Nekalili naWubwambu naNzambi ninawaMama

AMAMA añihwili nawu: “Wunakukaaninadi kudifukula kudi ankakulula? Wuneluki wanyi neyi diwu akwinka wumi? Wunakukeña kuyisakilila wanyi? Wunateli kukaana ñahi tushidikilu tutwaswana kufuma kudi ankakulula? Chiwakaana kulemesha ankakulula jetu, wunakuhosha neyi kudifukula kwetu kwamukunkulwayi.” Hanyima yakuhosha awa mazu, aMama atachikili kudila.

Amama ahosheli awa mazu chimwahitili tukweji twantesha kufuma hayilejeluwu kudi aYinsahu jaYehova nawu ayidizisheña Bayibolu. Akeñeleña wanyi kudiza, dichi ayilejeli nawu adizeña nanami. Ilaña anhilili, nahayamini muloña nadiña nakuyovwahila mpinji yejima. Hela chochu, haniyi mpinji nayovwahilili wanyi muloña nakeñeleña kumutiyisha Yehova kuwaha. Chankoleleli, ilaña Yehova wankwashili.

KUMWILUKA YEHOVA

Anvwali jami adiña aBuddha, neyi chekala amavulu muJapan. Ilaña chinadizili nawaYinsahu jaYehova hadi tukweji tuyedi, nelukili chikupu nami Bayibolu yahoshaña mwalala. Chinelukili nami nikweti Tata yami wamwiwulu, nakeñeleña nankashi kumwiluka. Hatachi, nahanjekeleña nawaMama nsañu yinadizileña. Natachikili kuya nakupompa hamulungu Kwitala daWanta. Chinadizili jajivulu, nayilejeli aMama nami naleki kulondela tushidikilu twawaBuddha. Hohenohu amama ahimpili yililu yawu. Ahosheli nawu, “kwikala namuntu muchisaka wahela ankakulula jetu hikasawuntu.” Anlejeli nawu nileki kudiza Bayibolu nikuya nakupompa. Neluki wanyi nami amama anateli kuhosha mazu amuchidiwu! Ahosheleña neyi muntu wacheñi.

Atata niwena etejeli mwahosheli aMama. Nadizili kapetulu 6 kaAefwesesa nami Yehova wakeñeleña nindi novwahileña anvwali jami. Nakeñeleña chisaka chetu kwikala chanuñañana nawa natoñojokeli nami neyi niyitiyilila niwena akuntiyilila. Hayina mpinji, nadiloñesheleña kusoneka ma exam, dichi netejeli kwila hadi tukweji tusatu mwanlejeluwu anvwali jami. Ilaña namukanini Yehova nami neyi mpinji yinashiki nakatachika cheñi kupompa.

Nafuukwili mwatama. Muloña natoñojokeli nami hanyima yatukweji tusatu nikatwalekahu kumukalakela Yehova. Ilaña, wubwambu wami nayena wamanini mukapinji kanti. Nawa aMama nawaTata esekeli chikupu kunkanjikija kuleka kumukalakela Yehova.

WUKWASHU NIIKAÑESHA

Kwitala daWanta, nawanini aYinsahu amavulu akañesheleñawu kudi yisaka yawu. Anlejeli nawu Yehova wukunkwasha. (Matewu 10:34-37) Anlejeli nawu neyi nitwalekahu kwikala washinshika kudi Yehova, anvwali jami aketeja kudiza chalala. Nakeñeleña kushindamena hadi Yehova, dichi natachikili kulomba.

Chisaka chami chankañesheleña munjila jashiyashana. A Mama anlembeleli nawu nileki kudiza nawa esekeli kunshinjila. Kakavulu namweneneñahu hohu. Chinela nami nihoshi, twatombokeleña muloña wejima wetu twakeñeleña kumwekesha netu tunakuhosha mwalala. Neluki nami neyi nayilemesheleña aMama, kachi yuma yawahili. Anvwali jami anyinkeleña nyidimu yayivulu kulonda nishakameña hetala. Mpinji yikwawu anshikilileña mwitala hela kuñumina yakuda.

A Mama alejeli antu amakwawu kuyikwashaku kunkaanisha kudiza. Alejeli antañishi yami, ilaña ankañenyi. A Mama antwalili kudi mukulumpi wawu wamudimu kulonda anshinjili nawu nsakililu jinashali jejima jamukunkulwayi. Atemesheleli antaña foni nakuyilomba wukwashu iku anakudila. Nahilili nankashi. Ilaña chinayili nakupompa, aeluda anlejeli nawu aMama chayilejeleñawu antu haniku kukala adiña nakuyishimwina.

Anvwali jami akeñeleña nawu niyi kuyunivesiti kulonda nakazateña mudimu wawuwahi. Wejima wetu twakañenyeña kuhanjeka mumesu awunda, dichi nayisonekeleli nyikanda nakuyilumbulwila yuma yinakeñeleña kwila. A Tata ahilili nankashi nawa ahosheli nawu, “Neyi wunakumona neyi wukawana mudimu, wakeñili kumadiki neyi nehi wukafuma hanu hetala.” Nalombeli kudi Yehova nami yankwashi. Ifuku dalondeleluhu, hinadiña nakushimwina, ahela ayedi añiñijili mudimu wakudizisha anyanawu. A Tata alekeli kunhoshesha nawa atachikili kundiwula. A Mama ahosheli nawu chadi kuwaha neyi nekalili mbanji kubadika kwikala Chinsahu chaYehova.

