“Yehova Diyomweni Njita”

Iku kukala kwatachikili kumakumishilu amuyaaka yamu ma 1990 helili nfulumendi yaFrance yileji kasanji ketu kamuFrance nawu kahani nyisonku kufuma hayawaana yatambwililiwu hakachi ka 1993 na 1996. Twayili kuchota chamuFrance netu atukwashi kuyiña naniwu muloña, ilaña kwosi chamwekeni. Twesekeli kutwala iwu muloña kuchota netu awusompi cheñi, ilaña hohamu kwosi jazatikili nawa nfulumendi yasendeli mali munyambawulu yakasanji kamutayi akubadika ha 4 miliyoni nachikunku mali akuEurope ($6,300,000 U.S.). Nawa haniyi mpinji, chota chitwakinkilimu hohu manuñu hiChota chaECHR. Ilaña henohu kanda azatili haniwu muloña, Chota chaECHR chakeñeleña nawu etu tudibulakani nenzavu dawamahaku anfulumendi nakuhanjeka haniyi nsañu hamesu añimeni wumu wamuChota chaECHR henohu kanda ayi nakusompa iwu muloña.

Twakuhweleleli netu iwu ñimeni wukutukanjikija nindi tumanishi iku kukala kuhitila mukuhana mali akeñeleña nfulumendi. Hela chochu, twelukili netu hela tukuhana hohu kadali kanyanya hanawa mali, tukufumpa yishina yamuBayibolu. Amanakwetu niahela ahanini iyi yawaana kulonda akwashi nyidimu yaWanta, dichi yawaana yawu yadiña yanfulumendi wanyi. (Mat. 22:21) Hela chochu, twayili kuniku kubulakana muloña wakwovwahila nshimbi jahanini Chota.

Twabulakeni mukapeka keneni kakawahi kulonda tutiyi chikusompa Chota iwu muloña. Iku kusompa kwatachikili chiwahi wanyi. Mumazu indi akwenzununa nachu, iwu ñimeni wakuChota wahosheli nindi wakuhweleleli aYinsahu jaYehova amuFrance kuhanaña musonku wakeñeleña ituña. Chumichi chaletesheli hohenohu tumwihuli netu, “Komana wuneluki wanyi neyi nfulumendi yinatambuli dehi mali munyambawulu yetu akubadika ha 4 miliyoni nachikunku, mali akuEurope?”

Wahayamini chikupu. Chelili izanvu dawamahaku anfulumendi eteji nawu atambwili awa mali, iwu ñimeni washikeneni kuhimpa yitoñojoka. Wayizuwilili nawa hohenohu waketwili muloña. Dichi nanukili nami Yehova diyi wahimpili yuma yejima hakwila nawu etu tuyiñi namuloña, munjila yitwabulili nikukuhwelela. Hitwafumineña nakusompa iwu muloña, twadihayaminini hohu muloña twelukili wanyi chuma chamwekeni.

HaJune 30, 2011, Chota chaECHR chatuyiñishili namuloña. Ichi Chota chasompeli nawu awa mali ayitambwili munjila yawupwapoki nawa chalejeli nfulumendi nawu afuntishi mali atambwiliwu, ashilihu niamakwawu! Iku kufuukula kwalema kunakiñi kudifukula kwalala muFrance kushika nichayinu mpinji. Aluna lwihu lwapela lutwabulili kutoñojokahu henohu kanda twihuli, lwadiña neyi ilola damwasiliwu Goliyati kumutu, lwahimpili iwu muloña wejima neyi mukulabula kwadisu. Chumanyi chaletesheli tuyiñi namuloña? Muloña, neyi Davidi chamulejeliyi Goliyati, “Yehova diyomweni njita.”—1 Sam. 17:​45-47.

Iwu dimuloña hohu wutwayiña wanyi. Hela chakwila nfulumendi jañovu nikudifukula kwakutwamba kwatukañeshaña, etu aYinsahu jaYehova tunayiñi nyiloña 1,225 muyota yamaneni yamumatuña 70 nimuyota yikwawu yatiyakana nankashi. Iyi nyiloña yitwayiña yakiñaña wuswa wetu walema, chidi neyi wuswa wutukweti wakwikala akasunuka mukudifukula, kushimwina kudi antu amavulu, kukaana kudiñija muyidika yamapolitiki nikukaana kutwisha mashi mumujimba.

