Twalekenuhu Kudiloñesha naKwinza Kwefuku daYehova

1. Chumanyi chitwatela kwila hakwila twakapuluki hefuku daYehova?

NEYI Bayibolu yinakuhosha ‘hefuku daYehova,’ yatenaña mpinji yasompeshañayi Yehova ayilumbu jindi nakuleta wamwinu kudi antu jindi. Kunyima, mpinji jikwawu Yehova wadiña nakusompesha antu. (Isa. 13:1, 6; Ezek. 13:5; Zef. 1:8) Munanu mafuku etu, “ifuku daYehova” dakatachika mpinji yakamulukukawu Babiloni Muneni nakushika kunjita yaAmagedoni. Hakwila twakapuluki hanodu “ifuku,” twatela kudiloñeshela chadimu yoyinu mpinji. Yesu wahosheli nindi hitwatela hohu kudiloñesha ‘nalukadi lwaswejaku,’ ilaña cheñi twatela ‘kutwalekahu kwikala adiloñesha.’—Mat. 24:21; Luka 12:40.

2. Muloñadi chitukuhoshela netu mukanda wa 1 Atesalonika wunateli kutukwasha?

² Mumukanda windi watachi wonenewa wayisonekeleliyi aTesalonika, kapostolu Pawulu wazatishili yakutalilahu yayivulu kulonda akwashi akaKristu kutwalekahu kwikala adiloñesha nefuku daYehova deneni dawunsompeshi. Pawulu welukili nindi ifuku daYehova dikwinza hayoyina mpinji wanyi. (2 Tes. 2:1-3) Hela chochu, wayikolesheli amanakwindi kudiloñeshela chadimu nanidi ifuku neyi kwiji dakenza kumadiki, ninetu tunateli kuzatisha kufumba kwindi. Tuhanjekenu chalumbulwiliyi awa mazu: (1) chakenza ifuku daYehova, (2) akabula kupuluka hanodu ifuku, nawa (3) chitunateli kudiloñesha hakwila twakapuluki.

IFUKU DAYEHOVA DAKENZA ÑAHI?

3. Ifuku daYehova dakenza ñahi neyi chenzañayi ikombi nawufuku? (Talenu cheñi mwevulu.)

³ “Neyi chenzañayi ikombi nawufuku.” (1 Tes. 5:2) Ichi dichakutalilahu chatachi hayakutalilahu yazatishiliyi hakulumbulula kwinza kwefuku daYehova. Kakavulu amakombi elaña yuma mukunyakashana nawa nawufuku hampinji yinabuli kuyikuhwelelawu kudi antu. Ifuku daYehova nidena dakenza mukunyakashana, nakukasumwisha antu amavulu. NiakaKristu alala atela akahayama chakamwekana yuma mukunyakashana. Ilaña hitwakajilumuka neyi chakayijilumunawu antu atamaku.

4. Ifuku daYehova dakekala ñahi neyi nyisoñu yakuvwala?

⁴ “Neyi nyisoñu yakuvwala chiyashikenaña mumbanda wudi nevumu.” (1 Tes. 5:3) Mumbanda wudi nevumu helukaña ifuku dakatachika nyisoñu yakuvwalaku. Hela chochu, hajinokaña nindi hiyakatachikaku. Neyi yinatachiki, nyisoñu yenzaña mukukasumwisha, yakataña nawa kutwesha kuyilekesha nehi. Munjila yoyimu, ninetu tweluka wanyi ifuku niora yakatachika ifuku daYehova. Ilaña tweluka chikupu netu dakenza nawa netu wunsompeshi waNzambi wakenza hadi antu atama mukukasumwisha, nawa kwosi chuma chakamukañesha.

5. Lukadi lwasweja lwakekala ñahi neyi kucha?

⁵ Neyi kucha. Chakutalilahu chaPawulu chamuchisatu chashimuna cheñi hadi amakombi eyaña nawufuku. Ilaña haniyi mpinji chinamwekani neyi Pawulu wadiña nakwesekeja ifuku daYehova nakucha. (1 Tes. 5:4) Amakombi enzaña nawufuku anateli kusha hohu maana kukwiya ilaña kusha maana kumpinji nehi. Chejeji chakumacha chinateli kuyishintakesha nakuyisolola hatooka. Lukadi lwasweja nilwena lwakayisolola ana antu adi neyi amakombi, atwalekañahu kwikala mumwidima kuhitila mukutwalekahu kwila yuma yamuneñeshaña Nzambi. Kwambukaku nanawa antu, tunateli kwikala adiloñesha neyi tubulaña kwila yuma yamuneñeshaña Yehova ilaña twilaña ‘yuma yayiwahi niyaloña niyalala yejima.’ (Efwe. 5:8-12) Kuhiñahu, Pawulu wazatishili yakutalilahu yiyedi yadifwana hakulumbulula antu akabula kupuluka.

