Yehova Walombolaña Antu Jindi Munjila Yaya Kuwumi

1, 2. (a) Mawumi amavulu anapuluki muloña wakusoñamishanyi? (Talenu mwevulu wakutachikilahu.) (b) Wunlombolinyi wukwetiwu antu jaNzambi wunateli kupulwisha wumi wawu?

“IMANAKU, TALATALAKU, TIYILILAKU.” Awa mazu ayisonekeli hachipamba cheneni haketwila njanji muNorth America kufuma tuhu hayaaka 100 yinahitihu. Muloñadi? Kulonda nyotoka abuleña kuyihuma kudi masuwa yinakuketula mukwakwa. Kulondela iyi yinjikijilu yakusoñamisha kunapulwishi mawumi awantu amavulu.

² Yehova watwilila yuma yamaneni kubadika iyi yinjikijilu. Walombolaña antu jindi kulonda akatambwili wumi wahaya nyaaka nikuyikiña kuwubanji. Yehova hikabiña wukweti kukeña walombolaña nikusoñamisha anyikoku kulonda abuli kwenda munjila yawubanji.—Tañenu Isaya 30:20, 21.

YEHOVA WATACHIKILI DEHI KULOMBOLA ANTU JINDI

3. Chisaka chawantu chekalili ñahi munjila yaya kukufwa?

³ Kufuma tuhu haleñeliwu antu, Yehova wenkaña antu nshimbi nikuyilombola. Chakutalilahu, mwitempa daEdeni, Yehova waheni nshimbi yadi kukwasha chisaka chawantu kutwalekahu kwikala nawumi nimuzañalu. (Kutachika 2:15-17) Ilaña Adama naEvu akaanini wunlomboli waTata yawu wukweti kukeña. Evu watiyilili kwizu datiyakeneña neyi dinakufuma mudi kapela nawa Adama watiyilili mwizu daÑodindi. Yumanyi yafuminimu? Wejima wawu akabakeni nawa afwili chakadi kuchiñeja kudi kwejima. Cheñi hamuloña wakubula kwovwahila kwawu, chisaka chejima chekalili munjila yaya kukufwa.

4. (a) Muloñadi chikwakeñeleleña nshimbi jajiha hanyima yaDibaji? (b) Chihandilu chachiha chamwekesheli ñahi Nzambi chatoñojokañayi?

⁴ Nzambi wamwinkeli Nowa nshimbi japulwishili mawumi awantu. Hanyima yaDibaji, Yehova walejeli antu kubula kuda mbiji hela kunwa mashi. Muloñadi? Muloña Yehova wakeñeleña kwiteja antu kutachika kuda mbiji. Chineli chihandilu chahimpikili, akeñekeleña wunlomboli wawuha: “Mbiji nawumi wayu, wowu mashi ayu, bayi muyidyaku.” (Kutachika 9:1-4) Ilu lushimbi lunakutudizisha Nzambi chamonañayi wumi, yomweni wawuleñeli. Diyi Nleñi nawa watwinka wumi, dichi wukweti wuswa wakusha nshimbi hawumi. Chakutalilahu, walejeli antu kubula kujaha mukwawu muntu. Nzambi wamonaña wumi nimashi kwikala ajila, nawa wakasompesha antu azatishaña mashi munjila yatama.—Kutachika 9:5, 6.

5. Tukushinshika hayumanyi, nawa muloñadi?

⁵ Chelili Nowa nafwi dehi, Nzambi watwalekelihu kulombola antu jindi. Muchinu chibaaba, tukushinshika yakutalilahu yimu yinakumwekesha chayilombweliyi. Kushinshika yuma yeliliwu kukutukwasha kukalondela wunlomboli waYehova mwituña dadiha.

MUNZA WAWUHA, NSHIMBI JAJIHA

6. Muloñadi antu jaNzambi chateleleliwu kwovwahila nshimbi jamwinkeliwu Mosi, nawa aIsarela ateleli kwikala nayilwilu yamuchidinyi?

