Mwekeshenu Nenu Mwakola Kuhitila Mukwikala Ovwaha

1. Kumudimu hela kushikola anateli kutwihula hayumanyi?

MWATIYAÑA ñahi neyi mukwenu mumwazatilaña indi kwiji mumwatañilaña ayihula kutalisha hayuma yimwakuhwelela? Komana mwatiyaña woma? Etu amavulu twatiyaña woma. Ilaña lwihu lwamuchidiwu lunateli kuletesha twiluki yitoñojoka yanowu muntu hela yuma yakuhwelelayi nawa chikutukwasha kumushimwina nsañu yayiwahi. Hela chochu, mpinji jikwawu muntu nateli kwihula lwihu kulonda tuditaadikishi nindi. Chumichi hichatela kutuhayamishaku. Muloña antu amavulu ayilejaña nsañu yakutwamba kutalisha hayuma yitwakuhwelela. (Yilw. 28:22) Kubombelahu, tunakushakama “mumafuku akukuminina,” mpinji yikudi antu amavulu “abulaña kukeña kutiyañana nawakwawu” nawa “asweja kuzuwa.”—2 Tim. 3:​1, 3.

2. Chawahiladi kwikala ovwaha?

² Hadaha munateli kutoñojoka nenu, ‘Nateli kwikala ñahi wamwovu nikwakula munjila yayiwahi neyi muntu nakutaadikisha yuma yamuBayibolu yinakuhwelela?’ Chumanyi chikuyikwasha? Hikwikala ovwaha. Muntu wovwaha hahilaña swayiku, ilaña wadiyuulaña neyi anamuvuloki hela neluki wanyi chakwakula. (Yish. 16:32) Hela chochu, chapela wanyi kwikala ovwaha mpinji yejima. Munateli kwikala ñahi ovwaha? Neyi muntu nakutaadikisha yuma yimwakuhwelela, munateli kumwakula ñahi namuchima wawovu? Nawa neyi mudi nvwali, munateli kukwasha ñahi anyanenu kwiluka chakuhakwilaku yuma yakuhwelelawu namuchima wawovu? Tutalenu mwani.

CHAKWIKALA OVWAHA

3. Tukuhosheladi netu antu ekala nachilwilu chakwovwaha akola, bayi neyi azeyaku? (2 Timotewu 2:​24, 25)

³ Antu ekala nachilwilu chakwovwaha akola, bayi neyi azeyaku. Chakeñekaña kuzata nañovu hakwila tutweshi kushinda kukala kweneni. Kwovwaha hichilwilu chekala hakachi ‘kanyikaabu yaspiritu.’ (Ñal. 5:​22, 23) Izu dachiGiriki dabalumunawu nawu “kwovwaha” mpinji jikwawu adizatishileña hakulumbulula kawalu wamwisaña anafwomoniwu. Fwikijenu kawalu wamwisaña anovwahishiwu. Hela chakwila iwu kawalu nekali wamwovu, ilaña wakola. Etu antu, tunateli kwikala ñahi ovwaha nawa hampinji yoyimu akola? Bayi nañovu jetu etu aweniku. Chuma chinateli kutukwasha hikulomba spiritu yaNzambi, nakumuleja netu atukwashi kwikala nanichi chilwilu chachiwahi. Kudi wunsahu wawuvulu wunakumwekesha nawu tunateli kwikala ovwaha. AYinsahu amavulu amwekeshaña nawu ekala ovwaha neyi anayivuloki kudi akakudimbulula, nakuletesha antu kubula kwikala nayitoñojoka yaheña hadi aYinsahu. (Tañenu 2 Timotewu 2:​24, 25.) Munateli kumwekesha ñahi nenu mwakola kuhitila mukwikala ovwaha?