Hanu dinu, nadiwanini ñahi nakusompa muloña kuEurope henohu nazatilileña haKasanji Keneni muKaayi kawaYinsahu jaYehova muNew York, U.S.A.?

KUDIKITA KWAWANVWALI JAMI MUWUMISHONALI KWANKWASHILI

Anvwali jami, aGeorge nawaLucille, ayili kushikola yaGiliyadi yanaamba 12 nawa azatilileña muEthiopia hampinji yinavwalikili mu 1956. Antuumbili nawu Fwilipu, ijina damukakushimwina wadiñaku mumafuku awakaKristu akusambila. (Yilw. 21:8) Chaaka chalondelelihu, nfulumendi yalekesheli kudifukula kwetu. Hela chakwila nachidiña wanyanya, nanukaña chiwahi chisaka chetu chichadifukwileña mukuswamujoka. Chineli nadiña kansi, nachimweni nami chadiña hohu chiwahi! Chawushona, ayilolu janfulumendi atukanjikijili nawu tufumi mwituña mu 1960.

Chisaka chetu chichabuukilili kuWichita, Kansas, U.S.A., anvwali jami atwalekelihu kwikala neyena dakudikita mumudimu wakushimwina, neyi chadikitileñawu hadiñawu amishonali. Akeñeli chalala chikupu nawa atukwashili etu anyana kulemesha yuma yakuspiritu, ami niyayami wamumbanda, Judy, nimwanyikami weyala, Leslie, niwena avwalikilili kuEthiopia. Napapatisheweli nayaaka 13. Chimwahitili yaaka yisatu, chisaka chetu chayili nakukalakela kwadiña kukaankila kweneni, muArequipa, kuPeru.

Mu 1974 hinadiña nayaaka 18, kasanji kamutayi kamuPeru katutondeli ami niamanakwetu amakwawu awana kwikala apayiniya adimena. Atutemesheli kuya nakushimwina kumaluña kwabulawu dehi kushimwinawu, kwakweni kuMapidi aCentral Andes. Chumichi mwabombeleli kushimwina mumaluña mwashakamineña antu ahosheleña idimi daQuechua nidaAymara. Twendeleleña mumotoka mutwashakamineña wutwateneneña netu Watu waNowa, muloña wamwekeneña neyi chikasha. Natiyaña kuwaha kwanuka yuma yamwekeneña hitwashimwinineña kuzatisha Bayibolu hakuleja antu akunawa maluña netu Yehova katataka yafumishihu wuzweñi, yikatu nikufwa. (Chim. 21:​3, 4) Antu amavulu etejeleña nsañu yayiwahi yaWanta.

ANLEJELI KUYA NAKUZATILA HAKASANJI KENENI MUKAAYI

Henjiliyi kuPeru mu 1977, Albert Schroeder, wadiña membala waMwizanvu Dalombolaña dawaYinsahu jaYehova, wankolesheli nindi nisoneki mukanda wakulomba kuya nakuzatila haBeteli hakasanji keneni mukaayi. Dichinelili. Hashimbwili wanyi, haJune 17, 1977, natachikili kuzatila haBeteli muBrooklyn. Hadi yaaka yakubadika hayiwana yalondelelihu, nazatilileña kumadipatimenti aKuwahisha niKuloñesha yuma.

MuJune 1978, nadibulakeni naElizabeth Avallone kukupompa kwamatuña muNew Orleans, Louisiana. Amukulishili kudi anvwali akeñeli chalala neyi anvwali jami. Haniyi mpinji yitwadibulakeni naElizabeth, mwadiña munahiti dehi yaaka yiwana kufuma hatachikiliyi wupayiniya nawa wafuukwilihu kutwalekahu kumukalakela Yehova mumudimu wampinji yejima muchihandilu chindi chejima. Twahanjekeleña. Hashimbwili wanyi twadikeñeli chikupu. Twadisumbwili haOctober 20, 1979, nawa wejima wetu ayedi twatachikili kuzatila haBeteli.

Amanakwetu niahela muchipompelu mutwatachikili kupompa, chaBrooklyn Spanish, atumwekesheleli kukeña chikupu. Hadi yaaka yejimiyi yitunakalakeli haBeteli, yipompelu yikwawu yisatu mudi amanakwetu niahela akweti kukeña yatutambwilaña chiwahi nikutukwasha. Twayisakililaña chatukwashañawu, kushilahu niwukwashu wawamabwambu nichisaka chetu atukwashili kwakamena anvwali jetu adiña akula dehi.

