Komana Munakutiyilila Kusoñamisha?

1. Wunsompeshi wamuchidinyi wukukeña kumwekana?

TUNAKUSHAKAMA mumpinji munakumwekana yuma yashiyashana! Katataka Yesu asompeshi antu ejima ashakamaña hamaseki. Yesu walumbulwili chakekala mpinji yakutwala kuniwu wunsompeshi kuhitila mukuyileja atumbanji twindi “chinjikijilu” chawuprofwetu chakwikalahu kwindi kwakadi kumwekana “[nikwakukuma] kwanshakaminu yamakonu.” (Mat. 24:3) Iwu wuprofwetu awusoneka muMatewu kapetulu 24 ni 25 nimunsañu yikwawu yadifwanaku yekala muMaku kapetulu 13 niLuka kapetulu 21.

2. Yumanyi yitukuhanjekahu, nawa yumiyi yikutukwasha ñahi?

² Yesu watusoñamishili kuzatisha yishimu yisatu. Iyi hiyishimu yahosha hadi anyikoku nawampembi, ajiki ababala niayisupi, niyantalenta. Chishimu-hichishimu chatukwashaña kwiluka muntu chakamusompeshawu kwesekeja nayilwilu yindi. Chitukushinshikaña haniyi yishimu, tukumona yuma yitunateli kudizilaku nichitunateli kuyizatisha. Chishimu chatachi chitukuhanjekahu chinakuhosha hadi anyikoku niampembi.

ANYIKOKU NAWAMPEMBI

3. Mpinjinyi Yesu yakasompeshayi antu?

³ Muchishimu chawanyikoku nawampembi, Yesu nalumbululi wunsompeshi wawantu akweti kukooleka kwakutiyilila kunsañu yayiwahi nikukwasha amanakwindi awayishewa. (Mat. 25:​31-46) Hampinji “[yalukadi] lwasweja,” iwu wunsompeshi wakawusompa henohu Amagedoni kanda yitachiki. (Mat. 24:21) Neyi chaambulañayi kabiña anyikoku nawampembi, Yesu niyena wakaambula antu ashinshika akwashaña akakumulondela indi awayishewa nanowu abulaña kuyikwasha.

4. Kwesekeja naIsaya 11:​3, 4, muloñadi chitwatela kukuhwelela netu Yesu wakasompesha antu chachiwahi? (Talenu cheñi mwevulu wudi .)

⁴ Wuprofwetu wamuBayibolu wamwekeshaña nawu chineli amutonda kudi Yehova kwikala Nsompeshi, Yesu wakasompesha mwaloña. (Tañenu Isaya 11:​3, 4.) Washinshikaña yuma yelañawu antu, yilwilu yawu ninhoshelu yawu, kushilahu nichayilañawu amanakwindi awayishewa. (Mat. 12:​36, 37; 25:40) Yesu wakeluka antu akwashileña amanakwindi awayishewa ninyidimu yawu.a Njila yimu yalema mwayikwashilañawu amana kwaKristu kudi antu adi neyi anyikoku, hikuyikwasha mumudimu wakushimwina. Owu ayikwashaña akayisompesha nawu “aloña” nawa akekala nakuchiñeja kwakwikala “nawumi wahaya nyaaka” hamaseki. (Mat. 25:46; Chim. 7:​16, 17) Iwu hiwufwetu wawuwahi chikupu wakatambwilawu antu atwalekañahu kwikala ashinshika! Neyi atwelekahu kwikala ashinshika mumpinji yalukadi lwasweja nikubadikahu, majinawu akatwalekahu kwikala “mumukanda wawumi.”—Chim. 20:15.

5. Yumanyi yitwadizilaña kuchishimu chawanyikoku nawampembi, nawa anyi atela kuhetelamu?

⁵ Mwekeshenu nenu mwashinshika nawa mwovwahila. Chishimu chaYesu chahosha hadi anyikoku nawampembi, chakundama nankashi antu akweti kuchiñeja kwakushakama hamaseki. Amwekeshaña nawu ashinshika kuhitila mukukwasha amana kwaKristu mumudimu wakushimwina nikwovwahila chayilombolañawu kudi kadizanvu kanyanya kawamanakwetu awayishewa atondawu kudi Yesu. (Mat. 24:45) Ilaña niantu akweti kuchiñeja kwamwiwulu niwena atela kutiyilila kukusoñamisha kwekala munichi chishimu. Muloñadi? Muloña Yesu washinshikaña yuma yelañawu, yilwilu yawu ninhoshelu yawu. Niwena atela kwikala ashinshika. Kafwampi, Yesu wahosheli hayishimu yikwawu yiyedi mudi kusoñamisha kunakundami awayishewa. Iyi yishimu yekala cheñi muMatewu kapetulu 25. Ichi tuhanjekenu hachishimu chawajiki ababala niayisupi.