4. Chumanyi chitunateli kudizila kudi Isaka kutalisha hakwikala ovwaha?

⁴ MuBayibolu mwekala nsañu yayivulu yamwekeshaña kwikala ovwaha chikwalemena. Talenu nsañu yahosha hadi Isaka. Chatachikiliyi kushakama mwiluña dawaFilisitinu daGerari, antuñinindi adiña nalwisu amukaanishili kuzatisha mashima apundiliwu kudi ambuña atata yindi. Chatela alwishi nakutambula mashima indi, Isaka wabuukishili chisaka chindi nakuya kwacheñi nawa wapundili mashima acheñi. (Kutach. 26:​12-18) Ilaña aFilisitinu ahosheli nawu menji adiña munidi iluña niwena adiña awu. Hela chochu, isaka welili yuma mukuwunda. (Kutach. 26:​19-25) Chumanyi chamukwashili kutwalekahu kwikala wovwaha hela chakwila antu atwalekelihu kumuvuloka? Chakadi nikujina, wamweni chelileña anvwali jindi, wadizilili chikupu kudi Abarahama chelilileñayi yuma mukuwunda nikudi Sara chadiñayi “[naspiritu] yakuwunda nikwovwaha.”—1 Pet. 3:​4-6; Kutach. 21:​22-34.

5. Chumanyi chinakumwekesha nawu anvwali akaKristu anateli kudizisha anyanawu chalemena kwikala ovwaha?

⁵ Enu anvwali, kuhwelelenu nenu ninenu munateli kudizisha anyanenu kwiluka kulema kwakwikala ovwaha. Talenu chuma chamwekeni kudi Maxence wadiña nayaaka 17. Adiña nakumuvuloka kudi antu azuwa kushikola nimumudimu wakushimwina. Anvwali jindi adiwunjikili nakumukwasha kulonda ekali nachilwilu chakwovwaha. Ahosheli nawu, “Maxence ichi weluka nindi chekala chaswayi kwila yuma mukuhila hela nandombu neyi anakuvuloki, ilaña muntu wakola wadiyuulaña.” Chinafumimu, Maxence nadizi kwikala wovwaha.

6. Kulomba kunateli kutukwasha ñahi kusweja kumwekesha chilwilu chakwovwaha?

⁶ Chumanyi chitwatela kwila neyi tudi mukweseka kweneni, chidi neyi kudi muntu wunakutamisha ijina daNzambi yetu hela kusawula Bayibolu? Twatela kumulomba Yehova atwinki spiritu yindi nimaana kulonda twakuli munjila yayiwahi. Indi neyi mukuhita kwampinji twanuka netu twakula chiwahi wanyi? Tunateli kulombelahu cheñi haniku kukala nikutoñojoka chitunateli kwila chiwahi mpinji yikwawu. Chikufumamu, Yehova wukutwinka spiritu yindi yajila kulonda yitukwashi kwikala ovwaha nikubula kuhila swayi.

7. Kuhembela kumutu nsona jimu kunateli kutukwasha ñahi kuyuula nhoshelu yetu nikubula kuzuwa swayi neyi anatuvuloki? (Yishimu 15:​1, 18)

⁷ Mavasi amakwawu amuBayibolu anateli kutukwasha kuyuula nhoshelu yetu neyi anatuvuloki. Spiritu yaNzambi yinateli kutukwasha kwanuka awa mavasi. (Yow. 14:26) Chakutalilahu, yishina yekala mumukanda waYishimu yinateli kutukwasha kwikala awunda. (Tañenu Yishimu 15:​1, 18.) Iwu mukanda wamuBayibolu wamwekeshaña cheñi chichawahila kudiwunjika neyi anatuvuloki.—Yish. 10:19; 17:27; 21:23; 25:15.

KASHINSHI KATUKWASHAÑA KWIKALA OVWAHA

8. Muloñadi chitwatela kutoñojokela hachuma hadaha chinaleteshi muntu ehuli olu lwihu?

⁸ Kashinshi nikena kanateli kutukwasha. (Yish. 19:11) Muntu wukweti kashinshi wadiyuulaña neyi anakumwihula kutalisha hayuma yakuhwelelayi. Kakavulu, neyi antu atwihula malwihu hiyatulejaña chinaleteshi atwihuli owu malwihuku. Dichi henohu kanda twakuli, tukwila chiwahi neyi twanuka netu hadaha hitunateli kwiluka chuma chinaleteshi owu muntu ehuli olu lwihuku.—Yish. 16:23.