⁶ Mumafuku aMosi, Yehova wenkeli antu jindi nshimbi kutalisha hayilwilu nichatela kudifukulañawu. Muloñadi? Niwena, chihandilu chahimpili. Kubadika hadi yaaka 200, aIsarela ashakamineña neyi anduñu muEjipitu mwadiña antu adifukwileña kudi ankakulula, ankishi niyuma yikwawu yayivulu yamutiyishileña Nzambi kutama. Chelili antu jaNzambi anasubuki, akeñekeleña nshimbi jajiha. Ateleli kwikala munza walondeleleña hohu Nshimbi jaYehova. Nyikanda yikwawu yahosha nawu izu daChiheberu dakwila nawu “nshimbi” daya mukwila nawu “kuleja, kulombola, kudizisha.” Nshimbi yayikiñili aIsarela kuyilwilu yatama nikunsakililu yakutwamba yadiña munyunza yayinyeñumukili. Neyi aIsarela amwovwahila Nzambi, akutambwila nkisu. Neyi amudiwula, akukabakana yuma yadi kufuma mukubula kutiyilila.—Tañenu Kuhituluka 28:1, 2, 15.

7. (a) Lumbululenu Yehova chayinkeleliyi antu jindi nshimbi jajiha. (b) Indi Nshimbi yekalili ñahi nkuluñaña yawa Isarela?

⁷ Nshimbi jajiha jakeñekeleña hamuloña wukwawu. Nshimbi yayikwashili aIsarela kudiloñesha nachuma chikamwekana munkeñelu yaYehova, kwinza kwaMesiya, Yesu Kristu. Nshimbi jayanukishileña aIsarela nawu adiña awanina wanyi. Jayikwashileña kwiluka nawu akeñekeleña ifutu danyiloña, dikwila nawu, mulambu wawanina wunateli kufumisha nshidi jawu chikupu. (Aŋalija 3:19; Aheberu 10:1-10) Kubombelahu, Nshimbi jakiñili chisaka mwadi kuvwalikilayi Mesiya nikuyikwasha aIsarela kumwiluka neyi namwekani dehi. Mwamweni, Nshimbi yadiña hohu neyi chuma chakuyilombola hakapinji kanti hela netu “nkuluñaña,” sampu Kristu nenzi.—Aŋalija 3:23, 24.

8. Muloñadi wutwatelela kulombolewa nayishina yamuNshimbi jaMosi?

⁸ Chineli tudi akwaKristu, ninetu tunateli kuhetela muwunlomboli waYehova wahanayi muNshimbi. Munjilanyi? Twatela Kwimana nakutachika kutalatala hayishina hashindamena Nshimbi. Hela chakwila twalondelaña wanyi yina nshimbi, tunateli kazatisha jimu kulonda jitulomboleña muwumi wetu nihakudifukula kudi Yehova. Wasonekeli iji nshimbi muBayibolu kulonda tudizileñaku, kutulombola nayishina nikusakilila Yesu watudizishili yuma yabadika Nshimbi. Kutiyilila chahosheliyi Yesu nindi: “Munatiyi cheliluwu nawu, Kwila wuvumbi chinjila. Ilaña ami nukuyileja nami muntu wukutala mumbanda namesu akumufwila, neli dehi nindi wuvumbi mumuchima windi.” Twatela kubula kwila wuvumbi nikukaana yitoñojoka nikufwila kwejima kwawuvumbi.—Matewu 5:27, 28.

9. Yumanyi yaletesheli nshimbi jajiha jaNzambi kwikala jashikilamu?

⁹ Chelili Yesu wenza dehi neyi Mesiya, Yehova wahanini nshimbi jajiha nawa wamwekesheli hatooka nkeñelu yindi. Muloñadi chahaniniyi nshimbi jajiha? Muchaaka cha 33 C.E, Yehova wakaanini munza wawaIsarela nakutonda chipompelu chawakwaKrstu kwikala antu jindi. Dichi chihandilu chawantu jaNzambi chekalili chachiha.

