Imbujolenu Chatoñojokaña Yehova niYesu

1-2. Mukumukeña Yehova mwabombeladi, nawa Yesu welili ñahi mwenimu?

“WATELA kukeña Yehova Nzambi yeyi namuchima weyi wejima, nawumi weyi wejima, nañovu jeyi jejima ninayitoñojoka yeyi yejima.” (Luka 10:27) Yesu welukili nindi ilu hilushimbi lwalema nankashi muNshimbi jaMosi. Ilukenu nenu mukumukeña Yehova munabombeli muchima wetu, mwabombela yuma yitwafwilaña nichitwatiyaña. Mwabombela cheñi chitwamukalakelaña nawumi wetu wejima ninañovu jetu jejima. Mukumukeña Yehova munabombeli niyitoñojoka yetu, mwabombela chitwatoñojokaña hayuma. Hela chochu, hitunateli kwiluka yitoñojoka yaYehova yejimaku. Ilaña tunateli kwiluka yitoñojoka yaNzambi neyi tudizaña “yitoñojoka yaKristu” muloña Yesu wembujolaña chikupu yitoñojoka yaTata yindi.—1 Kor. 2:16.

² Yesu wamukeñeli Yehova nayitoñojoka yindi yejima. Welukili chuma chakeñeleñayi Nzambi nindi eli nawa wafwilileña kwila kwesekeja nachumichi, hela chakwila kwila mwenimu kwadi kumuletesha kukabakana muloña wakwila chuma chaloña. Chineli washili maana hakwila nkeñelu yaTata yindi, Yesu hetejeli chuma chidi chejima kumukañesha kwila ichi chumaku.

3. Yumanyi yadizililiyi kapostolu Petulu kudi Yesu, nawa wayikolesheli akwawu akaKristu kwiladi? (1 Petulu 4:1)

³ Petulu niakwawu apostolu adiña nakukooleka kwakuzatila hamu naYesu nawa adimweneni namesu kapu chatoñojokeleñayi. Petulu chasonekeliyi mukanda windi watachi wonenewa, wakolesheli akaKristu kwikala nayitoñojoka yoyimu neyi yikwetiyi Kristu. (Tañenu 1 Petulu 4:1.) Mwidimi dachiGiriki, Petulu chasonekeliyi nindi: “Dimanyekenu,” wazatishili idi izu hakulumbulula amashidika adimanyekeli nayitwa yanjita kulonda ayi nakuzuña. Dichi neyi akaKristu embujola yitoñojoka yaKristu hela chatoñojokañayi, akudimanyeka yitwa yañovu yikuyikwasha kushinda kufwila kwatama nikaayi kanakuyuulawu kudi Satana.—2 Kor. 10:​3-5; Efwe. 6:12.

4. Achinu chibaaba chikutukwasha ñahi kulondela kufumba kwaPetulu?

⁴ Tukuhanjeka hachatoñojokañayi Yesu nichitunateli kumwimbujola. Tukudiza chitunateli (1) kwimbujola chatoñojokañayi Yehova, yinateli kutukwasha wejima wetu kutoñojoka mwomumu, (2) kwikala adizoza, nawa (3) kutoñojoka mwamaana kuhitila mukumushindamena Yehova mukulomba.

IMBUJOLENU CHATOÑOJOKAÑAYI YEHOVA

5. Petulu wakañenyi ñahi mpinji yimu kwila yuma kwesekeja nachatoñojokañayi Yehova?

⁵ Toñojokenu mpinji yimu helili Petulu akañanyi kwila yuma kwesekeja nachatoñojokañayi Yehova. Yesu walejeli apostolu indi nindi wakaya kuYerusalema, kwenakuna akamuhana kudi akulumpi jakudifukula, akamukabisha nawa nkumininaku, akamujaha. (Mat. 16:21) Chatela chamukalili Petulu kwiteja nindi Yehova waketeja Yesu—muntu achiñejeleñawu aIsarela nawa Mesiya akaniniwu—akamujahi. (Mat. 16:16) Dichi Petulu wamutwalili Yesu hambadi nakumuleja nindi: “Ditiyili luwi, Mwanta; yumiyi hiyakakumwekena hela hantiku.” (Mat. 16:22) Chineli Petulu helili ichi chuma kwesekeja nachatoñojokañayi Yehovaku, yitoñojoka yindi yaambukili nayitoñojoka yaYesu.

