Yuma Yayiwahi Yitwadiluñishaña Muloña waKukeña kwaYehova

1. Yumanyi yitwatela kwila hakwila tumuzañalesheña Yehova?

FWIKIJENU munenki muntu imwakeña chawaana chalema chalubanji nawa chikumukwasha. Munateli kuneña nankashi neyi owu muntu achitenteka hohu nawa kuchizatisha nehi! Kwambukaku, munateli kuzañalala chikupu neyi owu muntu achizatishaña ochu chawaana chiwahi nawa amwekesha kusakilila. Tunazatishilidi ichi chakutalilahu? Yehova wahana Mwanindi kukoola etu. Yehova watiyaña kuwaha nankashi neyi tumwekesha kusakilila hanichi chawaana chalema nihakukeña kwindi, kwamuletesheli ahani ifutu danyiloña!​—Yow. 3:16; Rom. 5:7, 8.

2. Yumanyi yitukuhanjekahu muchinu chibaaba?

² Hela chochu, mukuhita kwampinji, tunateli kutachika kubula kulemesha chawaana chefutu danyiloña. Chikwikala tuhu neyi tunakutenteka chawaana chaNzambi muchisweku. Tunatiyi kuwaha kwikala nachu ilaña tunachisweki. Hakwila tukañeshi chuma chamuchidiwu kumwekana, mpinji yejima twatela kumwekeshaña kusakilila hachuma chatwililayi Nzambi niKristu. Achinu chibaaba chikutukwasha kwila mwenimu. Tukuhanjeka ifutu danyiloña chidinateli kutukwasha makonu nikumbidi. Tukuhanjeka cheñi chitunateli kumwekesha kusakilila hakukeña kwaYehova, sweje-e muyinu mpinji yaChanukishu.

IFUTU DANYILOÑA CHIDATUKWASHAÑA MAKONU

3. Njilanyi yimu ifutu danyiloña mudatukwashilaña chayinu mpinji?

³ Chayinu mpinji tunakudiluñisha nkisu yafumaña mumulambu wefutu danyiloña daKristu. Chakutalilahu, muloña wefutu danyiloña, Yehova wanakenaña nshidi jetu. Kwosi wamukanjikijaña kutwanakenaku. Wakeñaña kwila mwenimu. Ñimbi yaMasamu wamwekesheli kusakilila wembili nindi: “Muloña eyi, eyi Yehova, wudi muwahi nawa wanakenaña swayi.”​—Mas. 86:5; 103:3, 10-13.

4. Yehova wahaninini anyi ifutu danyiloña? (Luka 5:32; 1 Timotewu 1:15)

⁴ Amakwawu anateli kutiya nawu ashikilamu wanyi kuyanakena kudi Yehova. Kafwampi, wejima wetu twashikilamu wanyi. Kapostolu Pawulu welukili nindi ‘hashikililimu kumutena nawu kapostoluku.’ Ilaña wabombelelihu nindi: “Naluwi lwaNzambi lwasweja, nekali kapostolu.” (1 Kor. 15:9, 10) Neyi tubalumuka mumuchima nakuleka nshidi jetu, Yehova watwanakenaña. Muloñadi? Bayi neyi twatelela kutwanakenaku, ilaña muloña watukeña. Neyi munakuditiya kwikala amukunkulwayi, anukenuña nenu Yehova wahaninini wanyi ifutu danyiloña antu akadi nshidi, ilaña akanshidi abalumukaña munyichima.​—Tañenu Luka 5:32; 1 Timotewu 1:15.

5. Komana hakachi ketu hadi watela kudimona nindi nashikilimu kumutiyila luwi kudi Yehova? Lumbululenu.

⁵ Kwosi niwumu hakachi ketu wunateli kutoñojoka nindi diyi wunashikilimu kumutiyila luwi kudi Yehova muloña nazati yaaka yayivulu mumudimu windiku. Hela chochu, Yehova wasakililaña hakashinshi kitunamwekeshi hadi yaaka yayivulu. (Heb. 6:10) Watwinkeli Mwanindi kwikala chawaana chamukunkulu, bayi neyi kulonda atufweti hanyidimu yitwazatañaku. Neyi tuhosha netu anatutiyili luwi muloña twazatili nyidimu yayivulu, chidi tuhu neyi tunakuhosha netu kufwa kwaKristu kwamukunkulwayi.​—Esekejenu AÑalija 2:21.