ANYI AKABULA KUPULUKA HEFUKU DAYEHOVA?

6. Antu amavulu akaama tulu munjilanyi? (1 ATesalonika 5:6, 7)

⁶ “Antu akaamaña tulu.” (Tañenu 1  ATesalonika 5:6, 7.) Pawulu wesekejeli antu akabula kupuluka hefuku daYehova nawantu anakaami tulu. Hiyelukaña yuma yinakumwekana hela chinakwenda mpinjiku. Dichi, hiyelukaña chuma chalema chinamwekani hela kwilahu chumaku. Antu amavulu makonu adi mutulu twakuspiritu. (Rom. 11:8) Hiyakuhwelela muwunsahu wunakumwekesha nawu tunakushakama “mumafuku akukuminina” nawa nawu lukadi lwasweja keña lwinziku. Yuma yamaneni yinakumwekana mukaayi yinateli kuletesha antu amakwawu kufwila kutiyilila kunsañu yaWanta yitwashimwinaña. Hela chochu, amavulu afuntaña mutulu chatela atwalekihu kutona. Niantu amakwawu akuhwelela mwifuku dawunsompeshi atoñojokaña nawu dichidi kwakulehi chikupu. (2 Pet. 3:3, 4) Hela chochu, tweluka netu kufumba kwonenewa kwakutwalekahu kwikala atona, kwalema kudi etu ifuku niifuku.

7. Antu akajilumunayi Nzambi adi ñahi neyi antu anasheti?

⁷ “Antu ashetaña.” Kapostolu Pawulu wesekejeli antu akajilumunawu kudi Nzambi nawantu ashetaña. Neyi kudi yuma yinakumwekana, antu anasheti hiyanyakalaña kwilahu chumaku, nawa afuukulaña mwaluwa. Munjila yoyimu, antu atama hiyatiyililaña kukusoñamisha kwaNzambiku. Atondañahu kwila yuma yakaletesha akajilumuki. Ilaña etu akaKristu atulejaña kuhemba yitoñojoka yetu, kwikala neyi muntu wunabuli kusheta. (1 Tes. 5:6) Muntu wumu wadiza chikupu Bayibolu wahosheli nindi “muntu wahembaña yitoñojoka yindi muchima windi wekalaña wawunda nawa walulutaña wanyi. Watoñojokaña mwamaana kulonda afuukuli chiwahi.” Muloñadi chitwatela kwikalila awunda muchima nawa adiloñesha? Kulonda tubuli kudiñija munsañu yamapolitiki hela yuma yikwawu yinakumwekana makonu. Ikakeja dakudiñija muniyi yuma dikuswejelañaku hampinji yinakuswina ifuku daYehova kwakwihi. Hela chochu, hitwatela kwakama nachitwakelaku. Spiritu yaNzambi yinateli kutukwasha kwikala namuchima wawunda, kwikala nayitoñojoka yayiwahi nikufuukula chachiwahi.—Luka 12:11, 12.

YUMANYI YITWATELA KWILA HAKWILA TWIIKALI ADILOÑESHA NEFUKU DAYEHOVA?

8. Nsona ya 1 ATesalonika 5:8 yinalumbululi ñahi yilwilu yinateli kutukwasha kwikala atona nikuhemba yitoñojoka yetu? (Talenu cheñi mwevulu.)

⁸ ‘Vwalenu chuma chakujika hantulu . . . niitepa.’ Pawulu watwesekejaña namashidika asoñama nawa anadimanyeki kulonda ayi kunjita. (Tañenu 1 ATesalonika 5:8.) Mushidika wudi hamudimu amukuhwelela nawu watela kwikala wadiloñesha kuzuña njita mpinji yidi yejima. Ninetu dichitwatela kwikala. Twatwalekañahu kwikala adiloñesha nefuku daYehova kuhitila mukuvwala chuma chakujika hantulu chachikuhwelelu nikukeña, kushilahu niitepa dakuchiñeja. Iyi yilwilu yinateli kutukwasha nankashi.

