Yehova Wamuteneni Nindi ‘Ibwambu Dami’

1, 2. (a) Tweluka ñahi netu antu anateli kwikala amabwambu jaNzambi? (b) Tukuhanjekadi muchinu chibaaba?

KUFUMA tuhu hampinji yakuvwalika kushika nikukufwa twakeñaña kutukeña. Antu ejima akeñaña kuyimwekeshela kukeña, bayi neyi kukeña kwekala muwuluwi hohuku. Twakeñaña kutukeña chikupu kudi Yehova. Antu amavulu eluka wanyi nawu anateli kwikala amabwambu jaNzambi muloña amumonaña wanyi nawa wabadika. Ilaña etu tweluka walala.

² Muloña Bayibolu yahosha hadi antu ekalili amabwambu jaNzambi. Twatela kudizila kudi awantu. Muloñadi? Muloña kwikala nawubwambu naNzambi dichuma chalema nankashi. Tushinshikenu hadi Abarahama. (Tañenu Yakoba 2:23.) Wekalili ñahi ibwambu daNzambi? Wubwambu waAbarahama naNzambi washindameneni hachikuhwelelu nawa amutenaña nawu “nkakulula yawakwakukuhwelela ejima.” (Aroma 4:11) Chimukutañaña nsañu yaAbarahama, dihulenu nenu ‘Nateli kwimbujola ñahi chikuhwelelu chindi nawa nateli kukolesha ñahi wubwambu wami naYehova?’

ABARAHAMA WEKALILI ÑAHI IBWAMBU DAYEHOVA?

3, 4. (a) Lumbululenu kweseka kwamweniyi Abarahama. (b) Muloñadi Abarahama chakeñeleleñayi kulambula Isaka?

³ Fwikijenu Abarahama wudi nayaaka 125 nakukandama hampidi chovu-chovu.^[1] (Talenu mazu adi kunsa.) Nawa mwanindi Isaka wudi nayaaka 25 nakumulondela hanyima. Isaka nasendi nchawa, Abarahama nasendi mpoku niyuma yakukwatisha nachu kesi. Iyi mpinji yatela yadiña yakala muchihandilu chaAbarahama. Bayi neyi muloña wawushinakajuku. Wachidiña nañovu. Ilaña iyi mpinji yadiña yakala muloña Yehova wamulejeli kulambula mwanindi!—Kutachika 22:1-8.

⁴ Chikuhwelelu chaAbarahama chadiña mukweseka. Antu amakwawu ahoshaña nawu Nzambi wadiña mbanji hakumuleja Abarahama kulambula mwanindi. Amakwawu ahoshaña nawu Abarahama wetejeli kulambula mwanindi muloña wamuheleli. Antu ahoshaña mwenimu muloña adana chikuhwelelu nawa eluka wanyi mwatalisha chikuhwelelu chalala hela chichazatikaña. (1 Akorinda 2:14-16) Ilaña Abarahama hamwovwahilili Nzambi chakubula kwilukaku, hela netu chakubula kutoñojokaku. Wovwahilili muloña wadiña nachikuhwelelu chalala. Welukili nindi Yehova hanateli kumuleja yakoñi chuma chikumuletesha yaneñi haya nyakaku. Abarahama welukili nindi neyi yovwahila, Yehova wukumukiswila hamu nimwanindi akeñayi. Chumanyi chaletesheli Abarahama yekali nachikuhwelelu chamuchidiwu? Wateleleli kumwiluka Nzambi nikumona chakwashañayi antu.

