Lwihu Lutwadihulaña Wejima Wetu: Kutalisha haYuma Yayiwahi niYatama

Neyi munakukeña kuya kwiluña kumwabulahu dehi kuya, chumanyi chimwatela kwila?

1. 1. Kuya munjila mumunakutoñojoka nenu dimumwatela kuya.

2. 2. Kulondela antu amakwawu nakutoñojoka nenu aneluki kumunakuya.

3. 3. Kuzatisha chuma chashindamenewa chinateli kuyilombola, chidi neyi nteeta, mapu, hela ibwambu denu imwakuhwelela weluka chiwahi kumunakuya.

Neyi tuzatisha njila yatachi hela yamuchiyedi, tunateli kuya kwiluña dacheñi bayi kutunakuyaku. Hela chochu, neyi tutonda njila yamuchisatu tunateli kukuhwelela chikupu netu tukushika kutunakuya.

Chihandilu chetu chidi neyi tudi halwendu lutunakuhweleli netu lwakatushikija kuchihandilu chamuzañalu kumbidi. Chili twakashikaku hela nehi, chashindamena nankashi hakutwawanaña wukwashu neyi tunakufuukula.

Hela chakwila yuma yitwavula kufuukula muchihandilu chetu yanyanya, ilaña yikwawu yalema nankashi. Yamwekeshaña yuma yitwalemesha kutalisha hachitwamonaña yuma yayiwahi niyatama. Muniyi yuma yitwafuukulaña munateli kufuma yuma yayiwahi yikutukwasha etu niantu itwakeña hela yuma yatama yikuletesha tukabakani hadi mpinji yayilehi. Muniku kufuukula munabombeli yuma yidi neyi:

• Kubulakana kweyala namumbanda niwulu

• Kushinshika, mudimu nimali

• Chakukulisha anyana

• Chakuhanda nawakwetu

Munateli kwiluka ñahi neyi chakwila yuma yimunafuukuli yakaletesha enu nichisaka chenu mwakekali namuzañalu kumbidi?

Lwihu lutwadihulaña wejima wetu dilwilu: Chumanyi chinateli kunkwasha kufuukula chiwahi kutalisha hayuma yayiwahi niyatama?

Ayinu magazini yikulumbulula muloña waweni wutwatela kukuhwelela yuma yahosha Bayibolu kutalisha hayuma yayiwahi niyatama nichiyinateli kutukwasha.