukutukundejaña nikututiyilila. Yehova watumonaña, weluka yihuñu yitwahitañamu nikukala kutwalwishaña naku, nawa wakeñaña nindi tumulejeña mukulomba chuma chejima chinakutwakamisha.—2 Kushindulula 6:29, 30.

Neyi tuhanjekaña naYehova mukulomba chikutukwashaña kwiluka chikupu netu watwakamenaña. Tukutiya neyi chatiyiliyi ñimbi yaMasamu walombeli nindi: “Wunamoni makabi ami; wuneluki yihuñu yami yamaneni.” (Isamu 31:7) Neyi twiluka netu Yehova wamonaña kukala kwejima kutunakuhitamu, chikutukwasha kutwalekahu kuumika kukala kwejima kutukweti. Ilaña kudi yuma yikwawu yelañayi kubadika kwiluka hohu yihuñu yitunakuhitamu. Kubadika muntu wudi wejima, welukaña kukala kwejima kutunakuhitamu nawa watukundejaña nikutukolesha kuhitila muBayibolu.

Bayibolu Chiyinakukwasha Antu Julian

Chinakabakanaña Muloña waKwakama

“Nalwishaña nakwakama nichikatu chatenañawu nawu obsessive-compulsive disorder (OCD). Nakamaña hampinji yinnabuli nikukuhwelela. Nelaña aha nidi chiwahi, mukuhita hohu kapinji kanti nikutachika kwakama nankashi chakadi nichuma chinakuñakamisha. Kakavulu natachikaña kwakama neyi nidi hadi antu. Nakamaña nankashi muloña nelukaña wanyi chinakuntoñojokelawu.

“Antu eluka kukala kwinnakuhitamu ankoleshaña. Kuhosha hohu chalala, mpinji jikwawu yuma yahoshañawu yankwashaña wanyi. Hela chochu, nasakililaña chazatañawu nañovu kufwila kunkwasha.

“Mpinji jikwawu neyi nitachika kwakama nawa OCD yinkwata, chankalilaña kulomba. Chakeñekaña kutoñojoka chikupu hakwila nishiku maana hampinji yinnakulomba kudi Yehova. Natoñojokaña hayuma yayivulu hampinji yoyimu chakwila naluwankanaña. Neyi yitoñojoka yami yinemani, chankalilaña kuhosha chinnakutoñojoka nichinnakutiya.”

Bayibolu Chiyankwashaña

“Nadiza muBayibolu nawu kulomba hikwatela kwikala kwakulehi hela kwakulumbulula chiwahi hakwila Nzambi akutiyiku. Mpinji jikwawu neyi nakañanyi kulumbulula chinnakutiya, nakuminaña dakulomba nami: ‘Eyi Yehova, nalembi nkwashi.’ Hela chochu, neluka nami Yehova weluka chinatiyaña nawa wañakulaña kwesekeja nachuma chinnakukeña hanoyu mpinji. Kubombela hakulomba, nayaña cheñi nakudimona nawandotolu. Inakutiya kuwaha kuhosha nami muloña waniwu wukwashu wuyedi, chikatu chami chinakehañani nankashi. Hela chochu, nazataña nañovu hakwila nihanjeki naTata yami wamwiwulu kulonda ankwashi.”