Yuma Yinateli Kuyikwasha Kuhimpa Neyi Munabuukili muChipompelu Chacheñi

ANicolas nawaCéline amweni kukala kwambukaku. Etejeli mudimu wayinkeliwu kudi kasanji kamutayi kamuFrance wakuya nakukalakela kuchipompelu chacheñi. Ahosheli nawu: “Hakusambila twazañaleli, ilaña kuya muna twatachikili kwanuka amabwambu jetu itwashiyili. Twadiña kanda tukwati wubwambu wakola nawamanakwetu muchipompelu mutwabuukilili.”a Chineli kwekalaña kukala kwamuchidiwu, munateli kwikala ñahi namuzañalu nikuzata chiwahi neyi mubuukila kuchipompelu chacheñi? Adi muchipompelu anateli kukwashana ñahi? Nawa munateli kukolesha ñahi amanakwenu muchipompelu mumunabuukili nawa niwena anateli kuyikolesha ñahi?

YISHINA YIWANA YINATELI KUYIKWASHA KUHIMPA

1. Mushindamenenu Yehova. (Mas. 37:5) Muhela Kazumi, wakuJapan, wabuukili nakufuma muchipompelu mwadiñayi yaaka 20 chelili nfumwindi amuhimpi iluña kwakuya nakuzatila mudimu wakumujimba. Hanu dinu ‘wakunjikili ñahi njila jindi kudi Yehova’? Wahosheli nindi: “Namulejelimu Yehova kakavulu mukulomba kutalisha hayuma yanfwishileña mutentu, wuudi niyuma yañakamishileña. Chinela mwenimu, nekalileña cheñi nañovu yakuumika.”

Munateli kumushindamena ñahi Yehova chikupu? Neyi mutondu chiwakeñekaña menji niwushi hakwila wukuli chiwahi, chikuhwelelu chetu nichena chakeñekaña menji niwushi wachifwikija hakwila chikoli. Nicolas, ashimunawu hakusambila, wahosheli nindi kutoñojoka chikupu hayuma yelili Abarahama, Yesu niPawulu, amayala adihanini chikupu hakwila eli nkeñelu yaNzambi, kwamukwashili kumukuhwelela Yehova nankashi. Kwikala naprogiramu yakudiza Bayibolu nkawenu mpinji yejima, kukuyikwasha kuumika kukala kwejima kumunateli kumona muchihandilu nawa mukwiluka yuma yimunateli kuzatisha hakukolesha akwenu muchipompelu mumunabuukili.

2. Tondolwelenu kwesekeja yipompelu. (Mukwa. 7:10) Jules wawanini chisemwa chambukaku chikupu helili abuuki kufuma kuBenini nakuya kuUnited States. Wanukaña nindi: “Natoñojokeleña nami chidi hohu chiwahi kuleja muntu wejima innamoni katachi chekala chihandilu chami.” Chineli ichi chisemwa chadiña chambukaku nachisemwa chenjililiyi, watachikili kutondolwela kudikunda nawamanakwetu niahela. Ilaña chayilukiliyi chiwahi amanakwetu niahela, wahimpili yitoñojoka yindi. Wahosheli nindi: “Ichi neluka nami kwejima kutudi hanu hamaseki, antu ekala wowamu. Ahoshaña hohu nikwila yuma munjila jambuka. Chalema nankashi kulondela chelañawu antu yuma kwiluña kuwunayi.” Dichi tondolwelenu kwesekeja chipompelu kumunafumi nachipompelu kumunabuukili. Neyi chahosheli muhela wumu, payiniya, wejina daAnne-Lise nindi: “Hinabuukili kulonda niwani yuma yinashiyili kunyimaku. Nabuukili kulonda nidizi yuma yayiha.”

