Kufwana Petulu, Bayi Muzeyaku

1. Petulu welili ñahi chakwatiliyi inshi jajivulu muchihayamisha?

PETULU wachiishili wufuku wejima chakadi kukwatahu inshi. Hela chochu, Yesu wamulejeli nindi: “Twalaku watu kwakunama nawa mulalumwinihu tuleñi twenu kulonda mukwati inshi.” (Luka 5:4) Petulu wajinokeli neyi chumichi chikuzatika, ilaña welili mwamulejeliwu. Tuleñi twalalumwiniwu twatachikili kutaboka muloña wakulema kwanshi jafwilimu. Petulu niakwawu mwazatilileñawu chamweniwu nawu anayikoñeli chihayamisha, “ahayamini nankashi.” Petulu wabidikili nindi: “Mwanta, fumaku kudi ami, muloña ami nidi mukanshidi.” (Luka 5:​6-9) Petulu watela wadimweni nindi washikilamu wanyi kwikala hamu naYesu.

2. Muloñadi wutwatela kudizila nsañu yahosha hadi Petulu?

² Petulu wahosheli mwalala, wadiña “mukanshidi.” Nsona jamwekeshaña nawu mpinji jikwawu wahosheleña nikwila yuma yaditoñesheleñayi mukuhita kwampinji. Komana ninenu mpinji jikwawu mwatiyaña neyi chatiyiliyi Petulu? Kudihu chilwilu chatama chimunakufwila kuleka indi kwiji munatwalekihu kuzatila hakuzeyazeya kwenu hadi mpinji yayilehi? Neyi dikukala kumukweti, kudiza nsañu yahosha hadi Petulu kukuyikolesha. Kukuyikolesha ñahi? Toñojokenu hachumichi: Yiluwa yakoñeliyi Petulu hiyadi kuyisoneka muBayiboluku. Hela chochu, ayishili muBayibolu kulonda tudizileñaku. (2 Tim. 3:​16, 17) Kudiza hadi iwu muntu wadiña nakuzeyazeya nawa watiyileña neyi chitwatiyaña, kunateli kutukwasha kwiluka natu Yehova hakeñaña nindi twiikali awaninaku. Wakeñaña nindi tubuli kuzeya, tutwalekihu kumukalakela, hichikweti muloña nakuzeyazeya kwetuku.

3. Muloñadi chitwatela kubulila kuzeya?

³ Muloñadi chitwatela kubulila kuzeya? Neyi tutwalekahu kuzatila hachuma chimu, mukuhita kwampinji twachilukishaña. Chakutalilahu: Ñimbi nateli kudiza hadi yaaka yayivulu hakwila eluki chiwahi chakuvumisha chisanji chindi. Hampinji yinakudizayi, nateli kuluwañesha kakavulu, ilaña neyi atwalekahu kudiza, wukukulukila. Hela chakwila nelukishi dehi chakuvumisha chisanji chindi, mpinji jikwawu nateli kuluwañesha. Ilaña, halekañaku. Watwalekañahu kudiza kulonda akulukili. Munjila yoyimu, nihanyima yakwila tunamoni netu tunaleki kwilahu chuma chimu chatama chitwelileña, mpinji yikwawu tunateli kuchiila cheñi. Ilaña twatwalekaña kuzatilahu kulonda tuchileki. Wejima wetu twahoshaña hela kwila yuma yitwenzaña nakuditoñesha mukuhita kwampinji; hela chochu, neyi tubula kuzeya, Yehova wukutukwasha kutwalekahu kuwahishaku yilwilu yetu. (1 Pet. 5:10) Tuhanjekenu hadi Petulu chabuliliyi kuzeya. Wushona wamumwekesheleliwu kudi Yesu hela chakwila waluwañesheleña, wunateli kutusañumuna kutwalekahu kumukalakela Yehova.

YUMA YALWISHILEÑAYI NAYU PETULU NINKISU JATAMBWILILIYI

4. Kwesekeja namazu ekala haLuka 5:​5-10, Petulu wadilumbulwili nindi himuntu wamuchidinyi, ilaña Yesu wamukolesheli nindidi?

⁴ Nsona jashimuna wanyi chaletesheli Petulu aditeni nindi ‘himukanshidi’ hela nshidi jatoñojokeleñayi. (Tañenu Luka 5:​5-10.) Ilaña watela wakoñeli yiluwa yamaneni. Yesu welukili nindi Petulu watiyileña woma, hadaha muloña wakwila wadimweneña nindi washikilamu wanyi. Welukili cheñi nindi Petulu nateli kutwalekahu kwikala washinshika. Dichi wamulejeli Petulu munjila yayiwahi nindi “[aleki] kutiya woma.” Yesu chamwekesheliyi nindi wamukuhweleleli Petulu, chumichi chamukwashili Petulu kuhimpa chihandilu chindi. Mukuhita kwampinji, aPetulu namanakwindi Anderi ashiyili mudimu wawu wakujaha inshi nakutachika kuzatila hamu naMesiya mpinji yejima, nawa chumichi chaletesheli atambwili nkisu jajivulu.—Maku 1:​16-18.

