Naleka Wanyi Kudiza

Navwalikili mu 1927 mutawuni yanyanya yekala kwakwihi naChicago, Illinois, U.S.A. Atata nawaMama adiña nawanyana atanu—Jetha, Don, ami, Karl niJoy. Wejima wetu twafwilileña kumukalakela Yehova nawumi wetu wejima. Jetha wayili kushikola yamuchiyedi yaGiliyadi mu 1943. Don, Karl niJoy ayili kuBeteli muBrooklyn, New York, mu 1944, mu 1947 nimu 1951 mundonda. Chakutalilahu chawu chachiwahi kushilahu nichawanvwali jami, chankwashili chikupu.

CHISAKA CHETU CHICHADIZILI CHALALA

Atata nawamama akeñeli kutaña Bayibolu nankashi nawa amukeñeli Nzambi chakwila atukwashili ninetu anyana kumukeña. Hela chochu, atata alekeli kulemesha jamachechi hanyima yakuzata wushidika muEurope hampinji yaNjita yaKaayi Yatachi. Amama hakumwekesha kusakilila nawu anafunti amomi, ayilejeli nawu: “AKarl, tuyenu kuchechi neyi chitwelileña.” Atata ayakwili nawu: “Nukukutwalaku, ilaña nikwiñilamu wanyi.” Amama ayihwili nawu: “Muloñadi?” Wena ayakwili nawu: “Hitwadiña kunjita, akulumpi jamachechi adiña mukwitiya kwokumu ilaña adiña nakuhakwilaku kabadi kacheñi munjita, akiswilileña amashidika niyitwa yawu yanjita! Komana Nzambi wadiña kutubadi twejima itu tuyedi?”

Chimwahitili mpinji henohu aMama achidi kuchechi, aYinsahu jaYehova ayedi enjili kwitala detu. Ayinkeli atata nyikanda yiyedi yakudizamu yashindamena haBayibolu yakwila nawu Light, yahosha hamukanda waChimwekeshu. Atata ayitiyili kuwaha iyi nyikanda nawa ayitambwili. Amama chamweniwu iyi nyikanda, atachikili kuyitaña. Dichi ifuku dimu amama amweni nsañu yadiña muchipapilu chansañu yakutambika antu adiña nampwila yakudiza Bayibolu kuzatisha nyikanda yateneneñawu nawu Light. Amama ayili. Chashikiliwu, mumbanda wakula dehi diyi washinkwili kuchiisu. Iku ananyamuni mukanda wumu kuchikasa, aMama ehwili nawu, “Iwu dimukanda wumunakuzatisha hakudiza kunu?” Iwu mumbanda wayakwili nindi, “Eña, ibwambu, iñilaku.” Mulungu wahiñilihu aMama atusendeli etu anyana ejima, nkumininaku twatachikili kuya nakupompa mpinji yejima.

Hakupompa kumu, manakwetu walombweleña wanlejeli nindi nitañi Isamu 144:15, dahosheleña nawu antu adifukulaña kudi Yehova ekalaña namuzañalu. Ayina nsona yantiyishili kuwaha, neyi chantiyishili kuwaha mavasi amakwawu ayedi—1 Timotewu 1:11, yahosha nawu Yehova “[hiNzambi] wamuzañalu,” niAEfwesesa 5:1, yatukonkomwenaña nawu “mwimbujolenuña Nzambi.” Nakunkulwili nami natela kusha muchima kuyuma yinatela kumwilila Nleñi yami nikumusakilila hakukooleka kwakwiluka chalala, chekalili chuma chalema nankashi muchihandilu chami.

Chipompelu chadiña mukamwihi chadiña hahalehi kwenda makilomita 32 muChicago. Hela chochu, twayileña nakupompa, nawa nelukili nsañu yayivulu yamuBayibolu. Inakwanuka ifuku dimu hakupompa manakwetu walombweleña wamwinkeli Jetha kukooleka nindi akulihu. Chinatiyileña nakwakula, nahosheli mumuchima nami: ‘Oyu ñakwilu nayiluka. Chiña ninami nolola chikasa nakwakulahu.’ Natachikili kuloñesha kulonda ninami nakuleñahu. Chasweja kulema, twapaminineña hamu kuspiritu nawayaya jami nianyiki jami. Napapatisheweli mu 1941.

CHINADIZILILI KUDI YEHOVA HAKUPOMPA KWAMANENI

Nanukaña sweje-e chuma chamwekeni hakupompa kweneni mu 1942 muCleveland, Ohio. Mumaluña amakwawu kubadika ha 50 muUnited States ayisokankesheli natelefoni. Chisaka chetu chashakamini mumatenti aloñesheliwu kudi amanakwetu kwakwihi neluña dateneneñawu nawu “trailer city.” Njita Yakaayi Yamuchiyedi yadiña kwakwihi nakutachika, nawa antu adimbulwileña aYinsahu jaYehova avulilileñaku. Namelela, namweni mazanvu awamanakwetu anakwimika nyotoka yawu iku anakutalisha malayiti kwacheñi. Wejima wawu atiyañeni nawu motoka-himotoka mwatela kwikala muntu wunakulonda nawufuku. Neyi amona nawu kudi kukala kunakwinza, amanakwetu ambwileña malayiti akumbidi yanyotoka yawu kulonda aputishi mesu awantu anakuyilukuka nawa adiña nakupipisha. Chelawu mwenimu, antu amakwawu enjileña nakuyikwasha. Natoñojokeli nami, ‘antu jaYehova adiña diloñesha muyuma yejima!’ Dichi muloña wachumichi, nakaamini chiwahi nawa kwosi chuma chamwekeni.

