Yikwashenu aTudizi aBayibolu aFuukulihu Kumukalakela Yehova

1-2. (a) Muloñadi atudizi aBayibolu amakwawu chashintajalilañawu kufuukulahu kwikala Chinsahu chaYehova? (b) Yumanyi yitukuhanjekahu muchinu chibaaba?

KOMANA kudihu yuma yayiletesheleña kushintajala kwikala Chinsahu chaYehova? Hadaha mwatiyileña woma nenu akuyihela kudi akwenu mumwazatilaña, amabwambu jenu, hela kudi antaña jenu. Indi kwiji mwatoñojokeleña nenu chakayikalilaña kwovwahila nshimbi jaNzambi. Neyi dichimwatiyileña, munateli kutiyishisha chinakutiya atudizi amakwawu anakushintajala hakwila afuukulihu kwikala Chinsahu chaYehova.

² Yesu welukili nindi woma wamuchidiwu wunateli kumuletesha muntu kubula kupama kuspiritu. (Mat. 13:​20-22) Ilaña halekeli kukwasha antu ashintajalileña kumulondelaku. Hela chochu, wayilejeli atumbanji twindi chatela kukwashawu antu amuchidawa (1) chakwiluka yuma yinakuyikañesha kupama, (2) chatela kusweja kumukeñawu Yehova, (3) chakushiya yuma yalemeshawu nakutachika kumukalakela Yehova, nawa (4) chakumanisha kukala kunakumonawu. Tunateli kuzatisha ñahi yuma yayilejeliyi Yesu atumbanji twindi hampinji yitunakuzatisha mukanda waMunateli Kwikala naMuzañalu Haya Nyaaka! hakukwasha kadizi wetu kufuukulahu kwikala Chinsahu chaYehova?

CHAKWILUKA YUMA YINAKUYIKAÑESHA KUPAMA

3. Chumanyi chatela chamukañesheleña Nikodemu kwikala kambanji kaYesu?

³ Nikodemu, nlomboli wawaYudeya alemesheliwu nankashi, kudi chuma chamukañesheleña kwikala kambanji kaYesu. Wamwilukili Yesu nindi hiñimeni yaNzambi chimwahitili hohu tukweji kwakwihi na 6 kufuma hatachikiliyi Yesu mudimu windi. (Yow. 3:​1, 2) Hela chochu, Nikodemu wafuukwilihu kudimona naYesu mukuswamujoka “muloña watiyileña woma aYudeya.” (Yow. 7:13; 12:42) Hadaha watoñojokeleña nindi wadi kujimbesha yuma yayivulu nankashi neyi ekala kambanji kaYesu.a

4. Yesu wamukwashili ñahi Nikodemu kutiyishisha yuma yakeñeleñayi Nzambi nindi eli?

⁴ Nikodemu welukili Nshimbi jaMosi, ilaña wakeñekeleña kumukwasha kutiyishisha yuma yakeñeleñayi Yehova nindi eli. Yesu wamukwashili ñahi? Yesu wazatishileña chiwahi mpinji yindi chakwila wadihanini kuhanjeka naNikodemu nihampinji yawufuku. Nawa Yesu walumbulwili hatooka yuma yateleli kwilayi Nikodemu hakwila ekali kambanji. Wateleleli kubalumuka mumuchima nakuleka nshidi jindi, kupapatishewa mumenji nikukuhwelela mudi Mwana kaNzambi.—Yow. 3:​5, 14-21.

5. Tunateli kumukwasha ñahi kadizi waBayibolu kwiluka yuma yinakumukañesha kupama?

⁵ Hela chakwila kadizi waBayibolu weluka chiwahi Nsona, wukukeñeka kumukwasha kulonda yeluki yuma yinakumukañesha kupama. Nyidimu yakumujimba, indi kwiji ikañesha damuchisaka, hadaha jinakumukañesha kufuukulahu kwikala Chinsahu chaYehova. Dichi ikalenuña nampinji yakumukwasha kadizi wenu. Munateli kumutambika kulonda enzi mudiili hamu yakuda hela kuhemena hamu nindi. Hampinji jamuchidiwu, chinateli kumukwasha kwikala wakasunuka kushimuna kukala kunakumonayi. Mukoleshenu kadizi wenu yahimpi hanakukeñeka, bayi neyi muloña wakukeña kuyitiyisha enu kuwahaku, ilaña yamwekeshi nindi wamukeña Yehova.