9. Gidiyoni wamwekesheli ñahi kashinshi nikwovwaha hamwihwileñawu kudi amayala eni Efuremu?

⁹ Talenu Gidiyoni chayakwiliyi amayala eni Efuremu. Amwihwili nakuhila chaletesheli abuli kuyitambika hakusambila kulonda ayi nindi nakuzuña nawayilumbu jaIsarela. Chumanyi chaletesheli ahili nankashi? Muloña wakwila atiyili kutama? Tuneluki wanyi, ilaña Gidiyoni walemesheli chatiyileñawu nawa wayakwili namuchima wawovu. Chumanyi chafuminimu? Bayibolu yahosha nawu chahosheliyi awa mazu, “awundishili nyichima.”—Anso. 8:​1-3.

10. Chumanyi chikutukwasha kwiluka chakwakula antu atwihulaña kutalisha hayuma yitwakuhwelela? (1 Petulu 3:15)

¹⁰ Hadaha mukwetu mutwazatilaña indi kwiji mutwatañilaña kushikola nakutwihula chaleteshaña twovwahileña nshimbi jimu jamuBayibolu. Tukuzata hakumina ñovu jetu kuhakwilaku yuma yitwakuhwelela, hampinji yoyimu nikulemesha yitoñojoka yamuntu wunakututiyilila. (Tañenu 1 Petulu 3:15.) Chachiwahi neyi tumonaña lwihu lunatwihuliyi netu hinjila yikutukwasha kwiluka yuma yalemeshayi, chatela tutoñojokeña netu nakukeña kutufwisha namuloña indi kwiji kututaadikisha. Hichikweti muloña nachuma chinaleteshi owu muntu ehuli olu lwihuku, ilaña tukwila chiwahi neyi tukwakula namuchima wawovu nawa munjila yayiwahi. Ñakwilu yetu yinateli kumuletesha kuhimpa yitoñojoka yindi. Hela chakwila nakumwekesha winyi indi kwiji nakuhosha kasawuntu, chuma chitwatela kufwila kwila hikumwakula munjila yayiwahi.—Rom. 12:17.

11-12. (a) Yumanyi yitwatela kutoñojokahu henohu kanda twakuli lwihu lwakola? (Talenu cheñi mwevulu.) (b) Shimunenu chuma chinakumwekesha nawu lwihu lunehuliyi muntu lunateli kuletesha tutachiki kuhanjeka munjila yayiwahi.

¹¹ Chakutalilahu, neyi mukwetu mutwazatilaña atwihula chitwabulilaña kwanuka mafuku akuvwalika, toñojokenu hachumichi: Komana nakujinoka neyi chakwila atwitejaña wanyi kwikala natupinji twatuwahi twakuzañalela hamu? Tahindi nakutoñojoka nindi tunateli kuluwañesha wubwambu wekala hakachi kawakwetu mutwazatilaña kumudimu? Chineli hitwanukaña mafuku akuvwalikaku, tunateli kusambila kumuhameka hakwikala namuchima wakwakamena akwawu, kuhiñahu tumuleja netu ninetu twakeñaña kwikala anuñañana nawakwetu mutwazatilaña. Chumichi chikuletesha tuhanjeki chiwahi hachahoshaña Bayibolu kutalisha hamafuku akuvwalika.

¹² Tunateli kuzatisha njila yoyimu neyi muntu atwihula malwihu amakwawu akola. Mukwetu mutwatañilaña nateli kuhosha nindi aYinsahu jaYehova atela kuhimpa yitoñojoka yawu kutalisha hachamonañawu wutumwa. Komana nahoshi chumichi muloña wakwila weluka wanyi chakuhwelelawu aYinsahu jaYehova kutalisha hawutumwa? Tahindi wudi nebwambu dindi hela ntaña yindi welaña wutumwa? Komana watoñojokaña nindi twahela antu elaña wutumwa? Twatela kumukolesha netu twakeña antu ejima nawa twalemesha wuswa wukwetiyi muntu-himuntu wakudifuukwila yuma yinakukeñayi.b (1 Pet. 2:17) Kuhiñahu, tunateli kumuleja chalemena kuzatisha nshimbi jamuBayibolu.