6. Muloñadi Pawulu chadikitilileñayi mumudimu waYehova?

⁶ Pawulu welukili nindi hiyanateli kumutiya kuwaha kudi Nzambi muloña hohu wanyidimu yindiku. Hanu dinu muloñadi chadikitilileñayi mumudimu waYehova? Bayi neyi kudimwekesha yomweni nindi nashikilimu kumutiyila luwiku, ilaña wafwilileña kumwekesha kusakilila haluwi lwaYehova lwasweja. (Efwe. 3:7) Kufwana Pawulu, twatwalekañahu kudikita, bayi neyi kulonda Yehova atutiyili luwiku, ilaña tumwekesheña kusakilila hanichi chawaana.

7. Njila yikwawu mwatukwashilaña ifutu danyiloña chayinu mpinji? (ARoma 5:1; Yakoba 2:23)

⁷ Njila yikwawu mwatukwashilaña ifutu danyiloña chayinu mpinji yidi yakwila nawu tunateli kwikala nawubwambu wakola naYehova hamuntu-hamuntu.a Neyi chashimwiniwu muchibaaba chinafumihu, hampinji yitwavwalikili, hitwadiña nawubwambu naNzambiku. Ilaña hamuloña wefutu danyiloña tunateli kwikala nawubwambu naNzambi nikuswina kwakwihi nayena.​—Tañenu ARoma 5:1; Yakoba 2:23.

8. Muloñadi chitwatela kumusakilila Yehova hakukooleka kwakulomba?

⁸ Talenu hanjila yimu yatukwashaña kwikala nawubwambu naYehova​—kukooleka kutukweti kwakulomba. Yehova hatiyaña hohu kulomba kwawantu jindi neyi anapompi hamuku, ilaña watiyaña kulomba kwetu hamuntu-hamuntu. Kulomba kwawundishaña muchima wetu nawa hikwatwinkaña hohu kuwunda kwamuyitoñojokaku, kwazataña cheñi mudimu weneni. Kwatukwashaña kukolesha wubwambu wetu naNzambi. (Mas. 65:2; Yak. 4:8; 1 Yow. 5:14) Hampinji yadiñayi hamaseki, Yesu walombeleña mpinji yejima muloña welukili nindi Yehova watiyileña nawa welukili nindi kulomba kukumukwasha kwikala nawubwambu wakola naTata yindi. (Luka 5:16) Twasakililaña nankashi muloña tweluka netu, hamuloña wamulambu waYesu, tunateli kwikala amabwambu jaYehova nikuhosha naYena mukulomba!

IFUNTU DANYILOÑA CHIDIKATUKWASHA KUMBIDI

9. Ifutu danyiloña dakayikwasha ñahi akakudifukula ashinshika kumbidi?

⁹ Ifutu danyiloña dakayikwasha ñahi akakudifukula aYehova ashinshika kumbidi? Akayinka wumi wahaya nyaaka. Antu amavulu atoñojokaña nawu chikatwesheka wanyi muloña antu atachikili dehi kufwa. Ilaña nkeñelu yaYehova yatachi yadiña yakwila nawu antu akashakameña haya nyaaka. Neyi Adama wavulumwini wanyi, kwosi wadi kutoñojokaña nindi antu hiyanateli kukañanya kushakama haya nyaakaku. Nawa hela chayinu mpinji kushakama haya nyaaka kunateli kumwekana neyi kwila kuzatika nehi, ilaña tunakuhweleli netu kwakazatika muloña Yehova wahanini chawaana chalema wuseya, wumi waMwanindi akeñayi, kulonda twiikali naniku kuchiñeja.​—Rom. 8:32.