Chimwahitili yaaka, chinanuka akuna kupompa, nelukili nami aMama hiyakamenenihu hela kutiya womaku. Akuhweleleli chikupu mudi Yehova nikuloñesha kwindi. Nakajimbala wanyi chikuhwelelu chamwekesheliwu.

Hashimbwili wanyi kufuma hitwafumini kukuna kupompa, aMama asonekesheli wupayiniya wampinji yejima. Dichi asonekeleña yikuma yadiña mumpanji jahosheleña hamudimu wampinji yejima. Hitwayileña kwitala ahosheli nawu, “Nukukeña kutwalekahu wupayiniya, ilaña nukutwesha wanyi kuzata iwu mudimu hampinji yoyimu inakwakamena nyidimu yahetala.” Kuhiñahu, atwihwili neyi tunateli kuyikwashaku. Twetejeli, dichi hamwana-hamwana aMama atwinkeleña kuwahisha kapeka kamu hela tuyedi henohu kanda tudawuli. Neyi tunayi dehi kushikola, adiña nakutalatala neyi yuma yejima yidi hohu chiwahi mwitala kuhiñahu dinu aya mumudimu wakushimwina. Amama adiña nanyidimu yayivulu, ilaña atwalekelihu kwakamena anyanawu. Chitwafunta kwitala namwaana nakuda nihanyima yakukomboka kushikola, aMama atwakameneneña. Mafuku amakwawu neyi tunafumi kushikola twayileña nawamama nakushimwina, chumichi chatukwashili kwiluka mwatalisha kwikala payiniya.

MPINJI YINATACHIKILI MUDIMU WAMPINJI YEJIMA

Natachikili wupayiniya hinadiña nayaaka 16. Hela chakwila Atata achidiña kanda ekali aChinsahu, atiyileña kuwaha chinazatileña. Ifuku dimu namelela, nayilejeli atata nami hela chakwila nazatileña nañovu, nachidiña kanda niwani muntu wakeñeleña kudiza Bayibolu. Chinahudikilili, nayihwili nami, “Mukwiteja wanyi kudiza nanami?” Atoñojokelihu chanti nawa aakwili nawu, “Kwosi chuma chidi chejima chinnamoni chikunkañesha.” Dichi, Atata diwu adiña kadizi wami waBayibolu watachi. Kwenoku kukooleka kunadiña naku!

Twazatishileña mukanda wahosheleña nawu “The Truth Shall Make You Free.” Chitwatwalekelihu kudiza, nelukili nami Atata ankwashileña kwikala kadizi nawa ntañishi wamuwahi. Chakutalilahu, ifuku dimu namelela hanyima yakutaña paragilafu, ahosheli nawu: “Natiyi chinahoshi iwu mukanda. Hanu dinu wuneluki ñahi neyi iwu mukanda wunakuhosha chalala?” Hinadiloñesheli kwakula ilu lwihuku, dichi nahosheli nami: “Nukutwesha wanyi kuyilumbulwila hohenaha, ilaña hakudiza kwakalondelahu, nakekala nañakwilu.” Nawa dichinelili. Nawanini mavasi amwekesheleña hatooka nawu nsañu yitwahanjekeleñahu yalala. Kufuma haniyi mpinji, naloñesheleña chiwahi kudiza kwejima kunadizileña nawu nikwiluka chakusandujola. Chumichi chankwashili ami niatata kupaminaku kuspiritu. Azatishileña yuma yadizileñawu nawa apapatisheweli mu 1952.

YUMA YINAFUUKWILI KWILA YANKWASHILI KUTWALEKAHU KUDIZA

Nafumini hetala hinadiña nayaaka 17. Jethaa wekalili mishonali, nawa Don, wayili kuBeteli. Wejima wawu ayedi akeñeli nyidimu yazatileñawu, chumichi chankolesheli chikupu. Dichi nasonekesheli kuya kuBeteli nikuShikola yaGiliyadi nawa nashili yuma yejima mumakasa aYehova. Chumanyi chafuminimu? Antambikili kuBeteli mu 1946.

Hadi yaaka yayivulu yinahitihu, nazati nyidimu yambokamboka haBeteli, dichi nadizileña nyidimu yayivulu yayiha. Mwamweni, hadi yaaka 75 yinnazatili haBeteli, anandizishi chakutuña nyikanda nichakuzatila kumali. Nadizili cheñi chakulanda yuma yakuleta haBeteli niyakutwala kumatuña acheñi. Hela chochu, chasweja kubadika, nadiluñishaña maprogilamu akuspiritu ekala haBeteli, chidi neyi kudifukula kwantetemena nijimpanji jashindamena haBayibolu.