AJIKI ABABALA NIAYISUPI

6. Ajiki atanu amwekesheli ñahi nawu ababala? (Matewu 25:​6-10)

⁶ Muchishimu chawajiki, Yesu wahosheli hadi ajiki 10 ayili nakumukinkilila kalemba. (Mat. 25:​1-4) Wejima wawu akuhweleleli kuya hamu nakalemba kuchawija chindi chawulu. Yesu wateneni atanu hakachi kawu nindi “ababala” nawa amakwawu atanu nindi “ayisupi.” Ajiki ababala adiña adiloñesha nawa asoñama. Adiña adiloñesha kutwalekahu kumuhembelela kalemba, hela chakwila washikili mukachi kawufuku. Dichi, enjili namanoñu awu kulonda atoñekeña mumwidima. Asendeli manji amakwawu akuzatisha neyi chakwila kalemba alaba kushika. Dichi adiloñesheli kulonda manoñu awu atwalekihu kutoñeka. (Tañenu Matewu 25:​6-10.) Kalemba chashikiliyi, ajika ababala ayili nindi kuchawija chawulu. Munjila yoyimu, akaKristu awayishewa amwekeshaña nawu adiloñesha kuhitila mukwikala asoñama nawa ashinshika kushika nimpinji yakenzayi Kristu, akayimona nawu ashikilamu kuya hamu naKalemba, Yesu, muWanta windi wamwiwulu.b (Chim. 7:​1-3) Indi ana ajiki atanu ayisupi?

7. Chumanyi chayimwekeneni ajiki atanu ayisupi, nawa muloñadi?

⁷ Kwaambukaku nawajiki ababala, ajiki atanu ayisupi adiña adiloñesha wanyi hampinji yashikiliyi kalemba. Manoñu awu adiña kwakwihi nakujima, nawa hiyenjilihu namanji amakwawuku. Chelukiliwu nawu kalemba keña ashiki, ayili nakulanda manji. Hampinji yashikiliyi kalemba, achidiña kanda afunti. Hayina mpinji, “ajiki adiloñesheli ayili nindi kuchawija chawulu nawa akiyili kuchiisu.” (Mat. 25:10) Nkumininaku, ajiki ayisupi chafuntiliwu nawa hiyakukeña nawu eñili, kalemba wayilejeli nindi: “Nayiluki wanyi.” (Mat. 25:​11, 12) Ana ajiki hiyadiloñesheli kumuhembelela kalemba kushika nimpinji yadi kwinzayiku. Yumanyi yatela kudizilaku awayishewa?

8-9. Yumanyi yatela kudizilawu awayishewa kuchishimu chahosha hadi ajiki? (Talenu cheñi mwevulu.)

⁸ Mwekeshenu nenu mwadiloñesha nawa mwasoñama. Yesu wahosheleleña chadimu wanyi nindi kwakekala mazanvu ayedi awawayishewa, dikwila nawu, izanvu danowu akadiloñesha kuhembelela sampu kukuma kwanshakaminu yamakonu niizanvu danowu akabula kudiloñesha. Ilaña, watalishileña kuchuma chakayimwekena awayishewa neyi hiyakekala adiloñesha kuumika nakashinshi kushika nikunsaku. Neyi abula kudiloñesha, hiyakatambwila wufwetu wawuku. (Yow. 14:​3, 4) Chumichi chalema nankashi. Hela chakwila tukweti kuchiñeja kwamwiwulu indi kwiji kwahamaseki, wejima wetu twatela kusha muchima kuniku kusoñamisha kwekala muchishimu chahosha hadi ajiki. Wejima wetu twatela kutwalekahu kwikala atona nawa adiloñesha kuumika kushika nikunsa.—Mat. 24:13.

⁹ Hanyima yakuhosha hachishimu chahosha hadi ajiki kulonda akonkomweni chichalemena kudiloñeshela chadimu nikwikala asoñama, Yesu wahosheli hachishimu chantalenta. Ichi chishimu chahosha hakwikala adikita.