5. Petulu amukiswilili ñahi muloña wakubula kwiteja yitoñojoka yaheña yadiñayi nayu yimukañeshi kumulondela Yesu?

⁵ Petulu wamweni yuma yayivulu yayiwahi hamu neyi mukakumulondela Kristu. Wamweni Yesu chokileñayi akata, kufumisha andemoni nikusañula afu.b (Mat. 8:​14-17; Maku 5:​37, 41, 42) Petulu cheñi wamweni chimwenu chaYesu chakekalayi Mwanta waWanta waNzambi, nawa Petulu havulameneni chumichiku. (Maku 9:​1-8; 2 Pet. 1:​16-18) Mwamweni, Petulu wamweni yuma yabulili kukuhwelelayi. Watela wazañaleli chikupu hakwimika mushindu yina yitoñojoka yaheña hakwila atambwili nkisu jejimiji!

6. Komana Petulu washikeneni kumanisha kuzeyazeya kwindi? Lumbululenu.

⁶ Hichikweti muloña nayuma yatiyiliyi niyamweniyiku, Petulu wachidiña nakulwisha nakuzeyazeya kwindi. Talenu iyi yuma yamwekeni. Yesu chalumbulwileñayi chakakabakanayi nikufwa hakwila wuprofwetu wamuBayibolu wukashikijewi, Petulu wamulejeli nindi chumichi hichakamumwekenaku. (Maku 8:​31-33) Petulu niakwawu apostolu atwalekelihu kuditaadikisha kulonda eluki wabadikili hakachi kawu. (Maku 9:​33, 34) Hawufuku wakukumishaku henohu Yesu kanda afwi, Petulu waketwili itu deyala wumu. (Yow. 18:10) Hawowuna wufuku, Petulu watiyili woma nawa wamukaanini ibwambu dindi Yesu kapampa kasatu. (Maku 14:​66-72) Petulu wadilili nankashi muloña wachumichi.—Mat. 26:75.

7. Yesu chasañukiliyi wamwinkeli Petulu mudimwinyi?

⁷ Yesu hamushiyili iwu kapostolu kindi waneñeliku. Hanyima yakwila Yesu anamusañuli dehi, wamwinkeli Petulu kukooleka kwakumwekesha nindi wachidiña wamukeña. Yesu wamwinkeli Petulu mudimu wakubiña anyikoku indi nakudizoza. (Yow. 21:​15-17) Petulu wetejeli kuzata mudimu wamwinkeliwu. Wadiña muYerusalema hefuku daPentekosta nawa wadiña hakachi kawantu asambililiwu kuwayisha naspiritu yajila.

8. Chiluwanyi cheneni chakoñeliyi Petulu muAntiyoki?

⁸ Nihanyima yakwikala mukaKristu wawayishewa, Petulu watwalekelihu kulwisha nakuzeyazeya kwindi. Mu 36 C.E., Petulu wadiña hohu hampinji yamuwayishileñawu mukanyuza Konelisu naspiritu yajila, wunsahu wamwekesheleña nawu “Nzambi hakweti chaambuku” nawa nawu akanyuza niwena anateli kwikala muchipompelu chawakaKristu. (Yilw. 10:​34, 44, 45) Kufuma haniyi mpinji Petulu wakasunukili kudiila hamu nawakanyuza, chuma chabulileñayi kwila hakusambila. (Ñal. 2:12) Hela chochu, akaKristu aYudeya amakwawu atoñojokeleña nawu aYudeya nawakanyuza hiyatela kudiila hamuku. Helili antu amakwawu adiña naniyi yitoñojoka enzi kuAntiyoki, Petulu walekeli kudiila hamu nawamanakwindi akanyuza, hadaha watiyili woma nindi wukuneñesha akaKristu aYudeya. Kapostolu Pawulu wamweni iwu wunfwikiji nawa wamuzuwilili Petulu hamesu awantu. (Ñal. 2:​13, 14) Hela chakwila wakoñeli ichi chiluwa, Petulu wazeyeli wanyi. Chumanyi chamukwashili?

CHUMANYI CHAMUKWASHILI PETULU KUBULA KUZEYA?