NSHIMBI JAWAISARELA AKUSPIRITU

10. Muloñadi yipompelu yawakwakristu chayinkeleliwu nshimbi, nawa jadiña jambukaku ñahi najawaIsarela?

¹⁰ Yehova waheni Nshimbi jaMosi kudi aIsarela kulonda yayidizishi chakushakama nikudifukula kudiyena. Kutachika tuhu muyaaka nkulakaji yakusambila, antu jaNzambi afumineña kunyunza nikuyitachi yashiyashana, nawa ayiteneneña nawu aIsarela akuspiritu. Atuñili chipompelu chawakwaKristu nawa adiña muchitiyañenu chachiha. Yehova wayinkeli nshimbi jajiha jayikwashili kwiluka chakuhanda nikudifukula kudiyena. Mwalala, “Nzambi haakaminaña antu kumesuku; hakwila munyuza yejima, muntu wamwakamaña yena, welaña mwaloña, amutiyaña kudi Nzambi kuwaha.” (Yililu 10:34, 35) Alondeleli “lushimbi lwaKristu,” lwashindameneni hayishina yasonekeliwu munyichima yawu, bayi hamalola. Ilu lushimbi lwalombweleña nikuhetesha akwaKristu kwejima kwadiwu.—Aŋalija 6:2.

11. Yumanyi yiyedi yatela kwilawu akwaKristu kwesekeja ‘nalushimbi lwaKristu’?

¹¹ A Isarela akuspiritu aheteleli chikupu muwunlomboli waYehova kuhitila mudi Yesu. Henohu tuhu kanda yaleti chitiyañenu chachiha, Yesu waheni nshimbi jiyedi jalema. Yimu yahosheleña hamudimu wakushimwina. Yikwawu yahosheleña hayilwilu yatela kwikalawu nayu akwaKristu nichatela kudimonawu wumu namukwawu. Iji jadiña jawakwaKristu ejima, dichi jazatikaña kudi wejima wetu makonu, hela tukweti kuchiñeja kwakushakama haya nyaaka mwiwulu hela hamaseki.

12. Yumanyi yadiña yayiha hamudimu wakushimwina?

¹² Kunyima, antu akunyuza enjileña kuIsarela nakumukalakela Yehova. (1 Anyanta 8:41-43) Ilaña Yesu wahanini lushimbi lutwawanaña haMatewu 28:19, 20. (Tañenu.) Yesu walejeli atumbanji ‘kuya’ kudi antu ejima. Hapentekosta 33 C.E, Yehova wamwekesheli nindi wakeñeleña nsañu yayiwahi yishiki kudi antu mukaayi kejima. Hadina ifuku, antu akushika ku 120 enzeli naspiritu yajila nawa atachikili kuhosha madimi ashiyashana kudi ayudeya niantu abalulumukili kwikala ayudeya. (Yililu 2:4-11) Kuhiñahu, iluña datoheli kushika nikuSamariya. Chashikili chaaka cha 36 C.E, iluña datoheleliku chikupu abombeleliku niajentili abulili kwalama. Chamwekesheleña nawu akwaKristu ateleli kushimwina mukaayi kejima.

13, 14. (a) ‘Mulushimbi lwalwiha’ lwaYesu mwabombeladi? (b) Tukudizilaku kwodi kudi Yesu chamwekesheliyi kukeña?

¹³ Yesu wahanini cheñi “lushimbi lwalwiha” lwahosheleña hachitwatela kumona amanakwetu niahela. (Tañenu Yowanu 13:34, 35.) Twatela kuyimwekeshela kukeña mafuku ejima, ilaña twatela kuhana wumi wetu hadi wena. Ichi dichuma chabuliliwu kushimuna muNshimbi.—Matewu 22:39; 1 Yowanu 3:16.

¹⁴ Yesu wamwekesheli kukeña kwamuchidiwu kwakadi kudimbana. Wayikeñeli atumbanji twindi nankashi chakwila wayifwilili. Nawa wakeñaña antu ejima amulondelaña kwila chochimu. Dichi twatela kuumikaña kukala nikufwila amanakwetu niahela.—1 Atesalonika 2:8.