6. Munateli kumukwasha ñahi kadizi wenu kwikala wahamuka kulonda yafuukulihu kwikala Chinsahu chaYehova? (1 AKorinda 16:13)

⁶ Neyi kadizi yakuhwelela nindi Yehova wukumukwasha kulonda ovwahileña nshimbi jamuBayibolu, wukwikala wahamuka kuzatisha yuma yinakudizayi. (Tañenu 1 AKorinda 16:13.) Mudimu wumukweti wudi neyi wantañishi kushikola. Neyi mwanuka mpinji yimwayileña kushikola, ntañishi wamuchidinyi imwakeñeli nankashi? Hadaha hintañishi wadiwunjikileña nakuyikwasha kulonda mukuhweleli nenu munateli kwila chachiwahi. Munjila yoyimu, ntañishi waBayibolu wamuwahi, hatañishaña hohu yuma yakeñañayi Nzambi nindi twileñaku, ilaña wamulejaña cheñi kadizi windi kukuhwelela nindi nawukwashu waYehova, nateli kuhimpa hanakukeñeka muchihandilu chindi. Munateli kwila ñahi mwenimu?

MUKWASHENU KADIZI WENU ASWEJI KUMUKEÑA YEHOVA

7. Yesu wakwashili ñahi antiyilili jindi kwikala namuchima wakusweja kumukeña Yehova?

⁷ Yesu welukili nindi kumukeña Nzambi kukuyisañumuna atumbanji twindi kuzatisha yuma yadizileñawu. Kakavulu wadizishileña yuma yikukwasha atumbanji twindi kusweja kumukeña Tata yawu wamwiwulu. Chakutalilahu, wamwesekejeli Yehova namuntu wenkaña anyanindi yuma yayiwahi. (Mat. 7:​9-11) Antiyilili jaYesu amakwawu, atela hiyadiñahu nawatata jawu ayimwekesheleleña kukeña kwamuchidiwuku. Fwikijenu chatiyiliwu chelili Yesu ayileji chakutalilahu chatata yawantu wukweti wushona watambwilili mwanindi wafuntili, wakoñeli yuma yatama yayivulu. Chumichi chayikwashili kumona Yehova chatiyilañayi anyanindi ahamaseki wushona.—Luka 15:​20-24.

8. Munateli kumukwasha ñahi kadizi wenu waBayibolu kusweja kumukeña Yehova?

⁸ Ninenu munateli kumukwasha kadizi waBayibolu kusweja kumukeña Yehova neyi mukonkomwenaña hayilwilu yaNzambi hampinji yimunakumudizisha. Hakudiza-hikudiza, mukwashenu amoni kunuñañana kudi hakachi kayuma yinakudizayi nakukeña kwaYehova. Neyi munakuhanjeka hefutu danyiloña, konkomwenenu chidamukundama niyena. (Rom. 5:8; 1 Yow. 4:10) Chakadi nikujina, kadizi wukusweja kumukeña Yehova neyi yatoñojokaña hanochu chamukeñawu kudi Yehova.—Ñal. 2:20.

9. Chumanyi chamukwashili iyala wejina daMichael kuhimpa chihandilu chindi?

⁹ Tuhanjekenu hadi Michael wakuIndonesia. Amudizishili chalala kudi anvwali jindi, ilaña hapapatisheweliku. Hadiñayi nayaaka 18, wayili mwituña dacheñi nakuzata mudimu wakwendesha nyotoka yamaneni. Mukuhita kwampinji, wasumbwili ilaña washiyili chisaka chindi nawa watwalekelihu kuzatila mwituña dacheñi. Haniyi mpinji, ñodindi nimwanawu wamumbanda atachikili kudiza Bayibolu nawa apamineña kuspritu. Chelili amama yindi anafwi dehi, Michael wafuukwilihu kufunta kwitala nakwakamena atata yindi nawa wetejeli kudiza Bayibolu. Hadizileñawu chibalu “Chasandujolenu Chikupu” mukudiza 27 mumukanda waMunateli Kwikala naMuzañalu Haya Nyaaka! nsañu yekalamu yamushikili Michael hamuchima chikupu. Chatoñojokeliyi hachichamukatili Yehova hakumona Mwanindi nakukabakana, Michael wadilili. Wasakilili chikupu hefutu danyiloña, nawa chumichi chamuletesheli yahimpi chihandilu chindi nawa wapapatisheweli.