6. Njilanyi Yesu mwamwekesheleliyi nindi watoñojokeleña kwesekeja nachatoñojokañayi Yehova?

⁶ Yitoñojoka yaYesu yesekeni chikupu nayitoñojoka yaTata yindi wamwiwulu. Yesu wamulejeli Petulu nindi: “Yaku kunyima yami, eyi Satana! Wudi chuma chakunhukesha, muloña watoñojokaña yitoñojoka yawantu bayi yaNzambiku.” (Mat. 16:23) Petulu watela wachimweni nindi chidi hohu chiwahi, ilaña Yesu wakaanini kufumba kwaPetulu. Kudi chuma chitwatela kudizilaku. Kufwila kwila chuma chamweneñayi yomwenindi nindi chidi hohu chiwahi diyadiña keñelu yaYehova kutalisha hadi Yesu wanyi. Hayina mpinji, Petulu wadizili chuma chalema chakwila yuma kwesekeja nayitoñojoka yaNzambi bayi yidiku.

7. Mukuhita kwampinji, Petulu wamwekesheli ñahi nindi watachikili kwimbujola yitoñojoka yaNzambi? (Talenu mwevulu wudi.)

⁷ Nkumininaku, Petulu wamwekesheli nindi wakeñeleña kutachika kutoñojoka kwesekeja nachatoñojokañayi Yehova. Mpinji yashikili yawakaNyuza abula kwalama kutachika kwikala hakachi kawantu jaNzambi. Petulu amwinkeli mudimu wakuya nakumushimwina Konelisu wakuNyuza, muntu watachi hadi antu akuNyuza wekalili mukaKristu. AYudeya hiyatiyañeneña nankashi nawantu akuNyuzaku, dichi chatuhayamishaña wanyi kwiluka netu Petulu wakeñekeleña wukwashu hakwila adiloñeshi kuzata iwu mudimu. Petulu chelukiliyi nkeñelu yaNzambi kutalisha haniyi nsañu, wahimpili chamweneñayi yuma. Chafuminimu, chamutambikiliwu, wayili “chakadi kujinoka.” (Yilw. 10:​28, 29) Wamushimwinini Konelisu niamwitala dindi nawa apapatisheweli.—Yilw. 10:​21-23, 34, 35, 44-48.

8. Tunateli kumwekesha ñahi netu yitoñojoka yetu yinesekani nayitoñojoka yaYehova? (1 Petulu 3:8 nitumazu twaheshina)

⁸ Chimwahitili yaaka, Petulu wayikolesheli akwawu akaKristu nindi ‘atoñojokeña mwomumu.’ (Tañenu 1 Petulu 3:8 nitumazu twaheshina.) Etu antu jaYehova, twatela kutoñojokaña mwomumu kuhitila mukwimbujola chatoñojokañayi Yehova neyi chashimunawu Mwizu dindi. Chakutalihu, Yesu wakolesheli akakumulondela kutwamijaku Wanta muchihandilu chawu. (Mat. 6:33) Muloña wachumichi, mukakushimwina muchipompelu chenu nateli kufuukulahu kutachika mudimu wampinji yejima. Chatela tumuleji netu aditiyili luwi yomweni, twatela kuhosha mazu akumukolesha netu neli chiwahi nawa twatela kumukwasha.

IKALENU ADIZOZA

9-10. Yesu wamwekesheli ñahi kudizoza kwakweni?

⁹ Hawufuku wakwila henohu kanda amujahi, Yesu wamudizishili Petulu niapostolu amakwawu chichalemena kwikala wadizoza. Henohu kanda, Yesu watemesheli aPetulu naYowanu kuya nakuloñesha yuma yakuzatisha hakuda kwakukumishaku kwadiililiyi hamu nawena henohu kanda yafwi. Hayuma yaloñesheliwu, hatela hadiña beseni nimatawelu kulonda ayizatishi kuwelesha nachu nyendu yawantu atambikiliwu. Hanu dinu hinyi wadi kuzata iwu mudimu wamwekeneña neyi walema wanyi neyi mpinji yinashiki dehi?