NSHIMBI JAKATATAKA NIJAKUMBIDI

15, 16. Yuma yinahimpiki ñahi makonu, chahimpika munjilanyi, nawa Nzambi watulombolaña munjilanyi?

¹⁵ Yesu watondeli “nduñu washinshika wukweti maana” wakenkaña antu amulondaña ‘yakuda yakuspiritu hampinji yatelela.’ (Matewu 24:45-47) Iyi yakuda yinabombelimu wunlomboli walema wawantu jaNzambi neyi yuma yihimpika. Indetu yuma yikuhimpika ñahi?

¹⁶ Tunakushakama ‘mumafuku akukuminina,’ nawa katataka tumoni lukadi lwakadi kwikalañaku dehi. (2 Timotewu 3:1; Maku 13:19) Cheñi, Satana niandemoni jindi ayinata hamaseki kufuma mwiwulu, anakuleta makabi kudi antu. (Chimwekeshu 12:9, 12) Kubombelahu, twalondelaña lushimbi lwaYesu kuhitila mukushimwina mukaayi kejima kudi antu amavulu nawa mumadimi amavulu kubadika kunyima.

17, 18. Twatela kwiladi nanshimbi jinakutwinkawu?

¹⁷ Kuloñesha kwaNzambi kwatwinka yitwa yayivulu yatukwashaña mumudimu wakushimwina. Komana mwayizatishaña iyi yitwa? Kukupompa, atwilejaña chitunateli kuzatisha iyi yitwa munjila yayiwahi. Mwamonaña iwu wunlomboli nenu wunakufuma kudi Nzambi?

¹⁸ Hakwila nawu tutambwili nkisu jaNzambi, twatela kutiyilila wunlomboli wejima watwilejañayi muchipompelu chawakwaKristu. Neyi tujilondela makonu, chikatukwasha kwovwahila hampinji ‘yalukadi lwasweja,’ hakamukisañanañawu Satana nikaayi kindi kejima. (Matewu 24:21) Kuhiñahu, akatwinka nshimbi jajiha mwituña dadiha yakatwisubula kuwufwinda waSatana.

19, 20. Nyivuñilwinyi yakavuñululawu, nawa mukafuma yumanyi?

¹⁹ Mumafuku aMosi, munza wawaIsarela wakeñekeleña wunlomboli wawuha, dichi Nzambi wayinkeli Nshimbi. Chimwahitili mpinji, chipompelu chawakwaKristu chalondeleleña “lushimbi lwaKristu.” Munjila yoyimu, Bayibolu yatulejaña nawu mwituña dadiha, twakatambwila nyivuñilu yanshimbi jajiha. (Tañenu Chimwekeshu 20:12.) Iyi nyivuñilu yikalumbulula nshimbi jaYehova kudi antu hayina mpinji. Antu ejima kubombelaku niantu akasañulawu chakadizawu iji nshimbi, akeluka yuma yinakukeñayi Nzambi kudi wena. Nyivuñilu yikatukwasha kwiluka chatoñojokañayi Yehova. Nawa twakayiluka chikupu Bayibolu, dichi antu ejima muParadisa akadikeña, akekala nakavumbi nawa akadilemeshaña. (Isaya 26:9) Toñojokenu yuma yayivulu yitwakadiza nikudizisha antu hampinji yakatulombolañawu kudi Mwanta, Yesu Kristu.

²⁰ Neyi tulondela wunlomboli ‘wasonekawu munyivuñilu’ nawa twikala ashinshika kudi Yehova hakweseka kwakukumishaku, wakasoneka majina etu ‘mumukanda wawumi.’ Twakatambwila wumi wahaya nyaka! Dichi twatela KWIMANA nakutaña Bayibolu chiyahosha, KUTALATALA nakutiyishisha chiyahosha, KUTIYILILA kuhitila mukwovwahila wunlomboli waNzambi. Neyi twila mwenimu, twakapuluka lukadi lwasweja nikutwalekahu kwiluka Nzambi yetu wukweti maana nikukeña.—Mukwakutaŋisha 3:11; Aroma 11:33.