Komana Mweluka?

Tumina twalemenenidi kudi aIsarela akunyima?

TUMINA twadiña twalema nankashi muchisemwa chawaIsarela akunyima. Bayibolu yatena tumina twembileñawu nayisanji ninamazu. Kafwampi, chibalu cheneni chaNyikanda yamuBayibolu hitumina, chakutalilahu Masamu, Kamina kaSolomoni niMukeña ayisonekeli neyi tumina. Mukanda waMusic in Biblical Life wahosha nawu Bayibolu “yamwekeshaña hatooka nawu tumina atwimbileña nihampinji yinakuzatawu nyidimu yikwawu muchihandilu.”

Tumina twembileñawu muchihandilu chawu chejima. AIsarela embileña tumina hakwila amwekeshi chinakutiyawu. (Isa. 30:29) Ambanda embileña ñoma janyanya, kwimba tumina namuzañalu nikuhañana hakuswanyika, hayawija nihampinji amashidika yinashindiwu. (Anso. 11:34; 1 Sam. 18:6, 7; 1 Anya. 1:39, 40) AIsarela embileña cheñi tumina twakudila nachu. (2 Kushi. 35:25) Chakadi nikujina, mukanda waMcClintock and Strong’s Cyclopedia, wahosha nawu “aHeberu elukili nankashi kwimba tumina.”

Anyanta amuIsarela akeñeli tumina. Anyanta amuIsarela atiyileña nankashi kuwaha tumina. Mwanta Sawulu wamutambikili Davidi kuchipañu kulonda amwimbileña tumina. (1 Sam. 16:18, 23) Nkumininaku, Davidi yomweni chekaliliyi mwanta, watuñili yuma yakuzatisha hakwimba, wasonekeli tumina twatuwahi nawa washiliku akakwimba hatembeli yaYehova. (2 Kushi. 7:6; Amosi 6:5) Mwanta Solomoni wadiña nawañimbi awamayala niawambanda muchipañu chindi.—Mukwa. 2:8.

Tumina twembileñawu hakudifukula. Chasweja kulema, aIsarela azatishileña tumina hakudifukula kudi Yehova. Kafwampi, añimbi akushika ku 4,000 embileña hatembeli muYerusalema. (1 Kushi. 23:5) Embileña kuzatisha yifoyu, yisanji yanyonji, tudada nimpuña. (2 Kushi. 5:12) Bayi neyi awa antu adiza diwu hohu adifukwileña kudi Yehova natuminaku. AIsarela amavulu embileña Tumina Twawakakukanduka hampinji yayileñawu kuyidika yahachaaka-hachaaka kuYerusalema. (Mas. 120-134) Nawa kwesekeja nachasonekeliwu aYudeya, aIsarela embileña Masamu aHalelia hampinji yadiileñawu Chipandakenu.

Tumina tuchidi twalema kudi antu jaNzambi. (Yak. 5:13) Twatwimbaña neyi mbadi yakudifukula kwetu. (Efwe. 5:19) Tumina twatunuñañeshaña nawakwetu akaKristu. (Kol. 3:16) Nawa twatukoleshaña neyi tunakumona kukala. (Yilw. 16:25) Kwimba tumina hinjila yayiwahi mutwamwekeshelaña netu twamukuhwelela Yehova nawa twamukeña.