9. Chikuhwelelu chetu chatukiñaña ñahi?

⁹ Chuma chakujika hantulu chakiñaña muchima wamushidika. Chikuhwelelu nikukeña jakiñaña muchima wetu wachifwikija. Jikutukwasha kutwalekahu kumukalakela Nzambi nikumulondela Yesu. Chikuhwelelu chatukwashaña kwiluka netu Yehova wakatukiswila chitwamukeñakeñaña namuchima wetu wejima. (Heb. 11:6) Chikatukwasha kutwalekahu kwikala ashinshika kudi Nlomboli yetu, Yesu, hela chakwila chakakeñekaña etu kuumika kukala kwakuvulu. Tunateli kwikala nachikuhwelelu chakola chikutukwasha kuumika kukala kutwamonaña muchihandilu kuhitila mukudiza hayakutalilahu yawantu amakonu atwalekelihu kuhemba kashinshi kawu hela chakwila ayikabishileña, indi kwiji kumona kukala kwamali. Nawa tunateli kutondolwela wubanji wekala mukusweja kukeña maheta kuhitila mukwimbujola antu apelesheliku chihandilu chawu kulonda atwamijeñaku Wanta.b

10. Kukeña kutwamukeña Nzambi niakwetu antu kwatukwashaña ñahi kuumika?

¹⁰ Kukeña nikwena kwalema muloña kwatukwashaña kwikala atona nikuhemba yitoñojoka yetu. (Mat. 22:37-39) Kukeña kutwamukeña Nzambi kwatukwashaña kutwalekahu kushimwina hela chakwila mukufuma kukala kwamuchidinyi. (2 Tim. 1:7, 8) Hamuloña wakwila twayikeña niantu abulaña kumukalakela Yehova, twatwalekañahu kushimwina nikutwalekahu kuzatila mumaluña etu akushimwina, kushilahu nikushimwina kuzatisha foni nikusoneka nyikanda. Hitwazeyaña nakuleka kukuhwelela netu awa antu ifuku dimu akahimpa nakutachika kwila yuma yayiwahiku.—Ezek. 18:27, 28.

11. Kukeña kutwayikeña akwetu akakwitiya kwatukwashaña ñahi? (1 ATesalonika 5:11)

¹¹ Mukukeña akwetu munabombeli nikukeña akwetu akaKristu. Twamwekeshaña iku kukeña kuhitila “[mukudikolesha] wumu namukwawu nikudituña wumu namukwawu.” (Tañenu 1 ATesalonika 5:11.) Neyi chazatilañawu hamu amashidika neyi anakuzuña njita, ninetu twadikoleshaña wumu namukwawu. Hela chochu, mushidika nateli kukatisha mukwawu mushidika chakuluwukila hampinji yinakuzuñawu njita, ilaña kwila elilamu hohu nehi. Munjila yoyimu, hitunateli kwililamu hohu chuma chinateli kuneñesha amanakwetu niahela, indi kwiji kufuntisha katama hakatamaku. (1 Tes. 5:13, 15) Twamwekeshaña cheñi kukeña kuhitila mukulemesha amanakwetu anlombolaña muchipompelu. (1 Tes. 5:12) Hampinji yasonekeliyi Pawulu iwu mukanda, chipompelu chamuTesalonika chadiña kanda chishikiji nichaaka chimu kufuma hichatachikili. Amayala atondewa adiñamu atela adiña kanda eluki nyidimu nawa atela aluwañesheleña. Hela chochu, ateleleli kuyilemesha. Hampinji yinakuswina lukadi lwasweja kwakwihi, twakakeñekaña kushindamena chikupu hadi akulumpi adi muchipompelu chetu kulonda akatwinkeña nshimbi kubadika nichitunakwila makonu. Hadaha hitunateli kutambwila nshimbi kudi amanakwetu akukasanji keneni kamukaayi kejima niahakasanji kamutayiku; dichi chalema kuyikeña akulumpi nikuyilemesha chayinu mpinji. Hichikweti muloña nayuma yikumwekanaku, tuhembeña yitoñojoka yetu kuhitila mukubula kusha maana hayiluwa yawu, ilaña tusheña maana hawunsahu wunakumwekesha nawu Yehova kuhitila mudi Kristu nakuyilombola awa amayala ashinshika.

12. Kuchiñeja kwetu kwakiñaña ñahi yitoñojoka yetu?

¹² Neyi chakiñaña itepa mutu wamushidika, kuchiñeja kwetu kwawamwinu kwakiñaña yitoñojoka yetu. Muloña wakukuhwelela chikupu muyuma yitwachiñejaña, tweluka netu yuma yidi mukanu kaayi yamukunkulwayi. (Fwili. 3:8) Kuchiñeja kwetu kwatukwashaña kwikala namuchima wawunda nikwikala adiloñesha. Ichi dichuma chayikwashili aWallace nawaLaurinda, akalakelaña muAfrica. Munyilungu yisatu, wejima wawu ajimbesheli nvwali wumu-wumu. Muloña wachipupu chaCOVID-19, akañenyi kufunta kumukala wawu nakwikala hamu nawantaña jawu. Manakwetu Wallace wasonekeli nindi: “Kuchiñeja kwankwashaña kutoñojoka chakekalawu mumafuku awu atachi mukaayi kakaha, bayi chadiñawu mumafuku awu akukumishaku mukanu kaayiku. Iku kuchiñeja kwanwundishaña muchima neyi inakukabakana nachineñi chakufwisha.”

