Yesu “Wadizili Kwovwahila”

Yesu wamwovwahilaña Yehova mpinji yejima. (Yow. 8:29) Hanu dinu, muloñadi Bayibolu chiyahoshela nawu: “Wadizili kwovwahila kuyuma yakabakeniyi”?—Heb. 5:8.

Hampinji yadiñayi heseki, Yesu wamweni yuma yabulili kumumwekena hadiñayi mwiwulu. Chakutalilahu, anvwali jindi amukeñeli Yehova ilaña adiña abula kuwanina. (Luka 2:51) Amukabishili kudi anlomboli jakudifukula atama nianyuuli janfulumendi. (Mat. 26:59; Maku 15:15) Kubombelahu, “wadizozeli nawa wovwahilili kushika nikukufwa,” kufwa kwayeña.—Fwili. 2:8.

Iyi yuma yamumwekeneni yamudizishili kwikala wovwahila munjila yaambukaku nanochu chovwahilileñayi hadiñayi mwiwulu. Dichi washikililimu kwikala Mwanta nawa Kapristu Muneni wawanina, wukutwesha kutiyisha chiwahi chitwekala. (Heb. 4:15; 5:9) Yesu wekalili walema nankashi nawa washikilamu kumuzatisha kudi Yehova chelili yadizili kwovwahila kuyuma yakabakeniyi. Ninetu tunateli kwikala alema nankashi kudi Yehova nawa ashikilamu kutuzatisha mumudimu wudi wejima wunateli kutwinkayi neyi tutwalekahu kwovwahila hampinji yitunakumona kukala.—Yak. 1:4.