Zatishenu Idimi Denu Chiwahi

1, 2. Bayibolu yesekejeladi kesi nedimi?

Mu 1871, mwisaña daWisconsin, kuUnited States mwakwatili kesi. Kesi katandili mukunyakashana nawa kwocheli nyitondu yakushika ku 2 biliyoni. Antu akubadika 1,200 afwili. Kwosi kesi kajihahu dehi antu amavulu chamuchidiwuku mu United States. Chinakumwekana neyi nsashi jafumineña kusitima yahitileña mwisaña dijakojejeli kesi. Chumichi chatwanukishaña vasi yekala muBayibolu yahosha nawu: “Toñojokenu mpata kutoha yahaña nakesi kantesha!” (Yakoba 3:5) Yakoba nsoneki waBayibolu wahoshelelidi awa mazu?

² Wahosheli nindi: “Idimi hikesi.” (Yakoba 3:6) “Idimi” datukwashaña kuhosha. Kufwana kesi, mazu itwahoshaña anateli kuleta kukala. Mazu itwahoshaña anateli kukwasha muntu hela nehi. Bayibolu yatulejaña nawu tunateli kujahisha hela kuhandisha muntu namazu etu. (Yishimu 18:21) Komana twatela kuleka kuhosha kuchina netu hadaha tukuluwañesha munhoshelu? Inehi. Hela chakwila tuneluki netu tunateli kuha nakesi, twatwalekañahu kukizatisha. Nawa twekalaña ababala hakuzatisha kesi. Chakutalilahu, tunateli kuzatisha kesi kutelekelahu yakuda, kota nikumunyika nachu mwitala. Munjila yoyimu, neyi tukuhoshaña mazu amawahi, tukumulemesha Yehova nikukwasha akwetu.—Masamu 19:14.

3. Yikumanyi yisatu yinateli kutukwasha kukolesha akwetu neyi tunakuhosha?

³ Yehova watwinka wuswa wakuleja akwetu chitunakutoñojoka kuhitila mukuhosha hela kuzatisha idimi dawatumama. Tunateli kuzatisha ñahi ichi chawana kukolesha antu? (Tañenu Yakoba 3:9, 10.) Twatela kwiluka mpinji yakuhosha, yuma yitwatela kuhosha nichitunateli kuhosha.

MPINJINYI YITWATELA KUHOSHA?

4. Mpinjinyi yitwatela kumwena?

⁴ Mpinji yikwawu twatela kumwena. Bayibolu yahoshaña nawu kwekala “mpinji yakumwena.” (Mukwakutaŋisha 3:7) Chakutalilahu, twamwenaña neyi akwetu anakuhosha kulonda tumwekeshi kalemesha. (Yoba 6:24) Cheñi, twahoshaña wanyi nsañu yakujinda. (Yishimu 20:19) Neyi muntu yatuhilisha, chikuwaha neyi tukuwundisha mumesu nawa tubula kuhoshahu.—Masamu 4:4.

5. Tunateli kumwekesha ñahi kusakilila kudi Yehova hakutwinka chawana chakuhosha?

⁵ Ilaña mpinji yikwawu twatela kuhosha. (Mukwakutaŋisha 3:7) Kwekala mpinji yakumushimeka Yehova, yakukolesha akwetu, yakuhosha chitunakutiya nimpinji yakuleja akwetu yuma yitunakukeña. (Masamu 51:15) Neyi tuzatisha wuswa wetu wakuhosha muniyi njila, tukumwekesha kusakilila kudi Yehova hakutwinka ichi chawana. Muloña neyi ibwambu detu yatwinka chawana, twachizatishaña chiwahi.

6. Muloñadi kuhosha hampinji yatelela chikwawahila?

⁶ Muloñadi kuhosha hampinji yatelela chikwawahila? Mukanda waYishimu 25:11 wahosha nawu: “Izu dakuhoshela hidinateleli didi neyi mabula awuru analoñejuwu mumabañu asiliva.” Mabula awuru ekala alubanji, ilaña amwekanaña lubanji nankashi neyi ayisha hacheña chasiliva. Munjila yoyimu, tunateli kwikala nansañu yayiwahi yitunakukeña kuleja muntu. Ilaña neyi twiluka mpinji yakuhosha, iwu muntu nateli kutiya kuwaha nankashi oyu nsañu. Tunateli kwila ñahi mwenimu?