Akulumpi niwena atela kutondolwela kwesekeja yuma chiyidi muchipompelu munabuukiliwu nachiyadiña muchipompelu munafumiwu. Kuzatisha njila jambukaku hichuma chatama wanyi. Chalema nankashi kwiluka chekala yuma kwiluña kumunabuukili henohu kanda mushimuni yitoñojoka yenu. (Mukwa. 3:1, 7b) Mukwila chiwahi hama neyi muyidizisha amanakwetu nachakutalilahu chenu chachiwahi chatela muyikanjikijeña kulondela yitoñojoka yenu.—2 Kor. 1:24.

3. Dikitenuña muchipompelu mumunabuukili. (Fwili. 1:27) Hela chakwila kubuuka kwakeñekaña kuzata nañovu nikwikala nampinji yeneni, ilaña chalema nankashi kutachika hohenohu kuya nakupompa nachipompelu kumunabuukili, nawa neyi chinatweshiki kupompela hamu nawu mesu-namesu. Kafwampi, neyi owu ekala muchipompelu mumunabuukili abula kuyimona hela kuyimonaña kakavulu nehi, anateli kuyikwasha ñahi? Lucinda, wabuukilili kumusumba weneni muSouth Africa hamu nawanyanindi ayedi awambanda, wanukili nindi: “Amabwambu jami ankolesheli nawu nidikundeña nankashi nanowu innawani muchipompelu mutunabuukili, kuzata nawu mumudimu wakushimwina nikwakulahu hakupompa. Nawa twayilejeli amanakwetu netu akasunuka kuzatisha itala detu kubulakenañamu hakuya nakushimwina.”

‘Kudikitila hamu’ munyidimu yaNzambi nawamanakwetu niahela muchipompelu mumunabuukili hinjila yayiwahi yakwikalilamu “nachikuhwelelu chansañu yayiwahi.” Muhela Anne-Lise, ashimunawu hakusambila, amukolesheli kudi mukulumpi wamuchipompelu chawu nindi esekeña kuzata mumudimu wakushimwina namuntu wejima muchipompelu munabuukiliyi. Yumanyi yafuminimu? Wahosheli nindi, “Nashikeneni kwiluka nami iyi diyi njila yalema nankashi yinateli kukukwasha kwikala wakasunuka muchipompelu muwunabuukili.” Nawa neyi mudihanaña kuzataku nyidimu yidi neyi kuwahisha nikuloñesha yuma Hetala daWanta, mukumwekesha nawu muneteji nenu ochu dichipompelu mumukupompaña. Chimukudikitaña munyidimu yashiyashana, chikwikala chaswayi amanakwetu niahela kuyikasunukila nawa mukutiya nenu ichi dichisaka chenu.

4. Kwatenu amabwambu amaha. (2 Kor. 6:11-13) Kwikala wakasunuka nawantu diyi njila yimu yinateli kuyikwasha kukwata amabwambu. Dichi henohu kupompa kanda nihanyima yakupompa, ikalenuña nampinji yeneni yakuhanjeka nawantu kulonda muyiluki. Zatenu nañovu kulonda mwiluki majina awu. Neyi mwanukaña majina awantu, akuyimonaña nawu mudi aswayi kuhosha nawu nawa mwakasunuka, chumichi chikukokola antu kwinza kudi enu nawa mukwikala nawamabwambu amaha amawahi.

Chatela mudimwekeshi kwikala ambukaku kubadika chimwekala kulonda antu ayikeñi, lekenu amabwambu jenu amaha ayiluki kwesekeja nachimwekala. Dizilenu kudi Lucinda wahosheli nindi, “Ichi tukweti amabwambu itwadikunda nawu chikupu muloña twatachikililihu kuyitambika kwitala detu.”

“DITAMBWILENUÑA WUMU NAMUKWAWU”

Antu amakwawu anateli kutachika kudakamena neyi eñila Mwitala daWanta mudi antu abula kwilukawu. Dichi munateli kukwasha ñahi anabuukili muchipompelu chenu kwikala akasunuka? Kapostolu Pawulu watukolesheli nindi, “Ditambwilenuña wumu namukwawu neyi chayitambwililiwu kudi Kristu.” (Rom. 15:7) Kuhitila mukumwimbujola Kristu, akulumpi anateli kukwasha anabuukili muchipompelu chawu kutiya nawu akasunuka. (Talenu chikasha chinakuhosha nawu “Yuma Yinateli Kuyikwasha Kwikala naMuzañalu Neyi Munakubuuka.”) Hela chochu, antu ejima muchipompelu, kushilahu nianyana anyanya, anateli kukwasha antu anabuukili muchipompelu chawu kwikala akasunuka.