10. Yumanyi yatalilañawu awayishewa nianyikoku amakwawu?

¹⁰ Hela chakwila wumi wahaya nyaaka wakekalaku kumbidi, Yehova nakukeña nindi tuwuchiñejeña makonu. Awayishewa atalilaña kwikala nawumi mwiwulu hampinji yakayulañawu heseki hamu naKristu. (Chim. 20:6) Anyikoku amakwawu atalilaña kushakama muParadisa hamaseki mwakabula kuyeña nichineñi. (Chim. 21:3, 4) Komana mudi hakachi kawanyikoku amakwawu anakutalila wumi wahaya nyaaka hamaseki? Iwu wufwetu wanyanya wanyi kubadika wamwiwulu! Dichuma chayileñeleliwu antu ejima. Chihandilu chahamaseki chakekala chamuzañalu chikupu.

11-12. Yumanyi yitunakutalila kudiluñisha muParadisa? (Talenu cheñi nyevulu.)

¹¹ Toñojokenu chihandilu chichakekala muParadisa hamaseki. Mwakakamenaña wanyi kukata hela kufwa. (Isa. 25:8; 33:24) Yehova wakayinka yuma yejima yimwafwilaña. Yumanyi yimwakafwilaña kwila? Mukafwilaña kudiza yuma yayivulu hadi anyama? Mwakafwilaña kwiluka kwimba kuzatisha chisanji? Mwakakeñaña kwiluka chakuleña? Chakadi nikujina, kwakakeñekaña antu aleñaña, akakutuña matala niandimi. Nawa kwakekala nyidimu yikwawu yakuwahisha nikuloñesha, kuloñesha yakuda, kutuña yitwa nikuwayisha kulonda ituña dakamwekaneña lubanji. (Isa. 35:1; 65:21) Chimwakashakamaña haya nayaaka, mwakekalaña nampinji yakuzata nyidimu yejima yimwakakeña.

¹² Wenowu muzañalu wutwakekala nawu hakutambwila antu akasañulawu! (Yilw. 24:15) Fwikijenu cheñi chimwakadiluñishaña kudizilahu yuma yayivulu hadi Yehova kuhitila mukushinshika yileñaleña. (Mas. 104:24; Isa. 11:9) Chasweja kubadika, twakazañalalaña chitwakadifukulaña kudi Yehova chakadi kudimona netu tudi akanshidi! Komana mukukeña kuhimpa yuma yitwakadiluñisha kumbidi nakudiluñisha “chiseki chanshidi chahakapinji kantesha”? (Heb. 11:25) Kwakulehi mwani! Nkisu yitukatambwila yabadika kudihana kutunateli kudihana chayinu mpinji. Anukenu, twakatwalekahu wanyi kuchiñeja Paradisa yahamaseki. Haniyi mpinji dichuma chitwakadiluñishaña. Kwosi chuma chitwadi kutambwila haniyi yuma neyi Yehova watukeñeli wanyi nakutwinka chawaana chaMwanindi!

MWEKESHENU KUSAKILILA HAKUKEÑA KWAYEHOVA

13. Tunateli kumwekesha ñahi kusakilila kudi Yehova hakukeña kwindi? (2 AKorinda 6:1)

¹³ Tunateli kumwekesha ñahi kusakilila kudi Yehova hakutwinka ifutu danyiloña? Kuhitila mukutwamijaku mudimu windi muchihandilu chetu. (Mat. 6:33) Kafwampi, Yesu wafwili “kulonda antu anakuhanda abuli kudihandila awenawu, ilaña amuhandili owu wayifwilili nawa asañwiliwu.” (2 Kor. 5:15) Twatela kuzata nañovu kwila nkeñelu yaYehova yakumwekesha luwi lwasweja.​—Tañenu 2 AKorinda 6:1.