13. Munateli kukwasha ñahi muntu wahoshaña nindi kukuhwelela Nzambi hiwusupi?

¹³ Neyi muntu natutaadikishi chikupu, hitwatela kunyakala kutoñojoka netu tuneluki yuma yakuhwelelayiku. (Tit. 3:2) Chakutalilahu, indi neyi mukwenu mumwatañilaña ahosha nindi kumukuhwelela Nzambi hiwusupi? Komana mukutoñojoka nenu wakuhwelela chikupu nindi yuma yadileñeli yayeni nawa weluka yuma yayivulu haniyi nsañu? Kafwampi, hadaha nakutoñojoka hohu hayuma yatiyiliyi. Chatela mutachiki kuditaadikisha hajasayansi, munateli kumulejaku yuma yikuletesha mukwenu mumwatañilaña ayi nakutoñojokahu. Hadaha munateli kumulejaku nsañu yidi ha jw.org yahosha hayileñaleña. Hekwawu mukuhita kwampinji wukukeña nindi muhanjeki nindi hachibaaba hela vidiyo yawaniniyi haniyi webusayiti. Mwamweni, kwakula munjila yakalemesha kunateli kumuletesha kuhimpa yitoñojoka yindi.

14. Niall wazatishili ñahi chiwahi webusayiti yetu kulonda mukwawu mwatañilileñawu kwolola yitoñojoka yindi yaheña kutalisha hachamweneñayi aYinsahu jaYehova?

¹⁴ Kansi wejina daNiall wazatishili webusayiti yetu kwolola nachu yitoñojoka yaheña kutalisha hadi aYinsahu jaYehova. Wahosheli nindi, “Mukwetu mutwatañilileña kakavulu wanlejeleña nindi hinakuhwelela munsañu jasayansiku, muloña nakuhwelela mukanda mwekala nsañu yakulumbisha chatela nikuhweleli nsañu yalala.” Chelili iwu mukwawu mwatañilileñawu amukaanishi Niall kumulumbulwila yuma yakuhweleleliyi, Niall wamulejeli iwu mukwawu kuya ha jw.org muchibalu chinakwila nawu “Sayansi na Baibolo.” Mukuhita kwampinji, wenjili nakwiluka nindi iwu mukwawu watañili nsañu yamulejeliyi nawa watachikili kuhanjeka nindi hayuma chayileñeliwu. Hadaha ninenu dichinateli kuyimwekena.

LOÑESHELENU HAMU NEYI CHISAKA

15. Anvwali anateli kukwasha ñahi anyanawu kwakula namuchima wawovu neyi akwawu akashikola anakuyihula malwihu kutalisha hayuma yakuhwelelawu?

¹⁵ Anvwali anateli kudizisha chiwahi anyanawu chatela kwakulawu namuchima wawovu neyi anakuyitaadikisha hayuma yakuhwelelawu. (Yak. 3:13) Anvwali amakwawu hakudifukula kwachisaka ashaku ntanjikilu yakuhitulukila chadimu muyuma yatela kwilawu. Atondaña nyitu yansañu yinateli kuyikalila anyanawu kwakula kushikola, ahanjekañahu nikumwekesha chatela kwakulawu nikuyidizisha chatela kuhoshawu namuchima wawovu nawa munjila yayiwahi.—Talenu chikasha chinakwila nawu “Kuhitulukila Chadimu muYuma Yimwatela Kwila Kunateli Kukwasha Chisaka Chenu.”

16-17. Kuhitulukila chadimu muyuma yakwila kunateli kukwasha ñahi atwansi?