¹⁰ Chakadi kushintajala, Yesu wamwekesheli kudizoza kwasweja. Apostolu indi ahayamini nankashi muloña wazatili mudimu watela kuzata ñamba. Yesu wasubwili chakuvwala chindi chahewulu, wadikasili tawelu mumbunda, washili menji mubeseni nawa watachikili kuyiwelesha kunyendu. (Yow. 13:​4, 5) Hatela hahitili mpinji hakwila amanishi kuwelesha nyendu yawapostolu indi 12, kushilahu niYudasi, wenjili nakumufukejela. Hela chochu, Yesu wadizozeli nakumanisha kuyiwelesha kunyendu. Kuhiñahu, Yesu wayilumbulwilili mukudiwunjika nindi: “Chuma chinnayili enu munachiluki? Mwantenaña nenu, ‘Ntañishi’ nawa nenu ‘Mwanta,’ mwahoshaña mwalala, muloña dichinekala. Dichi, neyi ami Mwanta nawa Ntañishi, nayiweleshi kunyendu, dikwila nawu ninenu mwatela kudiwelesha kunyendu wumu namukwawu.”—Yow. 13:​12-14.

11. Petulu wamwekesheli ñahi nindi wadizili kwikala wadizoza? (1 Petulu 5:5) (Talenu cheñi mwevulu.)

¹¹ Petulu wadizilili kukudizoza kwaYesu. Chelili Yesu nafunti dehi mwiwulu, Petulu wakoñeli chihayamisha kuhitila mukuuka iyala wavwalikili chifwayi. (Yilw. 1:​8, 9; 3:​2, 6-8) Chakadi nikujina, antu amavulu atiyili kuwaha hakumona ichi chihayamisha. (Yilw. 3:11) Komana Petulu wadi kudinyamuna chikupu chineli wakulilili muchituñilu mwalemesheliwu kuya mpuhu niyifulu? Inehi. Petulu wadizozeli nawa wayilejeli kuhana kalemesha kejima kudi Yehova niYesu, chahosheliyi nindi: “Kuhitila mwijina [daYesu] nimuloña wakukuhwelela kwetu mwijina dindi, dichuma chinaleteshi iwu muntu imunakumona nawa imweluka amuuki.” (Yilw. 3:​12-16) Mazu azatishiliyi Petulu mumukanda wasonekeleliyi akaKristu kutalisha hakwikala adizoza, anateli kutwanukisha chuma chamwekeni hampinji yakasiliyi Yesu tawelu mumbunda yindi nakuwelesha nyendu yawapostolu.—Tañenu 1 Petulu 5:5.

12. Kufwana Petulu, tunateleli kutwalekahu ñahi kwikala adizoza?

¹² Tunateli kumwimbujola Petulu kuhitila mukwikala adizoza. Anukenu nenu mukudizoza kwakweni mwabombela yuma yayivulu kubadika kuhosha hohu mazu atelela. Izu dazatishiliyi Petulu dakudizoza mwabombela yitoñojoka yetu yamukachi—dikwila nawu ‘kudizoza muyitoñojoka.’ Twazatilaña antu muloña twamukeña Yehova niantu, bayi neyi twakeñaña kutuhamekaku. Neyi tuzataña nañovu kumukalakela Yehova niamanakwetu namuzañalu hela chakwila kwosi anakumona nawu tunakuzata nañovu, twamwekeshaña hatooka netu twadizoza.—Mat. 6:​1-4.

“TOÑOJOKENUÑA MWAMAANA”

13. Lumbululenu yuma yabombela ‘mukutoñojoka mwamaana.’

¹³ ‘Kutoñojoka mwamaana’ mwabombeladi? (1 Pet. 4:7) MukaKristu watoñojokaña mwamaana wazataña nañovu kufuukula yuma yesekana nachatoñojokañayi Yehova. MukaKristu wamuchidiwu weluka nindi kwosi chuma chalema kubadika wubwambu windi naYehova. Watondolwelaña kudimona nindi walema nawa weluka yuma yejima. Wamwekeshaña cheñi nindi wamushindamenaña Nzambi kuhitila mukulomba kudi Yehova kakavulu mukudizoza.