14. Tunateli kukuhwelela ñahi wunlomboli waYehova?

¹⁴ Tunateli kumwekesha cheñi kusakilila hakukeña kwaYehova neyi tukuhwelelaña muwunlomboli windi. Tukwila nahi mwenimu? Neyi tunakufuukula hayuma, chidi neyi shikola yitwatela kuya hela mudimu wutwatela kwiñila, twatela kutoñojoka yuma yinakukeñayi Yehova nindi twili. (1 Kor. 10:31; 2 Kor. 5:7) Neyi tumukuhwelela, kudi chuma chachiwahi chamwekanaña​—chikuhwelelu chetu niwubwambu wetu naYehova wakolelañaku. Twaswejelañaku kuchiñeja.​—Rom. 5:3-5; Yak. 2:21, 22.

15. Tunateli kumwekesha ñahi kusakilila mumpinji yaChanukishu?

¹⁵ Kudi njila yikwawu cheñi mutunateli kumwekeshela kusakilila hakukeña kwaYehova. Hikuzatisha mpinji yaChanukishu kulonda tumwekeshi kusakilila hefutu danyiloña. ­Kubombela hakudiloñesha kulonda twakayi kuChanukishu, tunateli kutambika antu amakwawu niwena akapompi. (1 Tim. 2:4) Yilumbulwilenuña antu imunakutambika kulonda eluki yuma yikamwekana haChanukishu. Munateli kuyitalisha ha jw.org vidiyo yinakwila nawu Muloñadi Chafwililiyi Yesu? niyinakwila nawu Chanukishu Chakufwa kwaYesu. Akulumpi atela kuzata nañovu kutambika azeya. Fwikijenu muzañalu wukwikala mwiwulu nihamaseki neyi anyikoku amakwawu ajimbala aYehova anayikwashi kufunta hamukanka! (Luka 15:4-7) Hampinji yaChanukishu, twatela kuzata nañovu kudimusha wumu namukwawu, sweje-e antu amaha hela anabuli kupompa nanetu hadi mpinji yayilehi. Twatela kuyikwasha kwikala akasunuka!​—Rom. 12:13.

16. Muloñadi chitwatela kutoñojokelahu kuzata nañovu mumudimu wakushimwina mumpinji yaChanukishu?

¹⁶ Munateli kuzataku nañovu mumudimu waYehova mumpinji yaChanukishu? Kwila mwenimu hinjila yayiwahi yitwamwekeshelañamu kusakilila hayuma yejima yayiwahi yatwililayi Nzambi niKristu. Neyi tuzata nañovu mumudimu waYehova, wukutukwasha, nawa chikufumamu, tukumukuhwelela chikupu. (1 Kor. 3:9) Cheñi, mwatela kulondela ndandanda yakutaña Bayibolu mumpinji yaChanukishu yekalaña Mukutalatala muNsona Hefuku-Hefuku hela yekalaña mumukanda wakupompa kwamukachi kamulungu. Munateli cheñi kutondahu kuzatisha iyi njila yakutañilamu Bayibolu hampinji yakudiza nkawenu.

17. Yumanyi yamuzañaleshaña Yehova? (Talenu cheñi chikasha chinakwila nawu “Chakumwekesha Kusakilila haKukeña kwaYehova.”)

¹⁷ Hela chochu, etu amakwawu chinateli kutukalila kwila yuma yejima yinashimuniwu muchinu chibaaba. Ilaña, anukenu nenu Yehova wesekejaña wanyi yuma yimunateli kumwinka nayinateli kumwinkawu antu amakwawu; wamonaña yuma yidi mumuchima wenu. Wazañalalaña neyi amona chimunakumwekesha kusakilila chakufuma hamuchima hachawaana chalema, chefutu danyiloña.​—1 Sam. 16:7; Maku 12:41-44.

18. Muloñadi chitwamwekeshelaña kusakilila kudi Yehova Nzambi niYesu Kristu?

¹⁸ Hamuloña hohu wefutu danyiloña anateli kutwanakena nshidi jetu, kwikala nawubwambu naYehova nikwikala nakuchiñeja kwakushakama haya nyaaka. Tumwekesheña mpinji yejima kusakilila hakukeña kwaYehova kwamusañumwini kulonda atwinki iji nkisu jejima. (1 Yow. 4:19) Tumusakilileña cheñi Yesu watukeñeli nankashi, chakwila wahanini wumi windi kukoola etu!​—Yow. 15:13.