KUKWASHA KULOÑESHA KUHAKULA NYILOÑA MUYOTA

Nadihayaminini, muJanuary 1982, anyinkeli mudimu haBeteli wakuzatila kuDipatimenti Yatalaña haNyiloña. Chimwahitili yaaka yisatu, anlejeli kuya kuyunivesiti nakudiza janshimbi kulonda niikali ihaku. Hinadiña kuniyi shikola, nahayamini nankashi chinelukili nami antu muUnited States nimumatuña amakwawu, ayinkaña lusesa lwakwikala akasunuka kwila yuma muloña wanyiloña yayiñawu aYinsahu jaYehova. Iyi nyiloña yalema twadiña nakuyihanjekahu chikupu mushikola.

Mu 1986, hinadiña nayaaka 30, antondeli kwikala mukulumpi kuDipatimenti Yatalaña haNyiloña. Nazañaleli hakukooleka kwanyinkeliwu hela chakwila nadiña kansi. Ilaña cheñi nakameneni muloña nelukili yuma yayivulu wanyi nawa nelukili nami iwu mudimu wakampelela wanyi.

Nekalili ihaku mu 1988, ilaña nelukili wanyi iyi shikola chiyanluwañesheli chikupu niwubwambu wami naYehova. Kutaña shikola yahewulu kukuletesha muntu kwikala namuchima wakudinyamuna nikutoñojoka nindi wabadika amakwawu, muloña wayuma yayivulu yinelukiyi yabula kwiluka antu abula kuya kuniyi shikola. Elizabeth diyi wenjili nakuñamwina muniwu muhetu. Wankwashili kutachika cheñi kwila yuma yakuspiritu yinelileña henohu kada niyi kuyunivesiti nakudiza jakwikala ihaku. Hashimbwili, ilaña chovu-chovu natachikili cheñi kwila chiwahi kuspiritu. Kwesekeja nayuma yinnahitimu, nukuhosha chakadi kuhita mumbadi nami kwiluka yuma yayivulu bayi neyi dichuma chalema nankashi muchihandiluku. Chuma chaletaña muzañalu walala hikwikala nawubwambu wakola naYehova nikumukeña chikupu yena niantu jindi.

KUHAKWILAKU NIKUFWILA KUTAMBULA WUSWA WAKUSHIMWINA NSAÑU YAYIWAHI KWESEKEJA NANSHIMBI

Chinamanishili iyi shikola, natachikili kukwasha dipatimenti yetu kwakamena nyiloña yakeñekeleña kuzatilahu haBeteli nikukiña kuloñesha kwaYehova nakuhakwilaku wuswa wetu wakushimwina nsañu yaWanta. Mudimu wunazatileña wadiña wawuwahi nankashi ilaña cheñi namweneña kukala, muloña yuma yahimpikileña mukunyakashana mukuloñesha kwetu. Chakutalilahu, muyaaka yakutachikilahu muma 1990, Dipatimenti Yatalaña haNyiloña ayilejeli nawu yihani nshimbi yakulekesha njila yitwazatishileña nawa yitwenjililili, yakuleja antu kuhana yawaana neyi tunayinki nyikanda. Kufuma haniyi mpinji, aYinsahu jaYehova atachikili kuhana nyikanda chawaana. Iyi njila yapelesheliku mudimu wahaBeteli nimudimu wakushimwina nawa kushika niyinu mpinji yatukwasha kutondolwela kumona kukala kwenzaña muloña wakubula kuhana nyisonku. Amakwawu atoñojokeli nawu iku kuhimpika kukuletesha mali kukeha mukuloñesha kwetu nawa mudimu wakushimwina wukufunta hanyima. Ilaña dichuma chamwekeni wanyi. Antu anakumukalakela Yehova kufuma mu 1990 anavuliliku nankashi, nawa chayinu mpinji antu anakudiza chalala munyikanda yetu yashindamena haBayibolu chakadi kuyifwetesha. Nadimweni nami kuhitila hohu muñovu jahanañayi Yehova niwunlomboli wahanañayi kuzatisha nduñu washinshika, dichinaleteshi kwiikali iku kuhimpika kwejima mukuloñesha nawa kuzatikeña chachiwahi.—Kwid. 15:2; Mat. 24:45.