MUKWASHENU KADIZI YASHIYI YUMA YALEMESHAYI NAKUTACHIKA KUMUKALAKELA YEHOVA

10. Yesu wayikwashili ñahi atumbanji twindi akusambila kudihana nakushiya yuma yalemesheliwu? (Luka 5:​5-11) (Talenu cheñi mwevulu.)

¹⁰ Atumbanji akusambila ashikeneni kwiluka nawu Yesu diyi Mesiya akaniniwu, ilaña akeñekeleña kuyikwasha kutwamijaku mudimu wakushimwina. Petulu naAnderi adiña dehi atumbanji twindi hampinji yayitambikiliyi Yesu nindi enzi kulonda atachiki kumulondela mpinji yejima. (Mat. 4:​18, 19) Azatilileña hamu naYakoba niYowanu mudimu wakukwata inshi nawa iyi bizinisi yendeleña chiwahi nankashi. (Maku 1:​16-20) Petulu naAnderi “[chashiyiliwu] tuleñi twawu,” awaniniku njila mwakwakamena yisaka yawu iku anakumulondela Yesu. Chumanyi chaletesheli adihani nakushiya yuma yalemesheliwu? Nsañu yekala mumukanda waLuka yatulejaña nawu Yesu wakoñeli chihayamisha chaletesheli akuhweleli chikupu nawu Yehova wukuyakamenaña neyi amutwamijaku muchihandilu chawu.—Tañenu Luka 5:​5-11.

11. Tunateli kuzatisha ñahi yuma yatumwekeneni hakwila nawu tumukwashi kadizi wetu kwikala nachikuhwelelu chakola?

¹¹ Tunateli wanyi kukoña yihayamisha neyi Yesu, ilaña tunateli kulejaku akwetu yuma yayiwahi yamwekeni kutalisha hadi Yehova chakwashañayi antu amutwamijañaku muchihandilu chawu. Chakutalilahu, munakwanuka Yehova chayikwashiliyi hampinji yimwatachikili kupompa? Hadaha mwayili nakuwana muntu wayiñijili mudimu nawa mwamulumbulwilili chuma chaletesheli muleki kuzata maora amavulu, chineli iwu mudimu wayikañesheleña kuya nakupompa. Hampinji yimunakumuleja kadizi wenu chuma chayimwekeneni, mulumbulwilenu chikuhwelelu chenu chichakoleleliku, chimwamweni Yehova chayikwashiliyi kufuukula chiwahi kulonda mutwamijeñaku kudifukula kwindi muchihandilu chenu.

12. (a) Muloñadi chitwatela kuyilaña nawakakushimwina ashiyashana nakudizisha kadizi waBayibolu? (b) Munateli kuzatisha ñahi mavidiyo hakwila mudizishi kadizi wenu chiwahi? Shimunenu chakutalilahu.

¹² Chuma chikwawu chinateli kumukwasha kadizi wenu hikutiyilila chinakulumbululawu akaKristu amakwawu cheliliwu hakwila aleki yuma yalemesheliwu, nakumutwamijaku Yehova muchihandilu chawu. Dichi, sendenuñaku amanakwetu niahela akweti nkulilu jashiyashana hampinji yimunakuya nakudizisha kadizi wenu. Yihulenu alumbululi chenjiliwu muchalala niyuma yeliliwu hakwila atwamijiku mudimu waYehova muchihandilu chawu. Kubombelahu, ikalenuña nampinji yeneni yakuhanjeka nakadizi wenu hampinji yimunakutala mavidiyo muchibalu chinakwila nawu “Sandujolenu Chikupu” hela chinakwila nawu “Ilukilenuhu Nsañu Yikwawu” mumukanda waMunateli Kwikala naMuzañalu Haya Nyaaka! Chakutalilahu, hampinji yimunakudiza kudiza 37, munateli kumulumbulwila yishina yidi muvidiyo yinakwila nawu Yehova wukutwakamenaña.

MUKWASHENU KADIZI WENU YELUKI CHAKUMANISHA KUKALA

13. Yesu wayidizishili ñahi atumbanji twindi kwikala adiloñesha chinateli kwilawu nekañesha?

¹³ Yesu walenjeli akakumulondela mapampa amavulu nindi, kwakekala antu akayikabishaña, kushilahu niantaña jawu. (Mat. 5:11; 10:​22, 36) Yesu chadiñayi kwakwihi nakumanisha mudimu windi, wayilejeli atumbanji twindi nindi anateli kuyijaha muloña wakudifukula kudi Yehova. (Mat. 24:9; Yow. 15:20; 16:2) Wayikonkomweneni nindi atela kwikala asoñama hampinji yinakuzatawu mudimu wakushimwina. Wayilejeli nindi bayi aditaadikishaña nawantu anakuyikañeshaku, nawa nindi atela kwikala ababala hakwila atwalekihu kuzata mudimu wakushimwina.