9. Nsona yaYowanu 6:​68, 69 yamwekeshaña ñahi nawu Petulu wadiña washinshika?

⁹ Petulu wadiña washinshika; hetejeli chuma chidi chejima chimukañeshi kumulondela Yesuku. Wamwekesheli nindi wadiña washinshika hampinji yahosheliyi Yesu chuma chimu chabulili kutiyishishawu atumbanji twindi. (Tañenu Yowanu 6:​68, 69.) Amavulu alekeli kumulondela Yesu chakadi kuhembelela hela kumwihula chaletesheli ahoshi awa mazu. Ilaña Petulu dicheliliyi wanyi. Muloña welukili nindi Yesu hohu diyi wadiña namazu “awumi wahaya nyaaka.”

10. Yesu wamwekesheli ñahi nindi wamukuhweleleli Petulu? (Talenu cheñi mwevulu.)

¹⁰ Yesu hamushiyili Petuluku. Hawufuku wakukumishaku kwikala hanu hamaseki, Yesu welukili nindi Petulu niakwawu apostolu akumushiya. Hela chochu, Yesu wakuhweleleli chikupu nindi Petulu wukufunta nawa wukutwalekahu kwikala washinshika. (Luka 22:​31, 32) Yesu welukili nindi “spiritu yinakukeña, ilaña mujimba wunazeyi.” (Maku 14:38) Dichi, nihanyima yakumukaana kudi Petulu, Yesu hamushiyili iwu kapostolu windiku. Hanyima yakwila Yesu anamusañuli dehi, wamwekeni kudi Petulu, hadaha hampinji yadiñayi Petulu nkawindi. (Maku 16:7; Luka 24:34; 1 Kor. 15:5) Chumichi chatela chamukolesheli chikupu iwu kapostolu waneñeli!

11. Yesu wamukwashili ñahi Petulu kwiluka nindi Yehova wukumukwashaña?

¹¹ Yesu wamulejeli Petulu nindi Yehova wukumukwashaña. Yesu hamusañwiliwu, wamukoñeleli Petulu niakwawu apostolu chihayamisha chikwawu chakukwata inshi jajivulu. (Yow. 21:​4-6) Chakadi nikujina, ichi chihayamisha chamukolesheli Petulu kwiluka nindi Yehova nateli kushikena kumwinka yuma yakumujimba yakeñeleñayi. Hadaha iwu kapostolu wanukili mazu aYesu akwila nawu Yehova wukuyakamenaña antu “[asambilaña] kukeña Wanta.” (Mat. 6:33) Chumichi chamukwashili Petulu kutwamijaku mudimu wakushimwina, bayi mudimu windi wakujaha inshiku. Washimwinini chakadi woma hefuku daPentekosta 33 C.E., nakukwasha antu amavulu kwiteja nsañu yayiwahi. (Yilw. 2:​14, 37-41) Kufumahu wayikwashili aSamariya niakanyuza kumwiluka Yesu nikumulondela. (Yilw. 8:​14-17; 10:​44-48) Yehova wamuzatishili Petulu chikupu kulonda aleti antu ashiyashana muchipompelu.

YUMANYI YITUNAKUDIZILAKU?

12. Chuma chamumwekeneni Petulu chinateli kutukwasha ñahi neyi tunatwalekihu kulwisha nakuzeyazeya kumu?

¹² Yehova nateli kutukwasha kubula kuzeya. Hadaha mpinji jikwawu chinateli kutukalila, sweje-e neyi tunatwalekihu kulwisha nakuzeyazeya kwokumu hadi mpinji yayilehi. Mpinji jikwawu, kuzeyazeya kwetu kunateli kumwekana neyi kunasweji kubadika kwadiña naPetulu. Ilaña Yehova nateli kutwinka ñovu kulonda tubuli kuzeya. (Mas. 94:​17-19) Chakutalilahu, manakwetu wumu welili wutumwa hadi yaaka yayivulu henohu kanda adizi chalala. Walekeli chikupu ayina yilwilu yatama. Hela chochu, mpinji jikwawu wakabakeneña nayitoñojoka yatama. Chumanyi chamukwashili kubula kuzeya? Walumbulwili nindi: “Yehova watukoleshaña.” Wabombelelihu nindi: “Spiritu yaYehova . . . , yinankwashi kwiluka nami tunateli [kutwalekahu] kwila yuma kwesekeja nachakeñañayi Yehova . . . Yehova natwalekihu kunzatisha, nawa hela chakwila naluwañeshaña natwalekihu kunkolesha.”