5. Abarahama watela wamwilukili ñahi Yehova nawa nsañu yadiziliyi yamukwashili ñahi?

⁵ Kumwiluka Nzambi. Abarahama wakulilili mumusumba waUri. Tata yaAbarahama niantu amuniwu musumba adifukwileña kudi anzambi akutwamba. (Yoshuwa 24:2) Hanu dinu Abarahama wamwilukili ñahi Yehova? Bayibolu yahoshaña nawu Shemi mwana kaNowa wadiña ntaña yaAbarahama. Shemi wafwili henohu Abarahama wudi nayaaka 150. Shemi wadiña nachikuhwelelu chakola, nawa watela walejeleña antaña jindi hadi Yehova. Hitweluka jiikaku, ilaña Abarahama watela dichamwilukiliyi Yehova. Nsañu yadiziliyi yamukwashili kumukeña Yehova nawa wekalili nachikuhwelelu chakola.

6, 7. Yuma yamweniyi Abarahama yakolesheli ñahi chikuhwelelu chindi?

⁶ Kumona chakwashañayi antu. Chikuhwelelu chaAbarahama chakoleli ñahi nachamukwashiluwu kudi Yehova? Antu amakwawu ahoshaña nawu muntu wasambilaña kutiya kufumahu hakutoñojoka nkumininaku hakwilamu. Muchima waAbarahama watiyili kuwaha nachamwilukiliyi Nzambi, nawa wamulemesheli muloña “Yehova, diyi Nzambi Wabadika Kwiwulu, diyi waheta nimawulu nimaseki.” (Kutachika 14:22) Bayibolu yatenaña kalemesha kamuchidiwu nawu “kwakama Nzambi.” (Aheberu 5:7) Twatela kumwakama Nzambi hakwila nawu twikali nawubwambu wakola. (Masamu 25:14) Kumwakama Nzambi dikwaletesheli Abarahama yamwovwahili Yehova.

⁷ Nzambi walejeli Abarahama naSara kufuma muUri nakuya kwituña dacheñi. Adiña akula dehi, nawa adi kushakamaña mumatenti yaaka yejima. Hela chakwila Abarahama welukili nindi wukwikala muwubanji, wamwovwahilili Yehova. Nzambi wamukiswilili nikumukiña hamuloña wakwovwahila kwindi. Chakutalilahu, chelili akeñi kumujaha Abarahama nikumutambula ñodindi Sara, Yehova wayikiñili aAbarahama naSara muchihayamisha kakavulu. (Kutachika 12:10-20; 20:2-7, 10-12, 17, 18) Yuma yamweniyi Abarahama, yakolesheli chikuhwelelu chindi.

8. Tunateli kukolesha ñahi wubwambu wetu naYehova?

⁸ Tunateli kwikala amabwambu jaYehova? Eña, tunateli! Twatela kumwiluka Yehova neyi cheliliyi Abarahama. Ninetu tunateli kumwiluka Nzambi nikumona chakwashañayi antu. Makonu, twiluka yuma yayivulu kubadika Abarahama. (Danyeli 12:4; Aroma 11:33) MuBayibolu mwekala nsañu yahosha hadi “welili niiwulu niiseki.” Nsañu yitwadizaña yatukwashaña kumukeña Yehova nikumulemesha chikupu. Iku kukeña kwatusañumunaña kumwovwahila Nzambi. Neyi twovwahila, tukwiluka chatukiñañayi nikutukiswila, nawa chumichi chikutukwasha kumona chakwashañayi antu nawa chikuhwelelu chetu chakolelañaku. Kumuzatila Yehova chikupu kukutukwasha kwikala nakukeña, kuwunda nimuzañalu. (Masamu 34:8; Yishimu 10:22) Neyi tumwiluka Nzambi tukwikala nankisu jajivulu nawa tukwikala nawubwambu wawuwahi nayena.

ABARAHAMA CHAKOLESHELIYI WUBWAMBU WINDI NAYEHOVA

9, 10. (a) Wubwambu wunateli kukola ñahi? (b) Chumanyi chamwekeshaña nawu Abarahama watwalekeluhu kwikala ibwambu daYehova?

⁹ Wubwambu wudi neyi chuma chalema wuseya. (Tañenu Yishimu 17:17.) Ilaña wudi wanyi neyi chuma chalema wuseya chitunateli kulanda nakusha mwitala kulonda mumwekaneña lubanji. Wubwambu wekala neyi nkenu yakeñekaña menji kulonda yikenukeña. Abarahama watwalekeluhu kwikala ibwambu daYehova. Wubwambu windi watwalekeluhu ñahi?