NTALENTA

10. Anduñu ayedi amwekesheli ñahi nawu ashinshika? (Matewu 25:​19-23)

¹⁰ Muchishimu chantalenta, Yesu wahosheli hadi anduñu ayedi adiña ashinshika kudi nkaaka yawu niwumu wabulili kwikala washinshika. (Mat. 25:​14-18) Anduñu ayedi amwekesheli nawu ashinshika kuhitila mukuzata nañovu kumuvulishila nkaaka yawu mali. Henohu kanda ayi kwituña dacheñi, wayinkeli jintalenta, dikwila nawu, mali amavulu nankashi. Anduñu ayedi ashinshika azatili nañovu nawa azatishili chiwahi mali. Yumanyi yafuminimu? Nkaaka yawu chafuntiliyi, wawanini hamali ayinkeliyi anabombelihu mali amakwawu. Nkaaka yawu wayihamekeli, dichi ‘azañaleleli hamu nankaaka yawu.’ (Tañenu Matewu 25:​19-23.) Indi nduñu wamuchisatu? Welilidi namali amwinkeliwu kudi nkaaka yindi?

11. Chumanyi chamumwekeneni nduñu “wakatala,” nawa muloñadi?

¹¹ Nduñu wamuchisatu watambwilili ntalenta yimu ilaña wadiña “wakatala.” Nkaaka yindi wakeñeleña nindi azatishi ntalenta chachiwahi. Ilaña yena wayivumbikili mumaseki. Nkaaka yindi chafuntiliyi, iwu nduñu wabombelelihu wanyi ntalenta yikwawu hayina yamwinkeliwu. Iwu nduñu wadiña nayilwilu yayiwahi wanyi. Chatela adanakeni muloña wakukañanya kubombelahu ntalenta yikwawu hantalenta yamwinkeliwu kudi nkaaka yindi, iwu nduñu wamuteneni chatama nkaaka yindi nindi “muntu wakalisha.” Nduñu yeniwu amutiyili kuwaha wanyi kudi nkaaka yindi. Chakuminini hohenaha wanyi, amutambwili ntalenta yamwinkeliwu nawa amuhañili mwitala dankaaka yindi.—Mat. 25:​24, 26-30.

12. Anduñu ashinshika ayedi emenañaku anyi makonu?

¹² Ana anduñu ayedi ashinshika emenañaku akaKristu awayishewa ashinshika. Nkaaka yawu, Yesu, wayitambikaña kulonda ‘azañaleli hamu nankaaka yawu.’ Atambwilaña wufwetu wawu wamwiwulu, kusañuka kwatachi. (Mat. 25:​21, 23; Chim. 20:5b) Munjila yikwawu, chilwilu chatama chamwekesheliyi ona nduñu wakatala chayisoñamishaña awayishewa. Munjilanyi?

13-14. Yumanyi yadizilaña awayishewa kuchishimu chantalenta? (Talenu cheñi mwevulu.)

¹³ Mwekeshenu nenu mwadikita. Muchishimu chantalenta, neyi chichadiña muchishimu chahosha hadi ambanda ajiki, Yesu washimwineñahu dehi wanyi nindi awayishewa akekala akatala. Ilaña, walumbulwileña hohu chuma chadi kumwekana neyi aleka kwikala neyena dakudikita. Adi kukañanya kukwatisha “kukukooleka [kwawu] kwakuyitambika,” nawa adi kuyiteja wanyi kwiñila muWanta wamwiwulu.—2 Pet. 1:10.

¹⁴ Yishimu yaYesu yahosha hadi ajiki nihantalenta yamwekeshaña hatooka nawu akaKristu awayishewa ejima atela kwikala adiloñesha, asoñama nawa adikita. Kudihu chuma chikwawu chahosheliyi Yesu chatela kusoñamisha awayishewa? Eña, chidi kwoku! Mazu ahosheliyi Yesu ekala haMatewu 24:​40, 41 niwena ahoshaña hawunsompeshi wakukumishaku wanowu awayishewa.

ANYI ‘AKASENDAWU’?

15-16. Matewu 24:​40, 41 yamwekeshaña ñahi muloña waweni awayishewa chatela kwikalilawu atona?

¹⁵ Henohu kanda ahoshi hayishimu yisatu, Yesu walumbulwili wunsompeshi wakukumishaku wanowu awayishewa wakamwekesha owu etejeliwu. Wahosheli hadi amayala ayedi anakuzata mwiha niambanda ayedi anakuhala. Awa ejima ayedi, chinamwekani neyi anakuzata mudimu wowumu, ilaña Yesu wahosheli nindi “wumu akamusenda nawa mukwawu akamushiya.” (Tañenu Matewu 24:​40, 41.) Kuhiñahu wayikonkomweneni akakumulondela nindi: “Dichi tonenuña, muloña enu himuneluki ifuku dakenzayi Mwanta wenuku.” (Mat. 24:42) Yesu wahosheli nsañu yadifwanaku hanyima yakushimuna chishimu chahosha hadi ajiki. (Mat. 25:13) Komana iyi nsañu yinesakani? Dichichinakumwekana. Awayishewa alala nawa ashinshika hohu diwu ‘akasendawu’ nakuyitambwila kudi Yesu muWanta wamwiwulu.—Yow. 14:3.

