Mukakumudimbulula Kristu Hinyi?

Ñakwilu yamuBayibolu

Mukakumudimbulula Kristu bayi neyi himuntu wumu hela antu anteshaku, ilaña Bayibolu yahosha nawu ‘akakumudimbulula Kristu amavulu.’ (1 Yowanu 2:18) Hela chochu, izu dakwila nawu “mukakumudimbulula Kristu” dafuma kwizu dachiGiriki daya mukwila nawu “kudikaña naKristu,” datalisha kudi muntu wudi wejima welaña iyi yuma:

• Wakaanaña nindi Yesu hidiyi Kristuku (Mesiya) hela nindi hidiyi Mwana kaNzambiku.—1 Yowanu 2:22.

• Wadikañaña naKristu, waWayishewa waNzambi.—Isamu 2:1, 2; Luka 11:23.

• Watwambaña nindi hiKristu.—Matewu 24:24.

• Wakabishaña akakumulondela Kristu, chineli Yesu wamonaña nindi neyi akabisha akakumulondela dikwila nawu anakumukabisha niyena.—Yilwilu 9:5.

• Watwambaña nindi himukaKristu iku nakukoña yuma yatama hela wabula kushinshika.—Matewu 7:22, 23; 2 AKorinda 11:13.

Kubombelahu, Bayibolu yatena antu elaña yuma yamuchidiwu nawu akukumudimbulula Kristu, nawa yayitena cheñi ejima wawu nawu “mukakumudimbulula.” (2 Yowanu 7) Kufuma tuhu mumafuku awa apostolu, mukakumudimbulula Kristu natwalekihu kushika nikulelu. Wuprofwetu wamuBayibolu washimwineñahu dehi nawu chumichi chikamwekana.—1 Yowanu 4:3.

Chakwiluka akakumudimbulula Kristu

• Ataandishaña nsañu yakutwamba kutalisha hadi Yesu. (Matewu 24:9, 11) Chakutalilahu, ana atañishaña nawu kwekala aNzambi Asatu hela nawu Yesu diyi Nzambi waÑovu jejima akaanaña chatañishiliyi Yesu nindi: “Tata wambadika ami.”—Yowanu 14:28.

• Akakumudimbulula Kristu akaanaña chahosheliyi Yesu kutalisha hachazataña Wanta waNzambi. Chakutalilahu, anlomboli jakwitiya amakwawu ahosheleña nawu Kristu wazatilaña hamu nanfulumendi yawantu. Ilaña, iyi ntañishilu yambukaku chikupu nachahosheliyi Yesu nindi: “Wanta wami wambadi yakanu kaayi wanyi.”—Yowanu 18:36.

• Ahoshaña nawu Yesu hiMwanta wawu, ilaña ovwahilaña wanyi nshimbi jindi, kushilahu nijakushimwina nsañu yayiwahi yaWanta.—Matewu 28:19, 20; Luka 6:46; Yilwilu 10:42.