7, 8. Amanakwetu muJapan embujoleli ñahi Yesu?

⁷ Neyi tuhosha hampinji yabula kutelela, antu anateli kutiya wanyi hela kwiteja mutunakuhosha. (Tañenu Yishimu 15:23.) Chakutalilahu, Mu March 2011, mutentanshi nitsunami yakisañeni nyisumba yayivulu kukabeta kamusela kaJapan. Antu akubadika ha 15,000 afwili. Hela chakwila aYinsahu jaYehova ajimbesheli yisaka niamabwambu jawu, azatishili Bayibolu hakukwasha amakwawu adiña mukukala kwokumu. Ilaña elukili nawu amavulu adiña aBuddha abula kwiluka Bayibolu. Chatela haniyi mpinji ayileji nsañu yakusañuka, amanakwetu ayikundejeli nikuyilumbulwila chaleteshaña kukala kumwekaneña kudi antu amawahi.

⁸ Awa manakwetu embujoleli Yesu. Welukileña mpinji yakumwena niyakuhosha. (Yowanu 18:33-37; 19:8-11) Nawa wahembeleleña mpinji yayiwahi yakuleja atumbanji twindi nsañu yikwawu. (Yowanu 16:12) Amanakwetu muJapan ahembeleli mpinji yayiwahi yakuleja antu nsañu yakusañuka. Chimwahitili yaaka yiyedi hanyima yatsunami, enkeleña antu tilakiti yaKomana Afu Amba Kahanda Cheñi? Antu amavulu atambwili tirakiti nawa azañaleli nansañu yatañiluwu. Ninetu twatela kwiluka chekala chisemwa niyuma yakuhwelelawu antu amwiluña detu kulonda twiluki mpinji yayiwahi yakuhosha nawu.

9. Mpinjinyi yikwawu yitwatela kuhembelela mpinji yatelela kuhosha?

⁹ Mpinjinyi yikwawu yitwatela kuhembelela mpinji yatelela kuhosha? Hekwawu mukwetu yahosha nsañu yinatutiyishi kutama. Chatela tushikeni dakuhosha yuma yatama, twatela kumwena nikudihula netu: ‘Watalisha mudihi? Komana natela kuhosha nindi hansañu yahoshayi?’ Chikuwaha neyi mubula kuhosha. Ilaña neyi tunakukeña kuhosha nindi, twatela kuhembelela neyi tunawundishi muchima. (Tañenu Yishimu 15:28.) Hadaha tunakukeña kukwasha antu amuchisaka chetu abula kwikala aYinsahu kulonda amwiluki Yehova. Twatela kuhembelela nikutoñojoka chikupu nsañu yitukuhosha nikwiluka mpinji yayiwahi yinateli kutiyililawu.

YUMANYI YITWATELA KUHOSHA?

10. (a) Muloñadi chitwatela kwilukila chadimu mazu akuhosha? (b) Nhoshelu yamuchidinyi yitwatela kutondolwela?

¹⁰ Yuma yitwahoshaña yinateli kuzañalesha akwetu hela kuyineñesha. (Tañenu Yishimu 12:18.) Antu amavulu mukaayi kaSatana ahoshaña “mazu andulu” adi neyi “nyivu” hela neyi “mpoku yakabali” muloña akeñaña kuhilisha nikuneñesha akwawu. (Masamu 64:3) Amavulu adizaña iyi nhoshelu mumafwilimu nihama TV atambañawu. Ilaña akwaKristu ahoshaña wanyi mazu atama hela munjila yamaleñu. Maleñu amawahi nawa anateli kuletesha mazu itunakuhosha kutiyakana chiwahi. Ilaña bayi tuzatisha mazu atama akusupishaku, dikwila nawu, mazu anateli kutiyisha nsonyi hela kutukana kulonda tuseheshi amakwawu. Bayibolu yakanisha akwaKristu kuzatisha nhoshelu ‘yakutukana.’ Yahosha cheñi nawu: “Kuhosha mazu atama chinjila, chiña mazu amawahi anatweshi kukolesha antu hakumonawu kukala, kulonda akwashi naluwi awa akuyitiya.”—Aefwesesa 4:29, 31.