¹⁶ Kuhitulukila chadimu muyuma yakwila kunateli kukwasha atwansi akaKristu kukuhwelela awenawu nsañu yinakuhoshawu nikulumbulwila akwawu yuma yakuhwelelawu. Yibaaba yidi hamutu wakwila nawu “Malwihu Ehulañawu Atwansi” nichibaaba chinakwila nawu apo imisepela ingalemba, munateli kuyiwana ha jw.org. Iyi yibaaba ayiloñesha kulonda yikwasheña atwansi kukuhwelela chikupu yuma yakuhwelelawu nikuloñesha ñakwilu jinateli kwakulawu mumazu awu aweni. Neyi tuhanjekaña haniyi yibaaba hamu neyi yisaka, wejima wetu tunateli kwiluka chitwatela kuhakwilaku yuma yitwakuhwelela namuchima wawovu nawa munjila yayiwahi.

¹⁷ Kansi wejina daMatthew walumbulwili kuhitulukila chadimu muyuma yakwila chikwamukwashili. Hakudifukula kwachisaka, Matthew nianvwali jindi kakavulu asandujolaña hanyitu yansañu yinateli kuhanjekawu kushikola. Wahosheli nindi: “Twahanjekaña hamalwihu anateli kwihulawu antu, nawa twahitulukañamu kulonda twiluki chitunateli kuyakula kushindamena hayuma yitwasandujola. Neyi niluka chiwahi yuma yaletesha nikuhweleli nami yuma yinakuhwelela yalala, natiyaña woma wanyi nawa champelelaña kwikala wovwaha hampinji yinnakuhanjeka nawantu.”

18. AKolosi 4:6 yinamwekeshi kulema kwakwila ñahi?

¹⁸ Hela chochu, antu amakwawu akaanaña hela chakwila tunayilumbulwili chiwahi yuma yitwakuhwelela. Ilaña neyi tuyilumbulwila mukubabala nawa namuchima wawovu anateli kwiteja. (Tañenu AKolosi 4:6.) Kulumbulwila antu yuma yitwakuhwelela tunateli kukwesekeja nakunatila muntu bola. Tunateli kuyinata nañovu hela chovu. Neyi tunata bola chovu, mukwetu itunakuhema nindi wukuyikwata nawa tukutwalekahu kuhema. Munjila yoyimu, neyi tuhosha mukubabala nawa namuchima wawovu, antu anateli kwikala nampwila yakututiyilila nawa tukutwalekahu kuhanjeka nawu. Hela chochu, neyi muntu nakukeña hohu kutaadeka nanetu indi kwiji kusekesha yuma yitwakuhwelela, hitwatela kutwalekahu kuhanjeka nindiku. (Yish. 26:4) Ilaña antu amakwawu hiyanateli kwikala neyi iwuku; kafwampi, amavulu anateli kutiyilila.

19. Yumanyi yikutuletesha twiikali namuchima wawovu hampinji yitunakuhwakwilaku yuma yitwakuhwelela?

¹⁹ Mwamweni, mwafumaña yuma yayiwahi chikupu neyi tufwilaña kwikala ovwaha. Lombenu kudi Yehova ayinki ñovu yimunakukeña kulonda mutwalekihu kwikala ovwaha hampinji yimunakwakula antu anakwihula malwihu anateli kuleta ntaadi hela kuyinka nyiloña. Anukenu nenu neyi mwikala nachilwilu chakwovwaha, munateli kukañesha kwaambokelamu kwayitoñojoka yenu kuleteshi mataadi. Nawa neyi mwakula namuchima wawovu ninakalemesha, munateli kuletesha antiyilili amakwawu kuhimpa yitoñojoka yawu kutalisha hachatumonañawu nichamonañawu nsañu yamuBayibolu. “Mpinji yejima ikalenu adiloñeshela chadimu [kuhakwilaku]” yuma yimwakuhwelela, “mwileña mwenimu namuchima wawovu nikalemesha chikupu.” (1 Pet. 3:15) Dichi, mwekeshenu nenu mwakola kuhitila mukwikala ovwaha!