13. Tunateli kumwimbujola ñahi Petulu kwesekeja namazu adi haYilwilu 4:​13, 29, 31? (Talenu cheñi mwevulu.)

¹³ Neyi chitunamoni, Petulu watiyili antu woma kapampa kakavulu. Ilaña chalombeliyi nindi amukwashi ekali wahamuka, watachikili kwila yuma nakuhamuka. (Tañenu Yilwilu 4:​13, 29, 31.) Ninetu tunateli kuleka kutiya woma. Talenu chuma chamwekeni kudi manakwetu wakansi Horst, washakamineña muGermany mumpinji Yanjita yaKaayi Yamuchiyedi. Mpinji jikwawu, watiyileña woma muloña wekakeja dawantu kushikola nawa wahosheleña nindi “Hitler wukutwamwina!” Chatela amuzuwili, anvwali jindi alombeleli hamu nindi, nakumuleja Yehova nawu amukwashi ekali wahamuka. Nawukwashu wawanvwali jindi nimuloña wakumushindamena Yehova, manakwetu Horst wekalili wahamuka. Nkumininaku, wahosheli nindi: “Yehova hanshiyili nkawamiku.”c

14. Atubiña akamenaña anateli kukolesha ñahi ana anakukeña kuleka kumukalakela Yehova?

¹⁴ Yehova niYesu hiyamba katushiya nkawetuku. Hanyima yakumukaana Kristu, Petulu wateleleli kufuukulahu chuma chalema. Komana wukuleka, tahindi wukutwalekahu kwikala kambanji kaKristu? Yesu walombeli nakulemba kudi Yehova nindi chikuhwelelu chaPetulu chakabuli kuzeya. Yesu wamulejelimu Petulu akuna kulomba nawa wamukuhweleleli Petulu nindi wakakolesha amanakwindi kumbidi. (Luka 22:​31, 32) Chatela chamukolesheleña Petulu chanukayi mazu aYesu! Neyi kudi chuma chalema chitunakukeña kufuukula muchihandilu chetu, Yehova nateli kuzatisha atubiña akamenaña kulonda atukoleshi tutwalekihu kwikala ashinshika. (Efwe. 4:​8, 11) Manakwetu Paul wunakalakali hawukulumpi hadi yaaka yayivulu dichayikundejañayi amanakwetu. Wayilejaña ana anakukeña kuleka kumukalakela Nzambi kutoñojoka hadi Yehova chayikokeliyi katachi kwinza muchalala. Kuhiñahu wayikoleshaña nindi kukeña kwaYehova kwakashinshi hikukumwiteja ayishiyi nkawawuku. Wakunkulwili nindi, “Namoni antu amavulu azeyeli chinatwalekihu muloña wakuyikwasha kudi Yehova.”

15. Chuma chamwekeni kudi Petulu nimanakwetu Horst chinakumwekesha ñahi nawu mazu ekala haMatewu 6:33 alala?

¹⁵ Neyi chamwinkeleñawu Petulu niakwawu apostolu yuma yakumujimba kudi Yehova, ninetu wukutwinkaña yuma yitunakaankili neyi tutwamijañaku mudimu wakushimwina muchihandilu chetu. (Mat. 6:33) Hanyima yaNjita Yakaayi Yamuchiyedi, manakwetu Horst ashimunawu hakusambila, watoñojokelihu kutachika wupayiniya. Hela chochu, wadiña kazweñi nankashi, nawa wajinokeleña neyi chakwila wukutwesha kwikala namali akumukwasha kutwalekahu mumudimu wampinji yejima. Chumanyi cheliliyi? Wazatili mumudimu wakushimwina mulungu wejima wayendeleliwu kudi nkoñi wañinza, kulonda amoni neyi Yehova wukumukwasha. Kunsa yaniwu mulungu, wahayamini chamwinkeliwu envelopu kudi nkoñi wañinza yafumini kudi muntu wabulili kushimunayi. Mwadiña mali amavulu akumukwasha mumudimu wawupayiniya hadi tukweji twatuvulu. Ichi chawaana chamukwashili manakwetu Horst kwiluka nindi Yehova wukumukwashaña. Watwamijiliku Wanta mukuhanda kwindi kwejima.—Mal. 3:10.

16. Muloñadi chitwatela kudizila nsañu yahosha hadi Petulu niyuma yasonekeliyi?

¹⁶ Petulu watela wazañaleli chikupu chamweniyi nindi Yesu hamushiyiliku, kwesekeja nachalombeliyi hakusambila! Kristu watwalekelihu kumudizisha Petulu kwikala kapostolu washinshika nawa wakutalilahu wamuwahi kudi akaKristu. Kuniyi yuma yamudizishiliwu, twadizilañaku yuma yayivulu yalema. Petulu walejeliku antu yuma yikwawu yadiziliyi nawa yayivulu wayisonekeli munyikanda yiyedi yonenewa yatemesheleliyi yipompelu mumafuku awapostolu. Muchibaaba chinalondelihu twakahanjeka hayuma yantesha yidi muniyi nyikanda nichitunateli kuyizatisha makonu.