Kwanakena Henohu Ifutu Danyiloña Kanda Adihani

Anateli hohu kutwanakena nshidi jetu kuhitila mumulambu wefutu danyiloña wahaniniyi Yesu namashi indi. (Efwe. 1:⁠7) Ilaña, Bayibolu yahosha nawu: “Nzambi mukudiwunjika kwindi, wanakeneneña nshidi yavulumwiniwu ­kushankulu,” dikwila nawu, henohu Yesu kanda ahani ifutu danyiloña. (Rom. 3:​25) Hanu dinu, Yehova wanakeneneña ñahi nshidi henohu kanda ahani ifutu danyiloña nawa hampinji yoyimu atwalekahu kwikala Nzambi ­yawuñanji waloña?

Kwesekeja nachamonañayi Yehova yuma, ifutu danyiloña dadiña tuhu neyi adihana dehi kufuma hampinji yafuukwiliyi kuhana ‘mwana’ wakamwina antu amukuhwelela. (Kutach. 3:​15; 22:18) Nzambi welukili chikupu nindi hampinji yindi yatoñolayi, Mwanindi wumu hohu wakahana ifutu danyiloña chakufuma hamuchima. (Ñal. 4:4; Heb. 10:​7-​10) Yesu ­hadiñayi hamaseki hamu neyi mukakumwimenaku Nzambi, wadiña nawuswa wakwanakena nshidi henohu ifutu danyiloña kanda adihani. Yesu wanakeneneña nshidi jawantu adiña nachikuhwelelu muloña welukili nindi mulambu wakahanayi wakabuta hanshidi jawu.​—Mat. 9:​2-6.