Mpinji yikwawu nelukileña wanyi neyi Yehova wakeñeleña nindi nitadikeña nawanvwali jami. Dichi nalombeli kudi Yehova nikutoñojoka hachahosha Bayibolu hakukeña kwindi. Chumichi chankwashili kubula kuneña nikwiluka nami anvwali jami adiña nakuñakamena. Yehova wankwashili kutoñojoka chiwahi nikwiluka chinatela kwila. Natiyileña kuwaha kushimwina muloña nayileñamu mpinji yejima. Nakeñeleña kwikala payiniya.

KUZATA WUPAYINIYA

Ahela muchipompelu chatiyiluwu nawu inakukeña kutachika wupayiniya, anlejeli kuhembelela anvwali kuwundisha muchima. Nalombeli maana, nasandujoleli, natoñojokeli chaletesheli nikeñi wupayiniya nawa nahosheli nawamanakwetu niahela akuluka yitembi. Nelukili nami inakukeña kumutiyisha Yehova kuwaha. Nelukili cheñi nami hela nikuhembelela kutachika wupayiniya, anvwali jami aketeja wanyi.

Natachikili wupayiniya muchaaka chinamanishileña shikola. Chinazatiluku wupayiniya chanti, nakeñeleña kuya nakuzatila kudi kukankila kweneni. Ilaña aTata nawaMama akeñeleña wanyi ami kufuma hetala. Dichi nahembeleli nichinashikijili yaaka 20. Kuhiñahu nehwili kukasanji kamutayi kuntemesha kukabeta kambwela muJapan kwakwihi nawa ntaña jami kulonda aMama abuleña kwakama nankashi.

Hinadiña nakuzatila kunidi iluña, natiyileña kuwaha kumona atudizi ami aBayibolu anakupapatishewa. Natachikili kudiza Chizungu muloña nakeñeleña kushimwina antu amavulu. Chinamweni iyena dadiña nawapayiniya adimena ayedi adiña muchipompelu nichiyakwashileña amakwawu, ninami nafuukwili kwikala payiniya wadimena. Haniyi mpinji, aMama akatili nankashi kayedi, mpinji yejimiyi nafuntileña nakuyakamena. Chumichi chayihayamishili nawa atachikili kunkeña.

YEHOVA WANKISWILILI

Chimwahitili yaaka 7, Atsushi, payiniya wadimena inatena hatachi, wantemesheleli mukanda. Wakeñeleña nindi twakadisumbuli nawa wañihwili neyi nukwiteja. Natoñojokeleñahu jakudisumbula nayena wanyi nawa natoñojokeli nami niyena dichatoñojokeleñayi. Hanyima yakakweji kamu, nakwili nami inakukeña tudiluki chachiwahi. Twawanini netu wejima wetu twakeñeleña kwila yuma yoyimu. Twakeñeleña kutwalekahu kuzata mudimu wampinji yejima nikwiteja kuzata mudimu kudi wejima. Nkumininaku, twadisumbwili. Natiyili kuwaha nankashi muloña aTata, aMama niantaña jami amakwawu enjili kuchawija.

Kuhiñahu, henohu tuchidi kuzata wupayiniya wampinji yejima, Atsushi amutondeli kwikala nkoñi wañinza wakukwasha. Dichi atwitemesheli kuya nakuzatila muñinza neyi apayiniya adimena nawa nkumininaku neyi nkoñi wañinza. Chitwamanishili kuzatila yipompelu yejima katachi muñinza yatwinkeluwu kuzata , twatambwilili foni kukasanji kamutayi. Atwihwili neyi tukwiteja kubuukila kuNepal nakutwalekahu kuzata mudimu wetu wakuzatila yipompelu.

Nadiña nakwakamena anvwali jami chadi kutiyawu nawu inakubuukila kwakulehi. Chinayitemesheleli foni, aTata ahosheli nawu, “wunakuya kwituña dadiwahi.” Henohu kanda niyitemesheli foni, aTata ayinkeli mukanda kudi ebwambu dawu wahosheleña hetuña daNepal nawa aTata atoñojokeleña nawu akutiya kuwaha kuya kunidi ituña.

Twatiyili kuwaha kwikala hakachi kawantu amawahi amuNepal. Kuhiñahu, atwilejeli cheñi nikuzatila muBangladesh. Hela chakwila idi ituña dadiña kwakwihi naNepal, dambukiluku chikupu. Twazatili chikupu mumudimu wetu wakushimwina. Chimwahitili yaaka yitanu, atutemesheli cheñi kuJapan, kutunakuzatila chayinu mpinji mudimu wetu wakuzatila yipompelu.

Hinazatilileña muJapan, Nepal, niBangladesh namwilukili nankashi Yehova. Antu munawa matuña akweti yisemwa, yililu niyaaku yashiyashana. Nawa antu ejima ambuka. Namoni Yehova chakamenañayi antu hamuntu hamuntu, kuyitambwila, kuyikwasha nikuyikiswila.

Natela kumusakilila Yehova. Muloña wankwasha kumwiluka, wañiteja kuzata mudimu windi nawa wanyinka niyala wamuwahi. Nzambi wankwasha kufuukula chiwahi, nikweti wubwambu wawuwahi nayena ninachisaka chami. Inakumusakilila Yehova muloña ami nawaMama tunekali cheñi amabwambu. Natiyi kuwaha nekalili nawubwambu naNzambi ninawamama.