11. Yumanyi yinateli kutukwasha kwiluka chakuhosha?

¹¹ Yesu wahosheli nindi “kanwa kahoshaña yuma yinalumbami mumuchima.” (Matewu 12:34) Ichi chinayi mukwila nawu yuma yitwahoshaña yamwekeshaña chitwatiyaña. Dichi neyi tukeña antu nikuyakamena, tukwiluka chakuhosha nawu. Yuma yitukuhosha yikwikala yayiwahi nawa yakukwasha.

12. Yumanyi yikwawu yikutukwasha kwiluka mazu akuhosha?

¹² Twatela kuzata nañovu hakwila twiluki mazu amawahi akuhosha. Hela chakwila Solomoni wadiña namaana, ‘watoñojokeli nikukeñakeña’ hakwila nawu nsañu yasonekeliyi yoloki nawa yiwahi kutaña. (Mukwakutaŋisha 12:9, 10) Yumanyi yikutukwasha kwiluka chakuhosha? Tunateli kutaña muBayibolu nimunyikanda yetu kulonda twiluki njila yayiwahi yakuhoshelamu. Tukwiluka mwatalisha nhoshelu yitwabula kwiluka. Tunateli cheñi kudizila kuyuma yelileñayi Yesu kulonda twiluki chakuhosha munjila yinateli kukwasha amakwawu. Welukileña chikupu chakuhosha muloña Yehova wamulejeli “kuhosha mazu akukolesha nachu muntu nazeyi.” (Isaya 50:4) Chalema kwiluka cheñi mazu akuzatisha kudi kwetu. (Yakoba 1:19) Tunateli kudihula netu: ‘Neyi nihosha ichi, muntu wukutiya munatalishi? Wukutiya ñahi?’

13. Muloñadi chitwatela kuhoshela munjila yapela kutiya?

¹³ Yivumina yampuña ayizatishileña muIsarela hakusoñamisha nachu antu. Chivumina chimu chalejeleña antu nawu atela kubulakana. Chivumina chikwawu chalejeleña amashidika nawu atela kulukuka. Toñojokenu chuma chadi kuyimwekena amashidika neyi elukili wanyi mwatalishili chivumina! Bayibolu yesekejaña chivumina champuña chatiyakana namazu apela kutiya. Neyi tubula kulumbulula yuma chatiyakana, antu akuluwankana hela akukuhwelela yuma yakutwamba. Hela chakwila tunakukeña kuhosha munjila yatiyakana, twatela kuhosha mazu akasawuntu wanyi.—Tañenu 1 Akorinda 14:8, 9.

14. Yakutalilahwinyi yamwekeshaña nawu Yesu wahosheleña mazu apela kutiya?

¹⁴ Mumukanda waMatewu kapetulu 5 nakushika ku 7 mwekala chakutalilahu chachiwahi chamwekeshaña Yesu chatondeliyi mazu apela kutiya. Mumpanji yahaniniyi, hakeñeleña kusehesha antu kuhitila mukuzatisha mazu akala kutiya hela amukunkulwayuku. Nawa hahosheli mazu ahilishili antuku. Yesu washimwini yuma yalema yakunama, ilaña wayihosheli munjila yapela kutiya. Chakutalilahu, Yesu walejeli atumbanji kubula kwakama yakudya yahefuku. Dichi walumbulwili nindi Yehova wadishaña atujila mpinji yejima. Nkumininaku, wayihwili nindi: “Enu himwayibadika nankashi kulemaku?” (Matewu 6:26) Yesu wazatishili awa mazu kuyikwasha kutiyisha chikuma chalema nikuyikolesha.