14. Tunateli kumukwasha ñahi kadizi wetu kudiloñeshela chadimu chatela kwilayi nekañesha? (2 Timotewu 3:12)

¹⁴ Tunateli kukwasha kadizi kudiloñeshela chadimu chatela kwilayi nekañesha dinateli kumonayi neyi tumulumbulwila yuma yikukuhwelelayi kumona, kutiya kudi akwawu azatañayi nawu, amambwambu jindi niantaña jindi. (Tañenu 2 Timotewu 3:12.) Akwawu azatañayi nawu amakwawu, anateli kumuseha muloña wakwovwahila yuma yatañishaña Bayibolu. Amakwawu, kushilahu niantaña jindi, anateli kumuseha muloña wayuma yamuBayibolu yakuhwelelayi. Neyi tuyikwasha swayi atudizi etu chakwikala adiloñeshela chadimu chatela kwilawu nekañesha, chikuyikwasha kwiluka chatela kuumikawu neyi anamoni ikañesha.

15. Yumanyi yinateli kumukwasha kadizi waBayibolu kuumika ikañesha dinakufumina muchisaka?

¹⁵ Neyi ikañesha dinakufumina muchisaka, mukoleshenu kadizi wenu yatoñojoki hachuma chinakuletesha antaña jindi ahileña. Hadaha anakutoñojoka nawu anakumuluwañesha, indi kwiji ahela hohu aYinsahu jaYehova. Yesu niyena amutiyileña kutama kudi antu amakwawu akeñeliyi. (Maku 3:21; Yow. 7:5) Mudizishenu kadizi wenu adiwunjikeña nikwikala wababala nachelañayi nawantu, kushilahu niantu amuchisaka chindi.

16. Tunateli kumukwasha ñahi kadizi kushimwina nsañu yakuhwelelayi mukubabala?

¹⁶ Hela chakwila antaña anakumwekesha muchima wakukeña kudiza, kadizi wukwila chiwahi neyi wukubula kuyilumbulwila yuma yejima hampinji yimu. Neyi nehi, nsañu yikusweja kuyivulila nawa chikufumamu, akashintajalaña kuhanjeka nindi mpinji yikwawu. Dichi mukoleshenu kadizi wenu yahanjekeña nawantaña jindi yuma yakuhwelelayi munjila yakwila aketeji kuhanjeka nindi cheñi mpinji yikwawu. (Kol. 4:6) Hadaha nateli kuyileja antaña jindi kuya ha jw.org. Chumichi chikuyikwasha kwilukilahu yuma yayivulu hadi aYinsahu jaYehova hampinji yinakeñiwu awenawu.

17. Munateli kumudizisha ñahi kadizi kwiluka chatela kwilayi nayitoñojoka yaluwa yatoñojokañawu antu kutalisha hadi aYinsahu jaYehova? (Talenu cheñi mwevulu.)

¹⁷ Munateli kuzatisha yibaaba yidi ha jw.org yidi namutu wunakwila nawu “Malwihu Avula Kwihulawu” hadi aYinsahu jaYehova, kulonda mumukwashi kadizi wenu kuloñesha ñakwilu japela jamalwihu anateli kumwihulawu kudi antaña jindi hela akwawu mwazatilañawu. (2 Tim. 2:​24, 25) Kumakumishilu akudiza-hikudiza, hitulukenu muchibalu chinakwila nawu “Amakwawu Ahoshaña Nawu” chindi mumukanda waMunateli Kwikala naMuzañalu Haya Nyaaka! Mukoleshenu kadizi wenu ahitulukeña muñakwilu mumazu indi yomweni. Bayi mushintajala kumuleja njila jinateli kumukwasha kuwahishaku ñakwilu jindiku. Kuhanjeka nindi muniyi njila, kukumukwasha kuhakwilaku yuma yakuhwelelayi chakadi kutiya woma.