Nadizilili cheñi kudi mwanyikami weyala, Karl, wenjili kuBeteli mu 1947. Wadiña kadizi nawa ntañishi wamuwahi waBayibolu. Mpinji yimu namulombeli nami ankwashiku kuloñesha mpanji yanyinkeliwu. Namulumbulwilili Karl nami nakeñeli nsañu yayivulu ilaña chankalilileña chakuyizatisha. Wankwashili kwiluka chuma chinatela kwila nanochu chañihwiliyi lwihu lumu nindi, “Joel, mutu weyi wampanji wunakuhosha nawudi?” Nashikeneni kutiya mwatalishiliyi, dikwila nawu wanlejeleña nindi ninonihu hohu yikuma yinakukeñeka nawa yinashali nibuli kuyizatisha. Ichi hichuma chalema chinabulili kujimbala.

Hakwila twiikali namuzañalu haBeteli, twatela kuzataña nañovu mumudimu wakushimwina, nawa chumichi mwafumaña yuma yayiwahi. Chuma chimu chinnakwanuka chiwahi chamwekeni namelela muBronx muNew York City. Ami nimanakwetu wumu twayili nakuwana mumbanda watambwilili kunyima Kaposhi Kakutalila niAwake! Twatachikili kuhanjeka nindi netu, “Melelanu tunakuhanjeka nawantu kulonda eluki yuma yayiwahi yekala muBayibolu.” Watulejeli nindi, “Neyi yinakuhosha haBayibolu, iñilenu.” Twatañili nikuhanjeka nsona jajivulu jahosheleña haWanta waNzambi nihakwinza kwakaayi kakaha. Chakadi nikujina, iyi nsañu yamutiyishili kuwaha, muloña watambikili niamabwambu jindi amavulu mulungu walondelelihu kwinza nakutiyaku. Nkumininaku, yena nanfumwindi ekalili ambuña aYehova ashinshika.

KUDIZILA KUDI MWINIKWAMI

Nakeñakeñeli muntu wakwiñila nindi muwulu hadi yaaka 10 henohu kanda nimwiluki ñodami. Chumanyi chankwashili kuwana mumbanda watelela? Nalombelelihu nankashi halwihu lwakwila nawu, ‘Yumanyi yinnakukeña kwila neyi tunadisumbuli dehi?’

Hanyima yakupompa kweneni kwadiñaku mu 1953 kuYankee Stadium, nadibulakeni namuhela wejina daMary Aniol. Yena naJetha adiña hamu mushikola yamuchiyedi yaGiliyadi, nawa Mary wazatilileña hamu namuhelami mudimu wawumishonali. Namuzañalu, Mary wanlejeli chazatileñayi mudimu wawumishonali muCaribbean niatudizi aBayibolu alombweliyi hayaaka yahitilihu. Chitwadilukileña chovu-chovu, twelukili netu twafwilileña kwila yuma yoyimu yakuspiritu. Kukeña kwetu kwaswejeleliku, nawa twadisumbwili muApril 1955. Hadi yaaka yayivulu, Mary wadiña neyi chawaana chanyinkeliyi Yehova nawa namwimbujolileña. Wazañaleleña namudimu wejima wunamwinkiwu. Wadiña wadikita, wakameneneña akwawu chikupu, nawa mpinji yejima watwamijileñaku yuma yaWanta. (Mat. 6:33) Twazatili mumudimu wawunkoñi wañinza hadi yaaka yisatu, nawa mu 1958, atutambikili kuya nakuzatila haBeteli.

Nadizilili yuma yayivulu kudi Mary. Chakutalilahu, hitwadisumbwili hohu twafuukwiluhu kutañilaña hamu Bayibolu nawa twatañileña mavasi 15 hefuku-hefuku. Neyi wumu hakachi ketu natañi dehi, tukuhanjeka hanoju nsona nichitunateli kujizatisha muchihandilu chetu. Kakavulu, Mary wanlejeleña yuma yadiziliyi kuGiliyadi hela mumudimu windi wawumishonali. Iyi yuma yitwahanjekeleña yankwashili kwikala nakashinshi nikuwahishaku njila yakuhaninamu mpanji jami nichakukolesha ahela.—Yish. 25:11.

Ñodami inakeña wafwili mu 2013. Ochinatalilaña kumumona mwituña dadiha! Ilaña chayinu mpinji, inakufwila kutwalekahu kudiza, kumukuhwelela Yehova namuchima wami wejima. (Yish. 3:5, 6) Nakundejewaña nikuzañalala neyi nitoñojokaña hayuma yakelañawu antu jaYehova mwituña dadiha. Chumichi munabombeli kutudizisha yuma yayiha kudi Ntañishi yetu Wabadika nikudiza hadi yena! Mwamweni, namusakililaña nankashi hayuma yejima yinandizishiyi nichammwekeshelañayi luwi lwasweja.