13. Yumanyi yitwatela kwila hakwila tutambwili spiritu yajila?

¹³ “Bayi mujima kesi kaspirituku.” (1 Tes. 5:19) Pawulu wesekejeli spiritu yajila nakesi kadi mudi etu. Neyi tudi naspiritu yaNzambi, tukwikala neyena dakwila yuma yayiwahi nawa tukwikalaña nañovu yakumukalakela Yehova. (Rom. 12:11) Yumanyi yitwatela kwila hakwila tutambwili spiritu yajila? Tunateli kulomba iyi spiritu, kudiza Izu daNzambi donenewa nikudikunda nakuloñesha kwalombolewaña naspiritu. Kwila mwenimu kukutukwasha kwikala “[nanyikaabu] yaspiritu.”—Ñal. 5:22, 23.

14. Yumanyi yitwatela kutondolwela neyi tunakukeña kutwalekahu kutambwila spiritu yaNzambi? (Talenu cheñi mwevulu.)

¹⁴ Neyi Nzambi natwinki dehi spiritu yajila, twatela kusoñama kulonda ‘tubuli kujima kesi kaspiritu.’ Nzambi wenkaña hohu spiritu yindi kudi ana atwalekañahu kwikala nayitoñojoka niyilwilu yayiwahi. Neyi tutwalekahu kutoñojoka hayuma yawuzondu nikuyila, hakutwalekahu kutwinka spiritu yindiku. (1 Tes. 4:7, 8) Hakwila tutwalekihu kutambwila spiritu yajila, hitwatela cheñi “[kudiwula] wuprofwetuku.” (1 Tes. 5:20) Muniyi vasi “wuprofwetu” wunatalishi kunsañu yahanañayi Yehova kuzatisha spiritu yindi yajila, kushilahu ninsañu yahosha hakwinza kwefuku daYehova nichinakehi mpinji yitudimu. Hitwatoñojokaña netu ifuku daYehova, hela Amagedoni hiyakenza mumpinji yitudimuku. Ilaña twamwekeshaña netu idi ifuku keña dinzi, hela kutoñojokahu kuhitila mukutwalekahu kukalakala “nyidimu yakumwakama Nzambi” ifuku niifuku nikwikala nayilwilu yayiwahi.—2 Pet. 3:11, 12.

“ESEKENU YUMA YEJIMA”

15. Tunateli kutondolwela ñahi kutuluwañesha nansañu yamakudi ninsañu yakutwamba yawandemoni? (1 ATesalonika 5:21)

¹⁵ Katatakichi kumbidi, antu adikañaña naNzambi akabidika nawu: “Kuwunda nikukiñewa!” (1 Tes. 5:3) Nsañu yonenewa yakutwamba yawandemoni yakataanda iseki dejima, nawa yakaluwañesha antu amavulu. (Chim. 16:13, 14) Indi etu? Neyi “[tweseka] yuma yejima,” hiyakatudimbaku. (Tañenu 1 ATesalonika 5:21.) Izu dachiGiriki dabalumunawu nawu “esekenu,” adizatishili kulumbulula njila yazatishileñawu antu kwesekelamu yikuñu, chidi neyi wuru nisiliva kulonda amoni neyi yalala. Dichi, twatela kweseka nsañu yitwatiyaña hela yitwatañaña kulonda twiluki neyi yalala hela nehi. Chumichi chadiña chalema kudi aTesalonika, nawa chakasweja kwikala chalema kudi etu hampinji yinakuswina lukadi lwasweja kwakwihi. Chatela twitejeña nsañu yejima yahoshañawu antu, twazatishaña wuswa wetu wakutoñojoka kulonda twesekeji nsañu yitwatañaña hela yitwatiyaña nachahoshaña Bayibolu nikuloñesha kwaYehova. Neyi twila mwenimu, hiyakatuluwañesha nansañu yakutwamba yidi yejima yawandemoniku.—Yish. 14:15; 1 Tim. 4:1.

16. Twakuhwelela netudi, nawa chumichi chatusañumunaña kwiladi?

¹⁶ Ambuña aNzambi akapuluka lukadi lwasweja hamu neyi izanvu. Hela chochu, hamuntu-hamuntu hituneluki yuma yikamwekana kumadikiku. (Yak. 4:14) Dichi, hela neyi twakashika kulukadi lwasweja indi kwiji twakafwa henohu lukadi lwasweja kanda, tuneluki netu akatwinka wumi wahaya nyaaka neyi tutwalekahu kwikala ashinshika. Awayishewa akekala mwiwulu hamu naKristu. Anyikoku amakwawu akekala muparadisa hamaseki. Dichi wejima wetu tushenu muchima hakuchiñeja kwetu kwakuwahi nikutwalekahu kwikala adiloñesha nefuku daYehova!