Mukuditambwila wumu namukwawu mwabombela kudimwekeshela chisambu nikudikwasha muyuma yakumujimba. Chakutalilahu, muhela wumu wasendeli muhela mukwawu wabuukilili kwiluña kwashakamañayi, wayili nakumuhitañesha mutawuni nawa wamulejeli chakukandama mabasi nimasuwa munidi iluña. Ichi chuma cheliliyi iwu muhela chamuzañalesheli nankashi iwu muhela wabuukili nawa wakasunukili.

KUBUUKA KWAKWASHAÑA MUNTU KUPAMINAKU

Neyi kaboola nakukula, waduwulaña kapampa kakavulu henohu kanda atachiki kutuuka. Munjila yoyimu, neyi munakubuukila kuchipompelu chacheñi, mwatela kutondolwela kwakama kudi kwejima kunateli kuyikañesha kutuuka muchifwikija mumudimu waYehova. ANicolas nawaCéline ahosheli nawu: “Kubuuka kwatukwashili kudiza yuma yayivulu. Hakwila twiluki chakuhanda nawantu acheñi nikwinjilila neluña dadiha, twahimpili nakwikala nayilwilu yayiha.” Jean-Charles, ashimunawu hakusambila, washimwini yuma yayiwahi yinahetelimu chisaka chindi, nindi: “Kuhimpa iluña kunakwashi anyanetu kupaminaku muchipompelu mutwabuukila. Chimwahitili tukweji twantesha hohu, mwanetu wamumbanda watachikili kuhana mpanji hakupompa kwamukachi kamulungu nawa mwanetu weyala wekalili mukakushimwina wabula kupapatishewa.”

Chakutalilahu, indi neyi chihandilu chenu chikuyiteja wanyi kubuukila kuchipompelu kudi kukaankila? Munateli kwilisha chipompelu mumudi kwikala neyi chachiha kudi enu kuhitila mukuzatisha njila jimu jinashimuniwu muchinu chibaaba. Hampinji yimunakumushindamena Yehova, dikitenuña chikupu munyidimu yamuchipompelu kuhitila mukuloñesha kuzatila hamu nawamanakwenu niahela mumudimu wakushimwina nikukwata amabwambu amaha hela kukolesha wubwambu wumwakwata dehi. Kwila mufuukulahu kuyikwasha kumujimba anabuukili kwiluña denu hela adi mukukaankila nehi? Chineli kukeña dikwayilukilañawu aKristu alala, chakadi nikujina, neyi mukwashaña akwenu mukuswina kwakwihi naYehova. (Yow. 13:35) Kuhwelelenu nenu “Nzambi watiyaña kuwaha chikupu nanyilambu yamuchidiwu.”—Heb. 13:16.

Hela chakwila amonaña kukala, akaKristu amavulu adiluñishaña yuma yayiwahi yafumaña mukubuukila kuchipompelu chacheñi, ninenu dichuma chinateli kuyimwekena! Anne-Lise wahosheli nindi, “Kuya nakuzatila muyipompelu yashiyashana kwankwashili kutandumuna muchima wami.” Kazumi, ichi wakuhwelela chikupu nindi neyi wuya nakukalakela kuchipompelu chacheñi, “Yehova wukukukwasha munjila jiwabulili nikukuhwelela.” Indi Jules wahosheli nindidi? Nindi: “Amabwambu inikweti chayinu mpinji anankwashi kwikala wakasunuka. Ichi inakutiya kuwaha nankashi kwikala munichi chipompelu munabuukila chakwila chakankalila kufumamu.”