Malwihu Kufuma Kudi Antañi

Yesu chatachikishiliyi Kuda kwaMwanta kwaMelela, atumbanji twindi 70 atemesheliyi nakushimwina hakusambila adiña kudihi? Komana amushiyili?

Twatela wanyi kutoñojoka netu chineli adiñahu wanyi hampinji Yesu yatachikishiliyi Kuda kwaMwanta kwaMelela, awa atumbanji 70 wayikaanini hela netu amushiyili. Yesu wakeñeleña hohu kwikala nawapostolu indi hayina mpinji.

Wayitejeli ejima ana 12 ninana 70. Yesu wasambilili kutonda hakachi kawatumbanji twindi amayala 12, ateneniyi nindi apostolu. (Luka 6:​12-16) Wadiña muÑaliliya “[hatambikiliyi] apostolu 12” nawa “wayitemesheli nakushimwina Wanta waNzambi nikuuka.” (Luka 9:​1-6) Nkumininaku, chakunkumukililiyi kuYudeya, Yesu “watondeli atumbanji amakwawu 70, nawa wayitemesheleñahu dehi ayedi-ayedi.” (Luka 9:51; 10:1) Chafuminimu, Yesu wadiña nawakakumulondela mumaluña ashiyashana mwadiña nakushimwinawu nsañu yindi.

AYudeya ekalili atumbanji twaYesu atwalekelihu kwikala naChipandakenu hachaaka-hachaaka, hadaha hamu nayisaka yawu. (Kwid. 12:​6-11, 17-20) Mpinji yakufwa kwindi chiyaswinineña kukamwihi, Yesu niapostolu indi ayili kuYerusalema. Ilaña haloñesheli Chipandakenu cheneni chakupompesha atumbanji twindi ejimaku, kufuma Yudeya, Ñaliliya niPereya. Chakadi nikujina, Yesu wakeñeleña kwikala nawatumbanji twindi hanichi chidika. Wayilejeli nindi: “Inakufwila chikupu kudiila hamu nanenu ichi Chipandakenu henohu kanda nikabakani.”—Luka 22:15.

Kudi chuma chalema chaletesheli eli mwenimu. Yesu wadiña kwakwihi nakufwa hamu neyi “Mwana kaMukoku waNzambi owu wafumishaña nshidi yakaayi.” (Yow. 1:29) Chumichi chateleli kumwekena muYerusalema, mwalambwilileñawu nyilambu kudi Nzambi. Kufwa kwaYesu kwayikuulili antu chikupu kubadika njila yazatishili yisaka yawaIsarela yakuda mwana kamukoku hawufuku wedikileñawu muEjipitu. (1 Kor. 5:​7, 8) Chuma cheliliyi Yesu chayikwashili ana 12 kwikala chikuku chachipompelu chawakaKristu. (Efwe. 2:​20-22) Musumba wajila waYerusalema wadiña “namalola 12 achikuku” hasonekeliwu “majina 12 awapostolu 12 aMwana kaMukoku.” (Chim. 21:​10-14) Mwamweni, apostolu ashinshika azatileña mudimu walema hakushikija nkeñelu yaNzambi. Dichi chateleleli Yesu chekaliliyi nawu haChipandakenu chakukumishaku nihachuma chahiñilihu, dikwila nawu, Kuda kwaMwanta kwaMelela.

Ana 70 niatumbanji amakwawu adiili hamu wanyi naYesu hayina mpinji. Hela chochu, atumbanji ejima adiña ashinshika adi kuhetela muchuma chatachikishiliyi Yesu, Kuda kwaMwanta kwaMelela. Ejima ekalili akaKristu awayishewa adi kwikala muchitiyañenu chawanta, chayilejeliyi Yesu apostolu hawuna wufuku.—Luka 22:​29, 30.