¹⁶ Ikalenu atona. Wawayishewa wudi wejima wabulaña kutwalekahu kwikala watona kuspiritu, wakapompa wanyi hamu nanowu “atondewa.” (Mat. 24:31) Kubombelahu, antu jaNzambi ejima hichikweti muloña nakuchiñeja kukwetiwuku, atela kumona mazu aYesu kwikala akusoñamisha kulonda atwalekihu kwikala atona nawa ashinshika.

17. Muloñadi chitwatela kubulila kwakama Yehova chatondayi antu amakwawu naspiritu yindi yajila?

¹⁷ Twamwiluka Yehova chiwahi, dichi twakuhwelela wunsompeshi windi. Twakamaña wanyi neyi tumona Yehova awayisha antu amakwawu ashinshika munanu mafuku.c Twanukaña mazu ahosheliyi Yesu kutalisha hadi akakukalakala enjili haora yamu 11 muchakutalilahu chindi chahosha hetempa danyivinyu. (Mat. 20:​1-16) Ana atambikiliwu nakuzata mwitempa danyivinyu namwaana atambwilili wufwetu wowumu nanana atachikili kuzata nantetemena. Munjila yoyimu, hichikweti muloña nampinji yayiwayishiliwu antuku, akatambwila wufwetu wowumu neyi ayiwana nawu ashinshika.

TIYILILENU KUSOÑAMISHA

18-19. Yumanyi yitunadizi muniyi yishimu?

¹⁸ Yumanyi yitunahanjekihu? Kudi ana achiñejaña kushakama haya nyaaka hamaseki, chishimu chawanyikoku nawampembi chinashimuni chichalemena kutwalekahu kwikala ashinshika nawa ovwahila kudi Yehova, chayinu mpinji nimpinji yalukadi lwasweja lunakwinza. Hayina mpinji yakumbidi, Yesu wakayileja ashinshika nindi anateleli kutambwila “wumi wahaya nyaaka.”—Mat. 25:46.

¹⁹ Twahanjeka cheñi hayishimu yiyedi yayisoñamishaña awayishewa. Muchishimu chawajiki ababala niayisupi, atanu amwekesheli nawu akweti maana. Adiloñesheli nawa adiña asoñama, atwalekelihu kumuhembelela kalemba. Ilaña ajiki ayisupi adiloñesheli wanyi. Dichi kalemba wayitejeli wanyi kwiñila muchawija chindi chawulu. Ninetu twatela kwikala adiloñesha kuhembelela hela chakwila hakuleha chamuchidinyi kushika mpinji yakaletayi Yesu kukuma kwanshakaminu yamakonu. Cheñi, muchishimu chaYesu chantalenta, twahanjeka hadi anduñu ayedi ashinshika adiña adikita. Amuzatililiku nkaaka yawu nañovu nawa wayitiyili kuwaha. Hela chochu, nduñu wakatala wamuhañili. Tunakudizilaku yumanyi? Twatela kutwalekahu kudikita mumudimu waYehova kushika nikunsa. Nkumininaku, twahanjeka hadi awayishewa chatela kutwalekahu kwikala atona kulonda ‘akayisendi’ kudi Yesu nakutambwila wufwetu wawu wamwiwulu. Atalilaña chikupu mpinji ‘yakayipompeshawu hamu’ nakuya kudi Yesu mwiwulu. Hanyima yaAmagedoni, akekala kankaña kaYesu muwulu waMwana kaMukoku.—2 Tes. 2:1; Chim. 19:9.

20. Yehova wakeladi nawantu atiyililaña kukusoñamisha kwindi?

²⁰ Hela chakwila wunsompeshi wunakuswina kwakwihi, hitwatela kutiya womaku. Neyi tutwalekahu kwikala ashinshika, Tata yetu wamwiwulu wakukeña wakatwinka “ñovu yabadika hañovu jawantu” kulonda “[twakatweshi] kwimana kumesu aMwana kamuntu.” (2 Kor. 4:7; Luka 21:36) Chili kuchiñeja kwetu kwamwiwulu hela kwahamaseki, tukumuzañaleshaña Tata yetu neyi tutiyililaña kukusoñamisha kwekala muyishimu yaYesu. Muloña waluwi lwaYehova lwasweja, majina etu ‘akekala akusoneka mumukanda’ wawumi.—Dan. 12:1; Chim. 3:5.