Nyiloña yayivulu yitwayiñaña nayu muyota hitwayiyiñaña muloña wakwikala nawamahaku amawahiku. Kakavulu akawuswa atuyiñishaña muloña wayilwilu yayiwahi yawantu jaYehova. Namweni chumichi mu 1998 hampinji yenjili mamembala asatu aMwinzavu Dalombolaña niañodi jawu kukupompa kwamaneni kwadimena kwadiñaku muCuba. Muchima wawuwahi wamwekesheliwu nikalemesha, diyuma yaletesheli akawuswa eteji nawu hitwadiñijaña munsañu jamapolitikiku, bayi nsañu yitwahanjekeli nawu hampinji yitwadibulakeni nawuku.

Hela chochu, neyi nsañu yetu anayisompi chiwahi wanyi, “[twahakwilañaku] nikufwila kutambula wuswa wakushimwina nsañu yayiwahi kwesekeja nanshimbi” hampinji yitudi muchota chanyiloña. (Fwili. 1:7) Chakutalilahu, hadi yaaka yayivulu yinahitihu, akawuswa kuEurope nikuSouth Korea hiyalemesheli wuswa wetu wakukaana kuzata nyidimu yawushidikaku. Chafuminimu, amanakwetu 18,000 akuEurope niamanakwetu akubadika ha 19,000 akuSouth Korea, ayikasili mukaleya muloña wakukaana kwiñila mudimu wawushidika.

Nkumininaku, haJuly 7, 2011, chota chaECHR chafuukwili chuma chalema kutalisha hamuloña waBayatyan v. Armenia mwahaniniwu lushimbi lwakwila nawu matuña ejima amuEurope eteji nyidimu yikwawu ayizateña kudi antu akaanaña kwiñila mudimu wawushidika muloña wayuma yakuhwelelawu. Kuhiñahu, chota chanyiloña chamuSouth Korean nichena chafuukwili mwomumu haJune 28, 2018. Neyi chakwila hakachi kanawa amanakwetu atwansi hadiña antesha etejeli kwiñila wushidika, akawuswa hiyadi kufuukula muniyi njilaku.

Amanakwetu ekala mudipatimenti yatalaña hanyiloña hakasanji keneni mukaayi nihatusanji twanyanya mwahita kaayi kejima, anakuzata nañovu kuhakwilaku nsañu yaWanta. Tukweti kukooleka kwakuyimenaku amanakwetu niahela anakukabishawu kudi jinfulumendi. Hela chakwila tunayiñi namuloña hela nehi, twahanaña wunsahu kudi anguvulu, anyanta nikunyuza. (Mat. 10:18) Ansompeshi, añimeni janfulumendi, akayikunzulemba niantu ejima anashali, atela kutoñojokaña hansona jitwasonekaña muyipapilu yetu yejima nijitwatenaña hampinji yinakusompawu. Antu akweti nyichima yashinshika ayilukaña chiwahi aYinsahu jaYehova nikwafumaña yuma yakuhwelelawu. Hakachi kanawa antu, amakwawu anekali aYinsahu jaYehova.

KUSAKILILAKU, YEHOVA!

Hadi yaaka kubadika ha 40 yinahitihu, nazatili hamu nawamanakwetu hanyiloña yinakundami tusanji twamutayi mukaayi kejima nikuya kuyota yamaneni yayivulu nawa nadimonaña nawayilolu alema amavulu. Nayikeña nawa nayitiyaña kuwaha akwetu inazataña nawu muDipatimenti Yatalaña haNyiloña ahakasanji keneni mukaayi nimumadipatimenti atalaña hanyiloña amukaayi kejima. Nadiluñishi nkisu jajivulu muchihandilu chami nikwikala namuzañalu chikupu.

Elizabeth nankwashi nankashi muyaaka yejima 45 yinahitihu mumpinji jajiwahi nimumpinji jatama. Namusakililaña hachumichi, muloña nazati mudimu weneni hela chakwila wakabakanaña nachikatu chamuleteshaña kutiya kuzeya mumafwaha nikumana ñovu.

Tunadimweni namesu kapu netu hitwekalaña nañovu nikuyiña nyiloña nawuswa wetu etu aweniku. Neyi chahosheliyi Davidi, “Yehova diyi ñovu yawantu jindi.” (Mas. 28:8) Mwamweni, “Yehova diyomweni njita.”