¹⁰ Abarahama watwalekeluhu kumwakama Nzambi nikumwovwahila. Chakutalilahu, chayiliyi kuKenani nachisaka chindi niañamba jindi, wakuhweleleli Yehova kumukwasha kufuukula chiwahi muyuma yejima. Yehova wamulejeli Abarahama kwalamisha amayala ejima amwitala dindi henohu wudi nayaaka 99 nawa kunashali chaaka chimu hakwila Isaka yavwaliki. Komana Abarahama wajinokeli hela kukaana mwamulejeliyi Yehova? Inehi, wamukuhweleleli Yehova chikupu nawa wamwovwahilili ‘dodina ifuku.’—Kutachika 17:10-14, 23.

11. Abarahama wakamenenidi musumba waSodoma naGomora, nawa Yehova wamukwashili ñahi?

¹¹ Wubwambu waAbarahama naNzambi wakoleleluku muloña Abarahama wamwovwahilileña Yehova nimuyuma yanyanya. Wakeñeleña kumuleja Yehova yuma yidi yejima nikumulomba wukwashu. Chakutalilahu, Abarahama wakameneni chelili Yehova yahoshi nindi musumba waSodoma naGomora wukuwujilumuna. Muloñadi? Wakameneni nindi antu amawahi akufwila hamu nawantu atama. Wakameneni mwihwa windi Loti nachisaka chindi ashakamineña muSodoma. Abarahama wamukuhweleli Yehova, “Mukwakusompesha iseki dejima,” dichi wamulejeli yuma yadiña nakwakamenayi. Yehova wadiwunjikili nebwambu dindi nawa wamumwekesheleli luwi. Yehova wamulumbulwili nindi neyi yaleta wunsompeshi, wakeñakeñaña antu amawahi nikuyipulwisha.—Kutachika 18:22-33.

12, 13. (a) Kumwiluka Nzambi nikumona chakwashañayi antu kwamukwashili ñahi Abarahama? (b) Chumanyi chamwekeshaña nawu Abarahama wamukuhweleleli Yehova?

¹² Kumwiluka Nzambi nikumona chakwashañayi antu kwamukwashili Abarahama kwikala nawubwambu wakola naYehova. Chimwahitili mpinji, Yehova wamwilili Abarahama kulambula mwanindi, nawa Abarahama welukili nindi Yehova wadiwunjika, waluwi, hatwambañaku nawa wakiñaña. Abarahama welukili chikupu nindi Yehova hekalili mbanjuku. Muloñadi chitunahosheli mwenimu?

¹³ Abarahama walejeli añamba jindi nindi: ‘Shalenu kunu nachimbulu, ninami nimukwenzi tukuya kwenoku, twakadifukuli kudi Nzambi, tukwinza cheñi, tukuyiwana.’ (Kutachika 22:5) Abarahama watalishili mudihi? Watwambileña hakuhosha nindi wukufunta hamu naIsaka henohu neluki nindi nakuya nakumulambula? Inehi. Bayibolu yahosha nawu Abarahama welukili nindi Yehova natweshi kumusañula Isaka. (Tañenu Aheberu 11:19.) Abarahama welukili nindi Yehova wamwinkeli ñovu yakuvwala mwana hela chakwila yena naSara adiña ashinakaja dehi. (Aheberu 11:11, 12, 18) Dichi wakuhweleli chikupu nindi kwosi chuma chinateli kukañanyayi Yehova. Abarahama welukili wanyi chuma chadi kumwekana adina ifuku. Ilaña wakuhweleli nindi neyi mwanindi yafwa, Yehova wukamusañula kulonda yikaninu yaNzambi yejima yikashikijewi. Dichamutenenañawu Abarahama nawu “nkakulula yawakwakukuhwelela ejima.”