14. Mpinji yimu Petulu wakañenyi ñahi kumushindamena Yehova?

¹⁴ Hawufuku wakukumishaku henohu kanda afwi, Yesu wayisoñamishili atumbanji twindi nindi: “Wejima wenu mukunshiya wunu wufuku muloña wachuma chikummwekena.” Petulu wadikuhweleleli nakuhosha nindi: “Hela neyi ejima akukushiya muloña wachuma chikukumwekena, ami nukukushiya wanyi!” Hawuna wufuku Yesu wayikonkomweneni atumbanji twindi amakwawu nindi: “Dichi tonenuña nawa lombenuña.” (Mat. 26:​31, 33, 41) Neyi Petulu walondeleli iku kufumba hakusambila, wadi kuhamuka nakwiteja nindi wamwilukili Yesu. Ilaña Petulu wamukaanini Nkaaka yindi, chuma chamuletesheli yaneñi nankashi.—Mat. 26:​69-75.

15. Yesu watwalekelihu ñahi kutoñojoka mwamaana hawufuku windi wakukumishaku?

¹⁵ Yesu wamushindameneni Yehova chikupu. Hela chakwila Yesu wadiña wawanina, walombeleña mpinji yejima. Chumichi chamukwashili kwikala wahamuka kwila yuma kwesekeja nankeñelu yaYehova yamutemesheleliwu. (Mat. 26:​39, 42, 44; Yow. 18:​4, 5) Chakadi nikujina, Petulu wavulameneni wanyi nindi Yesu walombeli kakavulu hawufuku windi wakukumishaku.

16. Petulu wamwekesheli ñahi nindi watoñojokeleña mwamaana? (1 Petulu 4:7)

¹⁶ Chimwahitili mpinji, Petulu watachikili kumushindamena Yehova chikupu mukulomba. Yesu asañwiliwu, wamulejeli Petulu niakwawu apostolu nindi akatambwila spiritu yajila kulonda akatweshi kuzata mudimu wakushimwina wayinkeliyi. Hela chochu, Yesu wayilejeli kuya nakuhembelela kuYerusalema, sampu chumichi chinamwekani. (Luka 24:49; Yilw. 1:​4, 5) Yumanyi yeliliyi Petulu hampinji yahembeleleñawu? Petulu niakwawu akaKristu “alombeleña chikupu.” (Yilw. 1:​13, 14) Mukuhita kwampinji, mumukanda windi watachi, Petulu wakolesheli akwawu akaKristu nindi atoñojokeña mwamaana nikumushindamena Yehova mukulomba. (Tañenu 1 Petulu 4:7.) Petulu wadizili kumushindamena Yehova nawa wekalili chishimi muchipompelu.—Ñal. 2:9.

17. Hela chakwila kudi nyidimu yikwawu yitukutwesha kuzata muñovu jetu, chumanyi chitwatela kutwalekahu kwila? (Talenu cheñi mwevulu.)

¹⁷ Hakwila tutoñojokeña mwamaana, twatela kulombaña kudi Yehova mpinji yejima. Tweluka netu twatela kutwalekahu kulomba kudi Yehova hela chakwila kudi nyidimu yikwawu yitukutwesha kuzata muñovu jetu. Dichi, twatela kulomba netu Yehova atulomboli nakukuhwelela netu neluki yuma yinateli kutukwasha, sweje-e neyi kudi yuma yalema yitunakukeña kufuukula.

18. Tunateli kutachika kutoñojoka ñahi neyi chatoñojokañayi Yehova?

¹⁸ Twamusakililaña Yehova nankashi muloña watuleña munjila yakwila twekala nayilwilu neyi yikwetiyi. (Kutach. 1:26) Hela chochu, hitunateli kwesekana naYehovaku. (Isa. 55:9) Ilaña kufwana Petulu, tunateli kutachika kutoñojoka neyi chatoñojokañayi Yehova. Dichi twileña mwenimu kuhitila mukutwalekahu kwimbujola chatoñojokañayi Nzambi, kwikala adizoza nikutoñojoka mwamaana.