TWATELA KUHOSHA ÑAHI NAWAKWETU?

15. Muloñadi chitwatelela kuhosha munjila yaluwi?

¹⁵ Chalema kwiluka chitwahoshaña nawakwetu. Antu atiyileña kuwaha kutiya chahosheleñayi Yesu muloña wahosheleña mazu “amawahi,” nawa aluwi. (Luka 4:22) Neyi tuhoshaña munjila yaluwi, antu akutiyaña kuwaha kututiyilila nawa akwiteja nsañu yitunakuhosha. (Yishimu 25:15) Hakwila nawu tuhosheña nawantu munjila yaluwi twatela kuyilemesha nikwakamena chinakutiyawu. Dicheliliyi Yesu. Chakutalilahu, chamweniyi izaza dinakufwila kumutiyilila, watiyili kuwaha kuhanjeka nawu nikuyitañisha. (Maku 6:34) Yesu chamutukiluwu, yena hafuntishili matukaku.—1 Petulu 2:23.

16, 17. (a) Tunateli kumwimbujola ñahi Yesu neyi tunakuhosha nachisaka chetu niamabwambu jetu? (Talenu mwevulu wakutachikilahu.) (b) Nvwali wumu wahosheli ñahi munjila yaluwi?

¹⁶ Hela chakwila twakeña chisaka chetu niamabwambu, hadaha tunateli kuhosha nawu mazu akubula luwi muloña twayiluka chikupu. Tunateli kutoñojoka netu twatela kuhosha nawu munjila yidi yejima. Yesu wahosheleña nawamabwambu jindi munjila yaluwi. Hampinji yaditadikishileñawu amabwambu jindi nawu wabadika hinyi hakachi kawu, wayifumbili munjila yaluwi nawa wazatishili chakutalilahu chamwana wanyanya kulonda aleki iyi yitoñojoka. (Maku 9:33-37) Aeluda anateli kumwimbujola Yesu hakufumba amakwawu munjila yaluwi.—Aŋalija 6:1.

¹⁷ Neyi muntu yahosha yuma yinatuhilishi, chikuwaha neyi tukuhosha munjila yaluwi. (Yishimu 15:1) Chakutalilahu, kansi weyala kampululu mwana kamumbanda wabula kusumbuka welileña yuma yatama iku nakumwekesha neyi nakumukalakela Yehova. Muhela wumu muchipompelu watiyilili luwi mama yaniwu mwana nawa wamulejeli nindi: “Mwaneyi wafumbili chiwahi wanyi.” Iwu nvwali wamweneni nakutoñojoka nawa wahosheli nindi: “Chinatami hohu yuma yidi chiwahi wanyi, ilaña yuma yinamudizishili nakuyizatisha. Wakañihuli hanyima yaAmagedoni; dihu twakeluka walala.” Atwalekeluhu kwikala amabwambu muloña iwu nvwali wamweneni nawa wahosheli naluwi kudi muhela. Cheñi, mwana watiyili chahosheli mama yindi nawa welukili nindi achidi amukuhwelela nawu wakahimpa. Dichi walekeli kwenda nawamabwambu atama, wapapatisheweli nkumininaku wayili nakuzatila haBeteli. Mpinji yejima yitunakuhosha nawamanakwetu, chisaka chetu, hela antu itwabula kwiluka, mazwetu atela ‘kwikala aluwi, akutoweja namuñwa.’—Akolose 4:6.

18. Tunateli kwimbujola ñahi Yesu munhoshelu yetu?

¹⁸ Yehova watwinka chawaana chachiwahi chakuleja akwetu chitunakutoñojoka nichitunakutiya. Neyi tulondela chahosheleñayi Yesu, tukwiluka mazu amawahi akuhosha, tukwiluka chakuhosha nawa tukuhoshaña naluwi. Dichi tuzatisheña mazu akukolesha akwetu nikumutiyisha kuwaha Yehova.