18. Munateli kumukolesha ñahi kadizi wenu kulonda yekali mukakushimwina wabula kupapatishewa? (Matewu 10:27)

¹⁸ Yesu wayikonkomweneni atumbanji twindi nindi ashimwineña nsañu yayiwahi kudi antu amavulu. (Tañenu Matewu 10:27.) Neyi kadizi atachika swayi kulejaku antu yuma yakuhwelelayi, chikwikala chaswayi kutachika kumushindamena Yehova. Munateli kumukwasha ñahi kadizi kwikala namuchima wakufwila kwila chumichi? Neyi abidika muchipompelu nawu kwakekala kampeni, mukwashenu kadizi wenu atoñojokihu kulonda amoni chinateli kwilayi hakwila ashikihu kwikala mukakushimwina. Mulumbulwilenu chaleteshaña antu amavulu chiyipeleleña kutachika kushimwina mumpinji yakampeni. Chuma chikwawu chinateli kumukwasha hikutachika kuhana mpanji mukupompa kwamukachi kamulungu. Neyi yatachika kwila chumichi, chikumukwasha kwiluka chakulumbulula chiwahi yuma yakuhwelelayi chakadi woma.

MUKUHWELELENU KADIZI WENU

19. Yesu wamwekesheli ñahi nindi wayikuhweleleli atumbanji twindi, nawa tunateli kumwimbujola ñahi?

¹⁹ Henohu Yesu kanda ayi mwiwulu, wayilejeli atumbanji twindi nindi wakekala cheñi hamu nawu. Elukili wanyi nawu Yesu watalishili mukwila nindi akaya mwiwulu. Hela chochu, washili muchima hakashinshi kawu, bayi hachajinokeleñawuku. (Yow. 14:​1-5, 8) Welukili nindi akeñekeleña mpinji hakwila atiyishishi yuma yikwawu, chidi neyi kuchiñeja kwakuya mwiwulu. (Yow. 16:12) Ninetu tunateli kumukuhwelela kadizi wetu chinakuzatayi nañovu kulonda yamutiyisheña Yehova kuwaha.

20. Muhela wumu wakuMalawi wamwekesheli ñahi nindi wamukuhweleleli kadizi windi?

²⁰ Twakuhwelelaña netu kadizi wetu nakukeña kwila yuma yaloña. Chakutalilahu, talenu chuma chamumwekeneni Chifundo, muhela wakuMalawi. Watachikili kudiza Bayibolu nakansi wamumbanda wejina daAlinafe wamuchechi yaKatolika, kuzatisha mukanda waMunateli Kwikala naMuzañalu Haya Nyaaka! Chamanishiliwu kudiza 14, Chifundo wamwihwili kadizi windi kulonda atiyi yitoñojoka yindi kutalisha hachamweneñayi kudifukula kuzatisha yifwikija. Alinafe watiyili kumuchima kutama nankashi nawa waakwili nindi, “Iku hikufuukula kwami!” Hanyima yachumichi, Chifundo watoñojokeli nindi Alinafe wukuleka kudiza Bayibolu. Ilaña wadiwunjikili nakutwalekahu kudiza naAlinafe, nakukuhwelela nindi ifuku dimu wakeluka nindi kudifukula kuzatisha yifwikija kwatama. Chimwahitili tukweji twantesha, Chifundo wamwihwili lwihu lwekala mukudiza 34 lwakwila nawu: “Kudiza Bayibolu nikumwiluka Nzambi walala, Yehova, kunayikwashi ñahi?” Chifundo washimwini chakwiliyi Alinafe, nindi, “Wahosheli hayuma yayiwahi yayivulu, nawa chuma chimu chahosheliyi haniyi yuma chadiña chakwila nawu aYinsahu hiyadiñijaña muyaaku yakaanisha Bayiboluku.” Hashimbwili wanyi, Alinafe walekeli kuzatisha yifwikija nawa washikilihu kupapatishewa.

21. Tunateli kumukwasha ñahi kadizi wetu kulonda yafuukulihu kumukalakela Yehova?

²¹ Hela chakwila Yehova diyi “wayikulishaña,” tukweti mudimu wakukwasha kadizi wetu waBayibolu kupama. (1 Kor. 3:7) Hitwamudizishaña hohu yuma yinakukeñayi Nzambi nindi yeliku. Twamukwashaña kulonda yasweji kumukeña Yehova. Twamukoleshaña cheñi netu yamwekeshi chamukeñayi kuhitila mukushiya yuma yalemeshayi nakutachika kumukalakela. Nawa twamudizishaña chatela kumushindamenayi Yehova hampinji yinakumonayi kukala. Neyi tumukuhwelela kadizi wetu, tukumukwasha kukuhwelela chikupu nindi niyena nateli kwovwahila nshimbi jaYehova nikwimana wakola mbe-e muchalala.