Kuchimuswa: Hurricane Ian, Florida, USA, September 2022 (Sean Rayford/Getty Images); hakachi: Mama yawantu nimwanindi Donetsk, anakuyifumisha muUkraine, July 2022 (Alex Chan Tsz Yuk/SOPA Images/LightRocket via Getty Images); kuchimuswa: Kwakupimina COVID, Beijing, China, April 2022 (Kevin Frayer/Getty Images)
IKALENU ATONA!
2022: Hichaaka Chayihuñu—Indi Bayibolu Yahoshahu Nawudi?
Muchaaka cha 2022, mwadiña njita, kukeha kwamali, niwubanji wadimwekenaña wadiña nakushimunawu hama nyuzi. Bayibolu hohu diyashimuna chinakuletesha iyi yuma yimwekaneña.
Chumanyi chacheni chaleteshaña iyi yuma yamuchidiwu kumwekana mu 2022
Yuma yamwekana muchaaka chinamani yinakumwekesha hatoka nawu tunakushakama mumpinji yashimuna Bayibolu nawu “mafuku akukuminina.” (2 Timotewu 3:1) Mafuku akukuminina atachikili muchaaka cha 1914. Talenu yuma yinamwekani katataka chiyinesekani nayuma yashimwineñahu dehi Bayibolu nawu yakamwekana:
“Njita.”—Matewu 24:6.
“Mu 2022 mwituña daEurope mwadiña cheñi njita.”a
Talenu chibaaba chinakuhosha nawu “Russia Namwimakeni Ukraine.”
“Kukeha Kwayakuda.”—Matthew 24:7.
“Muchaaka cha 2022: Mwadiña izala yakapwelendendi.”b
Talenu chibaaba chinakuhosha nawu “Njita Yidi muUkraine Yinaleteshi Yakuda Mukaayi Kusweja Kukeha.”
“Yipupu.”—Luka 21:11.
“Chipupu chapolio chafunta cheñi, nawa chipupu chamonkeypox niCOVID-19 chasweja kutanda nankashi chakwila antu amavulu anafwi, chumichi chinamwekeshi hatoka nawu yikatu yamuchidiwu yafwana yinakuyandisha antu mukaayi kejima.”c
Talenu chibaaba chinakuhosha nawu “Antu 6 Miliyoni Anafwi naChipupu chaCOVID.”
“Yuma yakutiyisha woma.”—Luka 21:11.
“Kutata kwasweja, chaaña, kesi kasweja, nidibaji. Chaaña chamu 2022 chinaleteshi antu amavulu kufwa nankashi nawa matala awantu amavulu anakisiki hama nadibaji.”d
Talenu chibaaba chinakuhosha nawu “Bayibolu Yashimwineñahu Dehi Nawudi Hakutata Kunasweji muKaayi Kejima.”
“Mapumba [hela “yikonkojola,” tumazu twaheshina].”—Luka 21:9.
“Chineli antu azuwili nankashi muloña wakukeha kwamali mwituña, nihakusweja kukandamisha yuma wuseya, ichi chaletesha antu kubula kutiyañana najinfulumendi.”e
Talenu chibaaba chinakuhosha nawu “Wuseya wunakukandama mukaayi kejima.”
Yumanyi yikamwekana muchaaka chinakwinza?
Kwosi wuneluki yuma yikamwekana muchaaka cha 2023. Tuneluki hohu netu katataka, Wanta waNzambi hela nfulumendi yamwiwulu keña yinzi hanu hamaseki. (Danyeli 2:44) Iyi nfulumendi yikafumishahu yuma yejima yinakukabisha antu nawa nkeñelu yaNzambi akayila hanu hamaseki.—Matewu 6:9, 10.
Tunakuyikolesha netu mulondeleña kufumba kwaYesu Kristu nawa “tonenuña” kulonda mumoneña yuma yinakumwekana mukaayi chiyinakushikija wuprofwetu wamuBayibolu. (Maku 13:37) Mwani tulejenu neyi munakukeña kwilukilahu nsañu jikwawu hadi Bayibolu chiyinateli kuyikwasha makonu nichiyinateli kuyikwasha enu nichisaka chenu kwikala nakuchiñeja kwakumbidi.
a AP News, “muchaaka cha 2022 mwituña daEurope mwadiña cheñi njita” asonekeli aJill Lawless, December 8, 2022.
b Kuhana Yakuda muKaayi Kejima, “Kukeha kwaYakuda muKaayi kejima.”
c JAMA Health Forum, “Tunakushakama mumpinji yikudi yipupu yashiyashana—Kwatachikili chikatu chaCOVID-19 kuhiñahu chikatu chaMonkeypox, niPolio, niyikatu yashiyashana X,” asonekeli aLawrence O. Gostin, JD, September 22, 2022.
d Earth.Org, “Chumanyi Chaletesheli Kutata Kusweji Nankashi muChaaka cha 2022?” asonekeli aMartina Igini, October 24, 2022.
e Carnegie Endowment for International Peace, “Muchaaka cha 2022 Kukeha kwaMali muKaayi Kejima Kwaletesheli Antu Kubula Kutiyañana najiNfulumendi,” asonekeli aThomas Carothers niaBenjamin Feldman, December 8, 2022.