14. Kukalanyi kumwamonaña hakumukalakela Yehova nawa chikuhwelelu chaAbarahama chinateli kuyikwasha ñahi?

¹⁴ Makonu, Yehova watwilaña wanyi nindi tulambuli anyanetu, ilaña watulejaña kwovwahila nshimbi jindi. Mpinji yikwawu chinateli kutukalila kwiluka chikwekalila iji nshimbi hela jinateli kutukalila kujovwahila. Ninenu dichimwamonaña? Antu amakwawu kushimwina kwayikalilaña. Hadaha atiyaña nsonyi nikutiya woma kuhosha nawantu abula kwilukawu. Amakwawu atiyaña woma kwikala ambukaku nawakwawu kunyidimu hela hashikola. (Kwidika 23:2; 1 Atesalonika 2:2) Neyi anayili nawu mwili chuma chimu chikuyikalila, londelenu chikuhwelelu nikuhamuka kwadiña naAbarahama. Neyi tutoñojokaña hayuma yelileñawu amayala niambanda ashinshika, chikutukwasha kuyimbujola nikukundama kwakwihi Nebwambu detu, Yehova.—Aheberu 12:1, 2.

WUBWAMBU WALETAÑA NKISU

15. Muloñadi chitukuhoshela netu Abarahama waditoñesheli wanyi nachamwovwahililiyi Yehova?

¹⁵ Abarahama waditoñesheli hakumwovwahila Yehova? Inehi. Wamukalakeleli Yehova nakashinshi chakadi kuditoñesha kushika nimpinji yafwiliyi. (Kutachika 25:8) Abarahama chashikijiliyi yaaka 175, ñovu yamumanini, ilaña wanukileña yaaka yamukalakeleliyi Nzambi namuzañalu. Chihandilu chindi chejima chashindameneni hadi Yehova nawa wakeñeleña kushakama haya nyaka kumbidi.

16. Muzañalwinyi wakatiyayi Abarahama muParadisa?

¹⁶ Bayibolu yahosha nawu Abarahama “wadiñi nakutalila ñanda yikweti yikuku, yakwila mukwakuyipima nikuyituña yowu Nzambi.” (Aheberu 11:10) Abarahama wakuhweleli nindi ifuku dimu wakamona iyi ñanda, Wanta waNzambi, wakayuulaña hamaseki. Mwalala wakayimona! Fwikijenu muzañalu wakatiyayi Abarahama kushakama muparadisa hamaseki nikutwalekahu kukolesha wubwambu windi naNzambi. Wakazañalala chikupu hakwiluka nindi chikuhwelelu chindi chinakwashi ambuña aNzambi hayaaka yayivulu. MuParadisa wakeluka nindi mulambu wahaMpidi yaMoriya wemeneneñaku mulambu wabadika kulema. (Aheberu 11:19) Nawa wakeluka nindi chichamukatili kumuchima hakulambula mwanindi Isaka chinakwashi yihita yawantu kwiluka chichamukatili Yehova kumuchima hakuhana Mwanindi, Yesu Kristu, kwikala ifutu danyiloña dawantu. (Yowanu 3:16) Yuma yeliliyi Abarahama yinatukwashi kulemesha ifutu danyiloña, chawaana chabadika.

17. Yumanyi yimunakufwila kwila, nawa tukahanjekadi muchibaaba chinalondeluhu?

¹⁷ Dichi wejima wetu tutwalekuhu kwimbujola chikuhwelelu chaAbarahama. Kufwana Abarahama, ninetu twatela kumwiluka Nzambi nikumona chakwashañayi antu. Neyi tukutwalekahu kudiza hadi Yehova nikumwovwahila, tukumona chatukiswilañayi nikutukiña. (Tañenu Aheberu 6:10-12.) Tutwalekuhu kwikala amabwambu jaYehova. Muchibaaba chinalondeluhu, tukashinshika hadi antu asatu ashinshika ekalili amabwambu jaNzambi.